नक्कली लाइसेन्स बनाएको अभियोगमा ५ जना विचौलियासहित १७ जनाविरुद्ध भ्रष्टाचार मुद्दा

नक्कली लाइसेन्स बनाएको अभियोगमा ५ जना विचौलियासहित १७ जनाविरुद्ध भ्रष्टाचार मुद्दा

A+ A A-

अख्तियार दुरुपयोग अनुसन्धान आयोगले गैरकानुनी रूपमा कागजात सच्याई नक्कली लाइसेन्स बनाइदिएको अभियोगमा पाँच जना विचौलियासहित १७ जनाविरुद्ध भ्रष्टाचार मुद्दा दायर गरेको छ ।

अख्तियारले आज उनीहरूविरुद्ध विशेष अदालतमा भ्रष्टाचार मुद्दा दायर गरेको हो । अख्तियारले यातायात व्यवस्था कार्यालय, सवारीचालक अनुमति-पत्र, एकान्तकुना, ललितपुरका तत्कालीन कार्यालय प्रमुखहरू सम्बरबहादुर कार्की र राजुभाइ कुस्मा, मेकानिकल इन्जिनियर विजयराज गिरीसमेत १२ जना कर्मचारी र ५ जना विचौलियाहरूविरुद्ध मुद्दा दायर गरेको हो ।

उक्त कार्यालयका कर्मचारी तथा सिन्धुली फोटोकपी सेन्टरका सञ्चालक बाबुराम शर्मासमेतले सेटिङमा लाइसेन्स जारी गरेको भन्ने उजुरी परेको अख्तियारले जनाएको छ । उक्त उजुरीमा अनुसन्धानपछि उनीहरूविरुद्ध मुद्दा दायर गरिएको अख्तियारका प्रवक्ता श्यामप्रसाद भण्डारीले जानकारी दिएका छन् ।

को-कोविरुद्ध दायर भयो मुद्दा ?

यातायात व्यवस्था कार्यालय, सवारीचालक अनुमतिपत्र, एकान्तकुना, ललितपुरका तत्कालीन कार्यालय प्रमुखहरू सम्बरबहादुर कार्की र राजुभाइ कुस्मा
मेकानिकल इन्जिनियर विजयराज गिरी
सहायक स्तर (पाचौँ) कमल स्याङ्तान
सिनियर मेकानिक्स अच्युतप्रसाद फुयाँल
कम्प्युटर अपरेटर (करार सेवा) प्रकाश कार्की, कम्प्युटर अपरेटर (करार सेवा) रेजु भट्टराई, कम्प्युटर अपरेटर (करार सेवा) रोशन राजभण्डारी, कम्प्युटर अपरेटर (करार सेवा) श्यामसुन्दर चौधरी, कम्प्युटर अपरेटर (करार सेवा) लक्ष्मी श्रेष्ठ, कम्प्युटर अपरेटर (करार सेवा) माया सेठी, कम्प्युटर अपरेटर (करार सेवा) ऋचा श्रेष्ठ
विचौलियाहरू हरिभक्त श्रेष्ठ, बाबुराम शर्मा भन्ने उद्धवबहादुर खत्री, दीपक विश्वकर्मा, गणेश अधिकारी र नरेन शाक्य ।

तत्कालीन कार्यालय प्रमुखहरू कार्की र कुस्माले सवारीचालक अनुमति-पत्रको नवीकरण गर्ने सम्बन्धमा गलत नियतले मातहतका कर्मचारीहरूलाई अख्तियारी प्रदान गरेको अख्तियारले जनाएको छ ।

त्यस्तै, आरोपित अन्यले प्राप्त अख्तियारीको दुरुपयोग गरी आर्थिक वर्ष २०७७/७८ र २०७८/०७९ को साउन र भदौ गरी १४ महिनामा विचौलियाहरू श्रेष्ठ, खत्री, विश्वकर्मा, अधिकारी र शाक्यसमेतको मिलेमतोमा नवीकरण नभएका तथा स्वत: रद्द भएका सवारीचालकको नाममा जारी भएको लाइसेन्स गैरकानुनी रूपमा नवीकरणको बाटोबाट ५३३ जना नयाँ व्यक्तिको नाममा जारी गरेको अख्तियारको ठहर छ ।

प्रकाशित मिति: मंगलबार, असार ७, २०७९ १५:५९