धमाधम राइड सेयरिङ प्लेटफर्ममा जाेडिँदै ट्याक्सी, कमाई महिनाकाे एक लाख

A+ A A-

काठमाडौं टोखाकी एलिजा केसी हिजोआज ट्याक्सी चाहियो भने राइड सेयरिङ एपमार्फत मगाउँछिन् । उनले एपमार्फत ट्याक्सी बोलाउन सुरु गरेको धेरै भएकाे छैन । एपको सहायताले ट्याक्सी बोलाउँदा धेरै झण्झटबाट मुक्त भएको उनको अनुभव छ ।

‘ट्याक्सी खोज्न चोकसम्म पुग्नु परेन । घरैअगाडि आइपुग्छ । सबैभन्दा सजिलोचाहिँ बार्गेनिङ गर्नुपर्ने बाध्यताबाट मुक्त भएको छु । पहिले त मिटरमा जानै नमान्ने अनि बार्गेनिङ गरेर जानुपर्ने बाध्यता थियो’, उनले सुनाइन् ।

केही वर्षअघिसम्म राइड सेयरिङ प्लेटफर्मको नामै सुन्न नचाहने ट्याक्सी व्यवसायी अहिले धमाधम यस्ता कम्पनीमा आवद्ध भइरहेका छन् । एपमा जोडिने ट्याक्सी र प्रयोग गर्ने यात्रुको संख्या दिन-प्रतिदिन बढिरहेकाे ट्याक्सीमाण्डुका संचालक अर्जुन केसी बताउँछन् । ‘सुरुवाती दिनमा त सम्झाउन केही कठिन भयो तर पछि चालकहरू आफैँ आउन थाल्नुभयो’, उनले भने ।

एपमा जोडिँदा हुने फाइदाले चालकहरूलाई आकर्षित गरेको उनकाे भनाइ छ । ‘अहिलेका युवाहरू प्रविधिमा विश्वास गर्छन्, त्यसकाे प्रयाेग रुचाउँछन् । अब प्रविधिमा गइएन भने व्यवसाय गर्न सकिँदैन भन्ने उहाँहरूले बुझिसक्नुभएको छ’, केसीले भने ।

यो सेवालाई व्यवस्थित बनाउन सरकारले द्रूत गतिमा पाइला चाल्नुपर्ने उनी बताउँछन् । भन्छन्, ‘बागमती प्रदेशले यस्ता सेवालाई लाइसेन्स दिएरै कार्यान्वयन गराउने तयारी गरेको छ । यो छिट्टै लागू भए सरकार, व्यवसायी र यात्रु सबैलाई सहज हुन्छ ।’

सहजता, सुरक्षा र आम्दानीलगायतले गर्दा यात्रु र चालक दुवै पक्ष राइड सेयरिङ एपप्रति आकर्षित भएको टुटलका म्यानेजर आयुस कार्कीकाे दाबी छ । ‘जहाँ बोलायो त्यहाँ पुग्ने भएपछि यात्रुलाई सजिलाे त हुन्छ नै । त्यसमाथि सामान हराउने र दुर्व्यवहार हुने सम्भावना कम छ । ट्याक्सी चालकलाई पनि यात्रु खोज्न चोकमा ढुकेर बसिरहनु पर्दैन’, कार्की भन्छन् ।

सुरुमा बानी लगाउन गाह्राे भए पनि कमाई राम्रो देखेर चालकहरू आफैँ एपमा आवद्ध हुन आउने गरेको पठाओ नेपालकी मार्केटिङ म्यानेजर सुरक्षा हमालले बताइन् । ‘सुरुवाती दिनमा त कतिपय चालकहरूसँग स्मार्ट फोन पनि थिएन । पछि पठाओमा आवद्ध हुन आउनुभयो । हामीले ट्रेनिङ दिएर एप चलाउन सक्ने बनायौँ । यो सँगै हामीले चालकलाई यात्रुसँग गर्ने व्यवहार पनि सिकाउँछौँ', उनले भनिन् ।

पठाओमा आवद्ध टप ट्याक्सी चालकले मासिक १ लाखसम्म कमाई गरेको हमालको दाबी छ । हाल काठमाडौं उपत्यकामा संचालित ट्याक्सीहरूको साझा संगठन नेपाल राष्ट्रिय मिटर ट्याक्सी व्यवसायी तथा चालक सेवा समाज पनि संस्थागतरूपमै विभिन्न ट्याक्सी एपहरूमा आबद्ध छ ।

युवा पुस्ताको रोजाई, सुरक्षा र समय बचतको हिसाबले ट्याक्सी एपहरूमा जाेडिँदै गएकाे समाजका सचिव दिलिप श्रेष्ठले बताए । ‘एप यात्रुसँगै हामी व्यवसायी र चालकको सुरक्षाको लागि पनि राम्रो छ । बेला-बेलामा चालकमाथि हुने आक्रमण र लुटपाटलाई यसले धेरै घटाउँछ’, उनले भने ।

यस्तो प्लेटफर्म निजीभन्दा पनि सरकारी नियन्त्रणमा भए अझ राम्रो हुने उनको तर्क छ । ‘नागरिक एपझैँ सरकारले ट्याक्सीको लागि पनि एप बनायो भने सरकारकै राजश्व बढ्ने हो । अहिले सबैजसो एप कम्पनीको शुल्क फरक छ । सरकारले शुल्कको निश्चित मापदण्ड पनि बनाउनुपर्छ’, उनले सुझाए ।

प्रकाशित मिति: शनिबार, असार ४, २०७९ ०८:०२