विश्वले इन्धनसंकट व्यहोर्दा हाम्रोमा अवसर : ऊर्जामन्त्री

A+ A A-

जलस्रोत, ऊर्जा तथा सिंचाइ मन्त्री पम्फा भुसालले महँङ्गिदै गएको पेट्रोलियम पदार्थको सट्टा विद्युतीय ऊर्जाको खपतलाई बढाउन आग्रह गरेकी छन् ।

मुलुकको आर्थिक समृद्धिको मुख्य आधार जलविद्युत भएको भन्दै उनले महँङ्गिदै गएको पेट्रोलियम पदार्थको सट्टा विद्युतीय ऊर्जाको खपतलाई बढाउनुपर्ने बताइन् ।

‘जलविद्युतको शक्तिः सेतो सुन’ विषयक अन्तर्क्रिया कार्यक्रममा उनले भनिन्, 'प्रकृतिले दिएको वरदान अर्थतन्त्रको महत्वपूर्ण स्रोत ऊर्जाको भरपुर उपयोग गर्न नसक्दा हामी आर्थिक र सामाजिक विकासका दृष्टिले पछि पर्‍यौँ । ११२ वर्ष पहिले जलविद्युत उत्पादन गर्ने एसियामै पहिलो राष्ट्र भएर पनि जलविद्युतको उपयोग गर्ने सवालमा नेपाल पछाडि पर्‍यो ।'

उनले विश्‍वमा इन्धन संकट देखिएको अवस्थामा नेपालले ऊर्जाको खपत बढाउने र पेट्रोलियम पदार्थको खपत घटाउने अवसर रहेको बताइन् ।

पछिल्लो समय विद्युत उत्पादनमा आत्मनिर्भरको बाटोमा पुगेको भन्दै उनले उद्योगधन्दाका लागि पनि अहिले ऊर्जा अभाव नभएको उनले बताइन् । मन्त्री भुसालले जलविद्युत आयोजनाको बीमाको विषयमा देखिएका समस्या समाधान गर्न मन्त्रालय तयार भन्दै सरोकारवालाहरूलाई यस विषयमा छलफलबाट समाधान निकाल्न आग्रह गरिन् ।

नाफामूलक तरिकाले मात्रै बीमा क्षेत्रलाई नलिन आग्रह गर्दै सेवा प्रवाहका दृष्टिले हेर्न उनले आग्रह गरिन् । बीमाले संकटको सुरक्षा गर्ने भएकाले एकदमै नाफा गर्ने भन्दा पनि सेवा गर्ने क्षेत्रका रुपमा सबैले बुझ्नुपर्नेमा उनको जोड थियो ।

प्रकाशित मिति: आइतबार, असार १२, २०७९ २२:००