डडेल्धुराका स्थानीय तह भन्छ्न्- विपद् व्यवस्थापनमा सक्षम छाैं

A+ A A-

विपद् व्यवस्थापनका लागि कुनै समस्या नरहेकाे डडेल्धुराका स्थानीय तहले बताएका छन् । जिल्लाका दुई नगरपालिका र पाँच गाउँपालिका गरी सात वटा स्थानीय तहले आइ पर्नसक्ने सम्पूर्ण विपद् व्यवस्थापनका लागि आफूहरू तयार रहेको बताएका हुन्।

शुक्रबार जिल्ला सदरमुकाममा आयोजित ‘विपद् जोखिम न्यूनीकरण तथा व्यवस्थापनसम्बन्धी तयारी एवं छलफल’ कार्यक्रममा विभिन्न स्थानीय तहका विपद् फोकल व्यक्तिहरुले विपद् व्यवस्थापनका लागि तयार रहेको जानकारी गराए ।

जिल्लाको भित्रीमधेसमा पर्ने आलिताल गाउँपालिका र परशुराम नगरपालिकामा बाढी र पहिरो उच्च जोखिम रहेको छ भने अन्य माथिल्लो भेगका स्थानीय तहमा पहिरोको जोखिम छ।

परशुराम नगरपालिका आइपर्नसक्ने सम्पूर्ण विपद् व्यवस्थापनका लागि तयार रहेको नगरपालिकाका सूचना प्रविधि अधिकृत हरिश ठगुन्नाले जानकारी दिए। उनका अनुसार विपद् व्यवस्थापन कोषमा ८ लाख रुपैयाँ छ। नगरपालिकासँग उद्धार र राहतका सामग्री पनि पर्याप्त छन् ।

आलिताल गाउँपालिकाले पनि विपद् व्यवस्थापनका लागि तयार रहेको बताएको छ। गाउँपालिकामा अध्यक्ष राहत कोष गठन गरी विभिन्न विपद्मा परेका व्यक्तिलाई राहत दिने गरिएको गाउँपालिकाका सूचना प्रविधि अधिकृत नवराज ओझाले जानकारी दिए।

उनका अनुसार विपद् कोषमा २ लाख ३२ हजार रहेको छ। गाउँपालिकासँग विपद् व्यवस्थापनका लागि सामग्रीहरु समेत रहेको उनले बताए।

जिल्लाको अजयमेरु गाउँपालिकाले स्थानीय विपद् व्यवस्थापन ऐन बनाएको छ। गाउँपालिकाको विपद् व्यवस्थापन कोषमा ८ लाख ५० हजार रहेको गाउँपालिकाका स्वास्थ्य संयोजक गणेश पालले जानकारी दिए।

जिल्ला सदरमुकामाको अमरगढी नगरपालिकामा आगलागी र पहिरोको जोखिम छ। यस्ताे विपद् व्यवस्थापनका लागि आवश्यक पर्ने दमकल, इस्काभेटर टिप्परलगायतका सामग्री तयारी अवस्थामा राखिएकाे नगरप्रमुख विशेश्वरप्रसाद ओझाले जानकारी दिए। अमरढीको विपद् व्यवस्थापन कोषमा ५ लाख रुपैयाँ रहेको जनाइएको छ।

गन्यापधुरा गाउँपालिका पनि आइ पर्नसक्ने सम्पूर्ण विपद् व्यवस्थापनका लागि तयार रहेको जनाइएको छ। गाउँपालिकाको विपद् व्यवस्थापन कोषमा ११ लाख ५० हजार रुपैयाँ रहेको गाउँपालिकाका विपद् फोकल व्यक्ति माधव फुलाराले जानकारी दिए।

विपद् व्यवस्थापनका लागि अवश्यक सामग्रीहरुलाई पनि तयारी अवस्थामा राखिएको उनको भनाइ छ। जिल्लाको भागेश्वर र नवदुर्गा गाउँपालिका पनि सम्पूर्ण विपद् व्यवस्थापनका लागि तयार रहेको जनाइएको छ।

स्वास्थ्य क्षेत्र पनि तयार

विपद् व्यवस्थापनका लागि स्वास्थ्य क्षेत्र पनि तयार रहेको छ। जिल्लामा रहेका स्वास्थ्य संस्थामा आरआइटी टीम गठन भइसकेको उल्लेख गर्दै जिल्ला स्वास्थ्य कार्यालय डडेल्धुराका प्रमुख टंकप्रसाद चपागाईंले टीमका पदाधिकारीहरुलाई तालिम दिइसकेको बताए।

कार्यालयसँग औषधि पनि प्रयाप्त मात्रामा रहेको उनले जानकारी दिए। जिल्लाका सबै स्वास्थ्यकर्मीहरु विपद् व्यवस्थापनका लागि तयारी अवस्थामा रहेको उनको भनाइ छ।

सुरक्षा निकायलाई तयार रहन निर्देशन

जिल्ला विपद् व्यवस्थापन समितिका अध्यक्ष एवं प्रमुख जिल्ला अधिकारी राजुप्रसाद पौडलले जिल्लाका सातै स्थानीय तह र सुरक्षा संयन्त्रलाई तयार रहन निर्देशन दिएका छन्।

जतिबेला पनि विपद् आउनसक्ने भएकाले आवश्यक सामग्रीसहित तयारी अवस्थामा रहन सुरक्षा संयन्त्रलाई उनले निर्देशन दिएका हुन्।

कार्यक्रममा सहभागी सुरक्षा निकायका प्रमुखहरुले आफूहरु विपद् व्यवस्थाका लागि तयारी अवस्थामा रहेको जानकारी गराएका थिए। प्रजिअ पौडेलका अनुसार जिल्ला विपद् व्यवस्थापनमा १० लाख २२ हजार रुपैयाँ रहेको छ।

‘जिल्लाका भित्री मधेसलगायतका अन्य स्थानसमेत बाढीपहिरोको उच्च जोखिममा रहेको हुँदा बाढीपहिरोको जोखिम रहेका स्थानमा बसोबास गर्ने जनता तथा स्थानीय तहलाई पूर्णरुपमा सचेत रहन तथा बाढीपहिरोलगायतका विपद् एवं महामारी आइहालेमा तुरुन्त उद्धार, पुर्नस्थापना तथा राहतलगायतका कार्यमा जुट्न जिल्लास्थित सरकारी कार्यालय तथा विभिन्न संघसंस्था सबैलाई अनुरोध गर्ने निर्णय गरिएको छ,’ प्रजिअ पौडेलले भने, ‘सबै स्थानीय तहका लागि आ–आफ्नो क्षेत्रभित्र रहेका सडकलाई नियमित रुपमा सुचारु गर्नका लागि र सडकमा बाढीपहिरोको कारण कुनै स्थानमा अवरोध आइहालेमा तुरुन्त अवरोध हटाइ सडक सुचारु गर्न स्काइभेटर डोजरलगायतका मेसिनरी तथा जनशक्तिहरुलाई तयारी हालतमा राखी आवश्यकता अनुसार परिचालन गरी सडकलाई तुरुन्त सुचारु गर्ने पनि गरिरहेका छौँ।’

जिल्लाको सीमा क्षेत्रभित्र रहेका बुडरदेखि अनारखोली सडकखण्ड र स्याउलेदेखि कोरालखोला सडकखण्डमा बाढी पहिरोका कारणबाट आउनसक्ने अवरोधलाई तत्काल हटाइ सडक सुचारु गर्ने प्रयोजनको लागि डोजर इस्काभेटरलगायतका मेसिनरी र जनशक्तीहरुलाई उक्त सडकखण्डमा तयारी हालतमा राखी अवरोध आइहालेमा तुरुन्त परिचालन गर्न सडक डिभिजन कार्यालय कुलपाते दिपायल, डोटीलाई अनुरोध गर्ने निर्णय गरिएको उनले बताए ।

प्रकाशित मिति: शनिबार, साउन ४, २०७६ ०४:५३