काठमाडौं महानगरको बजेटमा प्राथमिकता पाएका यी क्षेत्र

A+ A A-

काठमाडौं महानगरपालिकाले आगामी आर्थिक वर्ष २०७९/८० का लागि २५ अर्ब ४१ करोड ९६ लाख ९६ हजारको बजेट प्रस्तुत गरेको छ ।

शुक्रबार उपप्रमुख सुनिता डंगोलले बजेट प्रस्तुत गरेकी छन् । डंगोलले शिक्षा, स्वास्थ्य फोहोर मैला व्यवस्थापन, सम्पदा संरक्षण तथा संवर्द्धन र पूर्वाधार विकासलाई महत्त्व दिई बजेट विनियोजन गरिएको बताएकी छिन् ।

महानगर क्षेत्रभित्रका मठमन्दिर, ऐतिहासिक तथा पुरातात्विक सम्पदाहरूको संरक्षण र संवर्द्धन गर्न बजेट विनियोजन गरिएको उनले बताइन् । त्यस्तै वडा कार्यलयहरूलाई सेवा प्रवाह, विकास निर्माण र प्रत्यक्ष जनचाहना पूरा गर्ने कार्यालयको रूपमा विकास गर्ने उद्देश्यका साथ चालु आर्थिक वर्षको भन्दा झण्डै दोब्बर बजेट विनियोजन गरिएको छ ।

काठमाडौँ महानगरपालिकाको केन्द्रीय कार्यालयको वडा ११ स्थित हरिभवनको प्रवलीकरण, विद्युतीय सार्वजनिक सवारी यातायात, विभिन्न संस्थाहरूको परिसरमा भएको खाली जग्गामा पोखरी निर्माण, पानीको पुनर्भरण विशेष कार्यक्रमजस्ता कार्यक्रमलाई महानगरले प्राथमिकतामा राखेको छ ।

त्यस्तै, महानगर उज्यालो कार्यक्रम, डबलीको पुन:स्थापना र एम्पिथिएटर निर्माण, सामुदायिक विद्यालयहरूको भौतिक पूर्वाधारमा गुणात्मक सुधार, सेक्युरिटीका लागि सीसीटीभी, बस स्टपमा परम्परागतशैलीको फल्चा निर्माण, दमकल स्टेसनको विस्तार, घरघरमा गई ज्येष्ठ नागरिकको स्वास्थ्य परीक्षण तथा औषधि वितरण र युवा केन्द्रित कार्यक्रमहरू बजेटमा छन् ।

यस्तै, खेलकुद विकासका लागि पूर्वाधार निर्माण तथा विभिन्न कार्यक्रम सञ्चालन, महिलाहरूलाई सीप विकास तथा स्वरोजगार कार्यक्रम, अपाङ्गता भएका व्यक्तिका लागि सहयोग, मेट्रो रेलको सम्भाव्यता अध्ययन, सार्वजनिक शौचालय निर्माण तथा संचालन, शीत भण्डार निर्माण, सार्वजनिक जग्गा संरक्षण, ढल प्रहोधन केन्द्रको निर्माणमा पनि महानगरले जोड दिएर बजेट विनियोजन गरिएको उपप्रमुख डङ्गोलले बताइन् ।

प्रकाशित मिति: शुक्रबार, असार १०, २०७९ १८:५७