गण्डकीको बजेटमा अर्थमन्त्रीले झुक्याए मुख्यमन्त्री, गठबन्धनभित्रै मन्त्री फेर्नुपर्ने मत

गण्डकीको बजेटमा अर्थमन्त्रीले झुक्याए मुख्यमन्त्री, गठबन्धनभित्रै मन्त्री फेर्नुपर्ने मत

A+ A A-

मुख्यमन्त्रीलाई झुक्काएर मन्त्रीले बजेटमा एउटा कार्यक्रम नै काटेपछि गण्डकीमा सत्तारुढ गठबन्धनभित्र हलचल पैदा भएको छ ।

आगामी आर्थिक वर्ष २०७९–०८० को बजेटमा निर्वाचन क्षेत्र पूर्वाधार कार्यक्रम काटिएको छ । तर, मुख्यमन्त्री कृष्णचन्द्र नेपाली पोखरेलको निर्देशनविपरीत गरेपछि सत्तारुढ गठबन्धनभित्रै अर्थमन्त्री रामजीप्रसाद बरालको आलोचना भइरहेको छ ।

१ असारमा बजेट संसदमा प्रस्तुत गर्नुअघि मन्त्रिपरिषद् बैठक बसेको थियो । त्यहाँ मुख्यमन्त्री पोखरेलले मन्त्री बराललाई उक्त कार्यक्रमलाई निरन्तरता दिन भनेका थिए । जवाफमा मन्त्री बरालले कार्यक्रम यथावत रहेको सुनाए । तर, त्यही दिन संसदमा प्रस्तुत बजेटमा भने निर्वाचन क्षेत्र पूर्वाधार कार्यक्रम नै काटियो ।

कार्यक्रम काटिएको विषयलाई अर्थमन्त्रीले हलुका लिएको सरकारकै मन्त्रीको टिप्पणी छ । ‘त्यो कार्यक्रम किन काटियो भनेर सोध्दा अर्थमन्त्री हाँस्नुभयो । यो कार्यक्रमको सट्टा उस्तै खाले अर्को कार्यक्रम ल्याएको जवाफ दिनुभयो,’ एक मन्त्रीले भने ।

निर्वाचन क्षेत्र पूर्वाधार विकास कार्यक्रमअन्तर्गत प्रदेशका ३६ निर्वाचन क्षेत्रमा सांसदले २–२ करोड खर्च गर्न पाउँथे । वार्षिक ७२ करोड रुपैयाँको कार्यक्रम हटाएर अर्थमन्त्री बरालले आउँदो आर्थिक वर्षलाई कृषि सडक कार्यक्रम ल्याएका छन् । यो कार्यक्रमअन्र्तग प्रत्येक निर्वाचन क्षेत्रमा एक करोड रुपैयाँ विनियोजन हुनेछ ।

बजेट प्रस्तुत गरेको भोलिपल्ट २ असारमा अर्थमन्त्रालयले पत्रकार सम्मेलन आयोजना गरेको थियो । त्यहाँ पूर्वाधार विकास कार्यक्रम खारेज गर्नुको कारण अर्थमन्त्रीलाई सोधिएको थियो । आवश्यक नदेखिएकाले कार्यक्रम खारेज गरेको उनको प्रतिक्रिया थियो ।

आफूहरूले खर्च गर्न पैसा पाउने कार्यक्रम निर्वाचन वर्षकै बजेटमा काटेकोमा सत्तारुढ मन्त्री र सांसदसमेत असन्तुष्ट छन् ।

गण्डकी प्रदेशमा कांग्रेस नेतृत्वमा गठबन्धनको सरकार छ । अर्थमन्त्री बराल माओवादी केन्द्रबाट मन्त्री बनेका हुन् । उनकै दलभित्र पनि असन्तुष्ट मत छन् ।

सहमतिविपरीत कार्यक्रम हटाएको विषयलाई लिएर आइतबार कांग्रेस र माओवादी संसदीय दलको बैठक बसेको थियो । दुवै दलले कसरी हुन्छ त्यो कार्यक्रम समेट्नुपर्ने निचोड निकालेका छन् । शिलापत्रसँग कुरा गर्दै माओवादी संसदीय दलका नेता हरिबहादुर चुमानले गठबन्धनभित्र भएका सहमति कार्यान्वयन गरेर जानुपर्ने निष्कर्ष बैठकले निकालेको बताए ।

गम्भीर गल्ती गरेकाले अर्थमन्त्री बरालले राजीनामा दिनुपर्ने मत गठबन्धनभित्रै पैदा भएको छ । माओवादी अध्यक्ष पुष्पकमल दाहाल प्रचण्डसँग कुरा गरेर अर्थमन्त्री फेनुपर्ने र नयाँ मान्छे ल्याउनुपर्ने एक मन्त्रीले बताए ।

माओवादी संसदीय दलका नेता चुमान भने मन्त्री फिर्ता गर्ने कुरा अस्वीकार्य हुने बताउँछन् । समस्याको समाधान निकाल्नेतिर लाग्नुपर्ने उनको भनाइ छ । ‘अर्थमन्त्री नै फेर्ने कुरा स्वीकार्य छैन । हाम्रो दल त्यसलाई मान्दैन । सहमति भएको कुरा टुंग्याउनपर्छ भन्ने हो,’ नेता चुमानले शिलापत्रसँग भने, ‘समाधान निकाल्नेतिर नलागेर पात्र फेर्ने कुरा हुँदैन । त्यस्तो हो भने हामीले पनि तिम्रो फलानो पात्र फेर भन्दिउँला !’

अर्थमन्त्रीकै कारण प्रदेशसभा पनि अनिश्चित बनेको छ । गत १ असारमा प्रस्तुत बजेटमाथि आइतबारदेखि छलफल सुरु गर्ने भनिएको थियो । तर, शनिबारको कार्य व्यववस्था परामर्श समितिको बैठकले संसद अर्को सूचना नआउँदासम्म स्थगित गर्ने निर्णय गरेपछि आइतबार संसद बैठक बसेन ।

सरकारले रातो किताब तयार नहुँदासम्म संसद रोक्न माग गरेपछि बजेटमाथिको छलफल रोकिएको संसद सचिवालय सचिव हरिराज पोखरेलले बताए । ‘कार्यव्यवस्था बैठकमा सरकार पक्षले रातो किताब बनिसकेको छैन । त्यो नआउँदासम्म संसद रोक्न माग गर्नुभयो,’ उनले शिलापत्रसँग भने, ‘हामीले अरु माननीयसँग कुरा गर्दा उहाँहरुले पनि हुन्छ भनेपछि अर्को सूचना नआउँदासम्म बैठक स्थगित गरिएको छ ।’

गत १ असारमा अर्थमन्त्री बरालले ३५ अर्ब ९० करोड ९० लाख रुपैयाँको बजेट संसदमा प्रस्तुत गरेका थिए ।

प्रकाशित मिति: आइतबार, असार ५, २०७९ २१:३६