रेशम उप्रेतीको पहलमा जापानमा सुरु भयो भाषा स्कुल, पढ्न शुल्क नलाग्ने

A+ A A-

जापानमा विभिन्न क्षेत्रमा काम गरेर बस्ने अभिभावक तथा विद्यार्थीहरूलाई मध्यनजर गर्दै आजबाट जापानी र नेपाली भाषा कक्षा, स्कूल र कलेज कागजातहरू, उच्च माध्यमिक र विश्वविद्यालय अध्ययनका लागि परामर्शको कक्षा संचालन गरिएको छ । जहाँ विद्यालयका विद्यार्थीहरूलाई भाषा मात्र नभई विषयवस्तुको पनि सिकाइ हुनेछ। यस कक्षामा पठनपाठन गर्न कुनै शुल्क नलाग्ने जनाइएकाे छ ।

यसबारे थप जानकारी स्वयंसेवक शिक्षक रेशम उप्रेतीबाट

याे कामका लागि सम्पूर्ण पाठ्यसामग्री तथा ठाउँ Meji Community Center ले व्यवस्था गरेको छ । यस कक्षामा अनुभवप्राप्त स्वयंसेवक शिक्षकहरूले पढाउनुहुनेछ । र, मलगायत कुनै पनि स्वयंसेवक शिक्षकहरूले पारिश्रमिक लिने छैनाैं ।

हरेक हप्ताको शनिबार बिहान १० देखि मध्यान्ह १२ बजे Meji Community Center मा कक्षा हुनेछ । यसको सम्पूर्ण व्यवस्थापन मैले मिलाउने छु । यसको सहयोगी संस्थाहरूमा Meiji Community Center, Nagoya International center, Nagoya Minamiku Welfare Center, Nagoya Children Support Association, Nagoya नगरपालिका आवास, आइची अन्तर्राष्ट्रिय प्रहरी सेन्टर, Nagoya City Sports Support Center, Nagoya Culture Center रहनेछन् । स्वयंसेवक शिक्षकको हरेक हप्ता ५ जनादेखि ७ जना रहनु हुनेछ ।

जापानी भाषा तथा नेपाली भाषा कक्षाको सुरुवात गर्नुको उद्देश्य

जापानी भाषा जापानमा बसुन्जेल बाच्ने सहारा हो । अझै विद्यार्थीहरूका लागि हरेक विषयवस्तुहरू अध्ययनको माध्यम भनेकै जापानी भाषा हुनेछ । आफ्नो बच्चाले कुन विषयवस्तुहरू कसरी अध्ययन गरेका छन् र बाबुआमा, बच्चाको भाषाको माध्यम जापानी भाषा हुनेछ । विद्यालयका हरेक गतिविधि लागि तथा जापानमा काम गर्न र अन्य गतिविधिहरूलाई जापानी भाषाको महत्त्वपूर्ण रहने छ ।

नेपाली भाषा ?

जापानमा जन्मेका बच्चाहरू, जो नेपाली भाषा, संस्कृति र संस्कार सिक्न चाहन्छन्, तिनीहरूलाई सिकाइने छ । थोरै भए पनि नेपाली भाषा, संस्कृति र संस्कार सिकेर आफू कुन देशको नागरिक हो भन्ने र उसको परिवारसँग नेपाली भाषामा कुरा गरे यस कक्षाको उपलब्धि हुनेछ । जापानमा जन्मेका बच्चाहरूको बुबाआमा नेपाली भाषाभन्दा बाहेक राम्ररी बोल्न नजान्ने र बच्चाहरू जापानी भाषाभन्दा राम्ररी बोल्न नजन्ने,आफ्नाे परिवार र समाजसँग बोल्न पनि दोभासेको आवश्यक पर्ने अवस्था रह्याे भने सारै दुःखको कुरा हुन जान्छ ।

नेपाली भाषा, संस्कृति र संस्कारमा रमाउनु नै नेपालीपन, नेपाली मन हुन्छ । अध्ययनले उच्च माध्यमिक विद्यालयभन्दा माथिका विद्यार्थीहरूमा आफू कुन देशकाे नागरिक हो भन्ने दाेधार हुने देखाएको छ । जापानीले कहिल्यै आफ्नो देशको नागरिक स्वीकार नगर्ने र नेपाली भाषा नेपाली साथी, समाजमा पनि उसलाई स्वीकार नहुने । अनि उसले आफू कुन देशको हो भन्ने ? आफूले आफूलाई नै प्रश्न सोध्न थाल्छ । यस्ता उदाहरण धेरै छन् । याे समस्या समाधानमा मैले अग्रसरता लिएकाे छु ।

उप्रेतीले जापानी भाषा पढी जापानको विश्वविद्यालयमा पीएचडीसम्मको अध्ययन गरेका छन् । हाल उनी जापानको एक सरकारी जुनियर हाई स्कूलमा शिक्षकको रूपमा कार्यरत छन् । र, जापानी शिक्षा प्रणालीको अनुभवी व्यक्ति मानिछन् ।)

प्रकाशित मिति: आइतबार, असार ५, २०७९ १३:३३