२ करोड घुस मोलमोलाइ गर्ने न्यायाधीश–वकिल कनेक्सन

A+ A A-

एक जना हाई प्रोफाइल व्यापारीको मुद्दा मिलाउन न्यायाधीश राजकुमार कोइराला र अधिवक्ता रुद्रप्रसाद पोखरेलबीच २ करोड रुपैयाँ घुस लेनदेनको अडियो सार्वजनिक भएपछि न्यायवृत्त तरंगित भएको छ ।

जिल्ला अदालत काठमाडौंका न्यायाधीश कोइरालामाथि छानबिन गर्न न्याय परिषद्ले तीन सदस्यीय जाँचबुझ समिति बनाएको छ भने नेपाल बार काउन्सिलले पोखरेललाई सातदिने स्पष्टीकरण सोधेर कारबाही प्रक्रिया थालेको छ ।

भलै पोखरेलले आफू स्वनिलम्बनमा बस्ने फेसबुक स्टाटसमार्फत बताएका छन् । कानुन व्यवसायीको आचारसंहिता उल्लंघन गरेकोमा बार काउन्सिलले पोखरेलको वकालत प्रमाणपत्र निश्चित समयका लागि खोस्नेदेखि रद्दसम्म गर्न सक्छ ।

नेपाल बार एसोसिएसनका निवर्तमान कोषाध्यक्ष पोखरेलले सर्वसाधारणको ८ अर्ब रुपैयाँ ठगी गर्ने व्यापारी इच्छाराज तामाङलाई धरौटीमा छाडिदिए न्यायाधीशलाई २ करोड रुपैयाँ दिने वाचा गरेको अडियोमा सुनिन्छ । न्युज २४ टेलिभिजनले सार्वजनिक गरेको १० मिनेटको अडियोमा अधिवक्ता पोखरेल र न्यायाधीश कोइरालाबीच लामो कालखण्डको चिनजान शैलीमा गफ भएको छ । सिभिल सहकारी बचत तथा ऋण सहकारीमा जम्मा गरेकाे सर्वसाधारणकाे रकम पूर्वसांसदसमेत रहेका तामाङले हिनामिना गरेकाे भन्दै प्रहरीकाे केन्द्रीय अनुसन्धान ब्युराेले अनुसन्धान गरेकाे थियाे ।

अधिवक्ता पोखरेल र कोइराला दुवै झापावासी हुन् । पोखरेल गौरादहका हुन् भने कोइराला भद्रपुरका । न्यायक्षेत्रमा उनीहरूको सक्रियताको समय एकै बेला भएको देखिन्छ । नेपाल बार एसोसिएसनको वेबसाइटमा राखिएको बायोडाटाअनुसार पोखरेल २०५१ सालदेखि वकालतक्षेत्रमा सक्रिय छन् । ०५३ मा भने उनले वकालत प्रमाणपत्र पाएका हुन् ।

कोइराला न्याय सेवामा ०५२ मा छिरेका हुन् । न्याय परिषद्को अभिलेखअनुसार २६ पुस ०५२ मा कोइराला न्याय सेवामा प्रवेश गरेका हुन् । २१ साउन ०७२ मा उनी जिल्ला न्यायाधीश बनेका थिए । पोखरेल र कोइराला नेपाल ल क्याम्पसमा पढ्दा एक/दुई ब्याच जुनियर–सिनियर भएका उनीहरू दुवैलाई चिन्ने एक अधिवक्ताले बताए । पोखरेल औसत कानुन व्यवसायीमा पर्छन् । तर, विचौलियाको भूमिकामा भने उनी पहिल्यैदेखि सक्रिय रहेको एक जना वरिष्ठ अधिवक्ताले बताए ।

निलम्बित प्रधानन्यायाधीश चोलेन्द्र शमशेर जबरासँग पाखेरलले कसिलो साँठगाँठ बनाएको घटनाक्रमले समेत देखाउँछ । न्यायालयको भ्रष्टाचार मौलाउन भूमिका खेलेको भन्दै कानुन व्यवसायीको छाता संगठन बार एसोसिएसनले देशभर आन्दोलन गर्दा त्यतिबेला कोषाध्यक्ष रहेका पोखरेलले भने यसको विरोध गरेका थिए ।

हरिहर दाहाल, हरि उप्रेती, बद्रीबहादुर कार्कीलगायतका वरिष्ठ अधिवक्ताहरूले न्यायपालिका शुद्धीकरण अभियान थाल्दा पनि पोखरेलविपरीत खेमामा उभिएका थिए । हालै सार्वजनिक भएको अडियोमा समेत पोखरेलले निलम्बित प्रधानन्यायाधीश जबरालाई नै भनाउन लगाउने बताएका छन् ।