विप्लवलाई वार्तामा ल्याएर श्रेय लिने होडमा नेकपा नेता

A+ A A-

केही समययता विप्लव नेतृत्वको नेकपाले चुनौतिपूर्ण गतिविधि बढाएपछि सरकार चनाखो भएको देखिएको छ । विप्लवको गतिविधि बढ्न थालेको र बेलैमा यसलाई समाधान नगरिए पछि अनपेक्षित नतिजा भोग्ने अवस्था आउन सक्ने आँकलन सरकार र सत्तारुढ नेकपाले गरेको देखिएको छ । अहिले सरकार र नेपाल कम्युनिस्ट पार्टी (नेकपा)का नेता आ–आफ्नो ढंगले विप्लवसँग वार्ताको पहलमा लागेका छन् ।

सरकार र पार्टीका प्रभावशाली नेताहरूले विप्लवसँग वार्ताका लागि आ–आफ्ना सूत्र प्रयोग गरिरहेका छन् ।

केही दिनपहिले जेलमा रहेका विप्लव नेकपाका स्थायी समिति सदस्य हेमन्त प्रकाश वलीलाई गृह मन्त्रालयका सचिव प्रेमकुमार राईले भेटेका थिए । राईले वलीलाई वार्ताको वातावरण बनाउन भेटेको बताइन्छ ।

प्रधानमन्त्री केपी शर्मा ओलीको सन्देश लिएर राई वलीलाई भेट्न नख्खु जेल गएको उच्च स्रोतले बताएको छ । उनीहरूबीच के कुरा भयो ? त्यो भेटले वार्ताका लागि के सहयोग गर्यो ? त्यो भने अहिलेसम्म कसैले खोलेका छैनन् ।

नेकपा विप्लव स्रोतले भनेको छ, ‘गृह सचिव राईले वलीलाई वार्तामा आउनुप-यो, हामीले के गर्नुपर्छ ? हामी तयार छाैं । तपाईंले पनि भन्नुप-यो पार्टीमा ।’

राईले वलीलाई भेटेपछि महासचिव विष्णु पौडेल निकटको सम्पर्क सूत्र पनि वलीलाई भेट्न गएको वली निकट स्रोतले जनाएको छ ।

त्यस्तै, नेकपाका महासचिव विष्णु पौडेल नख्खु जेलमा वलीलाई भेट्न पुगेको भनिए पनि यो पुष्टि भने भएको छैन । विप्लव नेकपा स्रोतका अनुसार पौडेलले वलीलाई भेट्न आफ्ना विश्वस्त व्यक्तिलाई पठाएका थिए । पौडेलका ती विश्वस्त पात्रले पनि वलीलाई वार्ताको पहल गर्न आग्रह गरेका थिए ।

भेटघाटको केही दिनअघि नेपाल कम्युनिस्ट पार्टीका अध्यक्ष प्रचण्डले नगरकोट पुगेर विप्लव नेकपाका एकजना पोलिटब्युरो सदस्यसँग भेटेको प्रचण्ड निकट स्रोतले जानकारी दिएको छ । स्रोतका अनुसार प्रचण्डले वार्ताको तयारीका लागि नै विप्लव समूहका ती पोलिटब्युरो सदस्यलाई भेटेका थिए ।

अहिले पनि सत्तारुढ नेकपामा विप्लव समूहलाई वार्तामा ल्याएको श्रेय कसले लिने भन्ने होडबाजी नै चेलेको देखिएको छ । त्यसैले सत्तारुढ दलका नेतृत्व आ–आफ्ना मानिस लगाएर विप्लवसँग छुट्टाछुट्टै वार्ताको पहल जारी छ ।

सरकारका तर्फबाट अहिले गृह सचिव यो काममा लागेका छन् । उनले केही दिनपहिले नख्खु जेलमा गएर विप्लवका स्थायी समिति सदस्य हेमन्तप्रकाश वलीलाई भेटेर वार्ताका लागि सरकारका तर्फबाट पहल गरे ।

प्रचण्ड आफैंले नगरकोटमा विप्लवका पोलिटब्युरो सदस्य भेटे पनि उनको प्रतिनिधिका रूपमा लामो समयदेखि जनार्दन शर्माले काम गर्दै आएका छन् । उनले विप्लव समूहका केही केन्द्रीय तहका नेतालाई भेटेर छलफल चलाएको बुझिएको छ । विप्लवलाई वार्तामा ल्याउन आफूले मध्यस्थकर्ताको भूमिका खेल्ने शर्माले सार्वजनिक रुपमै पटक–पटक बताउँदै आएका छन् ।

प्रधानमन्त्री केपी ओलीको प्रतिनिधि पात्रका रूपमा अहिले गृह सचिव र उनी निकट केही नेकपाका नेता छन् ।

सरकारले वार्ता टोली गठन गरेको थियो । त्यो वार्ता टोलीको म्याद मंसिरमा सकिएको छ । त्यही टोलीका प्रमुख सोमप्रसाद पाण्डे अहिले विप्लव नेतृत्वका नेताहरू खोज्न हिँडेको बताउँछन् । पाण्डेले केही दिनपहिले आफू पाल्पा आएको र मिलेमा यतै विप्लवका नेतालाई भेट्ने बताएका थिए । उनले भनेका थिए, ‘वार्ता हुनुपर्छ तर अहिले नै मानिससँग सम्पर्क भएको छैन ।’

शर्माले पनि पछिल्लो समयमा विप्लव नेतृत्वको केन्द्रीय नेतादेखि स्थायी समिति सदस्यलाई भेटेको बताएका छन् । वार्ताकै लागि आफूले नेताहरू भेटेको उनको भनाइ छ ।

विभिन्न स्तरमा वार्ताको पहल भए पनि वार्ता कहिले हुने भन्ने तय भने हुन सकेको छैन ।

प्रकाशित मिति: शनिबार, साउन ४, २०७६ ०३:०४