रवि लामिछानेको पार्टीविरुद्ध उजुरी हाल्ने समूहमा उनकै दाइ हरिशरण पनि

केही दिनअघि हरिशरण लामिछानेले स्वतन्त्र राष्ट्रिय सञ्जालसँग जाेडिँदै भनेर तस्वीर शेयर गरेका थिए, जसमा सुमन सायमी, पुष्कर शाह, विमल पन्तलगायत देखिएका छन् ।

A+ A A-

पूर्वसञ्चारकर्मी रवि लामिछानेको 'राष्ट्रिय स्वतन्त्र पार्टी' दर्ता नगर्न माग गर्दै निर्वाचन आयोगमा उम्मेदवारी दिने समूहमा उनकै दाइ हरिशरण लामिछाने पनि संलग्न रहेको पाइएको छ ।

पार्टीको नामले स्वतन्त्र शब्दको मर्ममै प्रश्न उठाएको भन्दै उक्त नाम नदिन 'स्वतन्त्र राष्ट्रिय सञ्जाल' नामक समूहले आयोगमा उजुरी दिएकाे छ । उक्त समूहमा सञ्चारकर्मी हरिशरण पनि आबद्ध छन् ।

यसबारे प्रश्न गर्दा हरिशरणले भने, 'हाम्रा साथीहरूले आयोगमा उजुरी दिनुभएकाे छ, जुन जायज हाे । पार्टी पनि कतै स्वतन्त्र हुन्छ त ?'

प्रतिनिधिसभा चुनावमा हरिशरण काठमाडाैं निर्वाचन क्षेत्र नम्बर ३ मा स्वतन्त्र उम्मेदवारी दिने तयारीमा छन् । साेही क्षेत्रबाट चुनाव लड्ने तयारी गरिरहेकाे उनका भाइ रविले हिजाे (मंगलबार) मात्र राष्ट्रिय स्वतन्त्र पार्टी घाेषणा गरेका थिए । रविले दल दर्ताका लागि आयाेगमा निवेदन दिएका छन् ।

आज बिहान विश्व साइकलयात्री पुष्कर शाह, मनाेज पण्डित, डम्बर साहुलगायतकाे टाेली आयाेगमै पुगेर राष्ट्रिय स्वतन्त्र पार्टीकाे नामप्रति आपत्ति जनाउँदै दर्ता नगरिदिन मागसहित निवेदन दिएकाे छ ।

प्रकाशित मिति: बुधबार, असार ८, २०७९ १८:०२