तुलसीपुर उपमहानगरले ल्यायो १ अरब ८६ करोडको बजेट, स्वास्थ्य शिक्षा र कृषिमा जाेड

तुलसीपुर उपमहानगरले ल्यायो १ अरब ८६ करोडको बजेट, स्वास्थ्य शिक्षा र कृषिमा जाेड

A+ A A-

दाङको तुलसीपुर उपमहानगरपालिकाले शुक्रबार आर्थिक वर्ष २०७९/८० को अनुमानित बजेट सार्वजनिक गरेको छ । तुलसीपुर उपमहानगरपालिकाका उपमेयर स्यानी चौधरीले बजेट तथा कार्यक्रम सार्वजनिक गर्दै आगामी आर्थिक वर्षको कुल बजेट रु. १ अरब ८६ करोड ४७ लाख, ७९ हजार अनुमान गरिएको बताइन् ।

जसमा आन्तरिक श्रोतबाट रु. ३० करोड १२ लाख, स्थानीय तह राजस्व बाँडफाट मालपोत रजिष्ट्रेशनबाट रु. १० करोड, अल्या बैक मौज्दात रु. ४ करोड ५० लाख गरी कूल आन्तरिक आम्दानी रु. ४४ करोड ६२ लाख अनुमान गरिएको छ ।

संघीय सरकारबाट प्राप्त हुने अनुदानहरूमा समानिकरण अनुदान रु. ३३ करोड ६२ लाख, सशर्त अनुदान रु. ६२ करोड ९१ लाख, समपुरक अनुदान रु. १ करोड ६० लाख, विशेष अनुदान रु. १ करोड ३० लाख र राजस्व बाँडफाट रकम रु २३ करोड ५५ लाख ३ हजार, रहेको बताइन् ।

प्रदेश सरकारबाट प्राप्त हुने अनुदान गरिएको समानिकरण अनुदान रु. १ करोड ५६ लाख, सशर्त अनुदान रु. १ करोड ६० लाख, समपुरक अनुदान रु. ३ करोड, विशेष अनुदान रु.८० लाख र राजस्व बाँडफाट रकम रु ३ करोड ३१ लाख ७६ हजार र अन्य संघ संस्था अनुदानमा नगरविकास कोष ऋण रु.७ करोड,युनिसेफ अनुदान रु. ६० लाख र सडक वोर्ड नेपाल रु. १ करोड प्राप्त हुने अनुमान गरी कूल आम्दानी वजेट अनुमान गरिएकोमा व्ययतर्फ कार्यालय संचालन र प्रशासनिक खर्च रु. २७ करोड ८ लाख ३२ हजार नगर विकास कोष सावा व्याज किस्ता भुक्तानी रु ७७ लाख २३ हजार, चालु नगरस्तरीय कार्यक्रम खर्च रु.१ करोड ६५ लाख ७७ हजार, सबै महाशाखा र शाखाहरूको प्रशासनिक र कार्यक्रम खर्च रु.१८ करोड ९८ लाख ६८ हजार, वडास्तरीय प्रशासनिक,योजना तथा कार्यक्रम खर्च रु.१३ करोड ३० लाख, नगर स्तरीय योजना तथा कार्यक्रम खर्च रु ३ करोड ८५ लाख ५४ हजार २ सय ७६, दायित्व गत आ.व.का योजना कार्यक्रम खर्च रु.३० करोड, केन्द्र प्रदेश र अन्य समपुरक योजनाको खर्च रु. ८ करोड ५० लाख, गत आ.व.भुक्तानी बाँकी खर्च रु.२ करोड ५१ लाख २४ हजार ७ सय २४, संघीय सरकार सशर्त,विशेष र समपुरक योजनाको खर्च रु. ६५ करोड ८१ लाख, प्रदेश सरकार सशर्त,विशेष र समपुरक योजनाको खर्च रु. ५ करोड ४० लाख गरि कुल वजेट खर्च रु. १ अरब ८६ करोड ४७ लाख, ७९ हजार अनुमान गरिएको होे ।

त्यसैगरि आर्थिक वर्ष २०७९÷८० मा चालु तर्फका कार्यक्रमहरू,प्रशासनिक खर्च र कार्यालय संचालन तर्फ कुल खर्च रु. ४७ करोड ७२ लाख ७७ हजार अर्थात कुल वजेट खर्चको २५.५९ प्रतिशत रहेको छ, विकास र शसक्तिकरणका कार्यक्रमहरू, सशर्तका कार्यक्रमहरू तर्फ कुल खर्च रु.१ अरव ३७ करोड ९७ लाख ७९ हजार कुल वजेट खर्चको ७३.९९ प्रतिशत हुने बताएको छ । यसै गरि वित्तीय खर्चतर्फ ७७ लाख २३ हजार विनियोजन गरिएको छ जुन कुल बजेट खर्च अनुमानको ०.४१ प्रतिशत हुन आउने उममेयर चौधरीले बताइन् ।