किन घट्दै छ शेयरबजार ? (भिडियाेसहित)

A+ A A-

ठीक १० महिनाअघि शेयरबजारबाटै मनग्य कमाएका लगानीकर्ता यतिबेला सडकमा भेटिन्छन् । बजार बढ्दा देखिएको उत्साह नै निराशामा परिणत भएपछि बजार सुधारको १९ बुँदे मागसहित उनीहरू सडकदेखि धितोपत्र बोर्डको आँगनसम्म आइपुगेका छन् ।

बजारले छोटो समयमा नै ५० प्रतिशतको ओरालो यात्रा गर्नुमा नियामकीय प्रहार पहिलो कारण भएको उनीहरूको आरोप छ । अस्थिर नीतिलाई कारण बनाउँदै लगानीकर्ता घट्दो बजारमा आन्दाेलित भएका हुन् । बजार बढ्ने लयमै रहँदा नियामक निकाय नेपाल राष्ट्र बैंक र धितोपत्र बोर्ड (सेबोन)ले ल्याएको नीतिगत व्यवस्थाले बजार घट्न सघाएको आरोपसहित भौतिक र नीतिगत दुवै सुधारका मागसहित लगानीकर्ता आन्दोलित छन् ।

आन्दोलन र बजारको अहिलेको घटाइलाई लिएर शेयरबजार विश्लेषक अञ्जीव तुलाधर आफूले यस्ता चारवटा बुल र बियर देखेको अनुभव सुनाउँछन् । तुलाधरका अनुसार पहिलो बुल सन् २००१ मा नेप्से सूचक १ सय अंकबाट ५ सय ३८ अंक पुग्दा देखिएको थियो भने दोस्रो बुल सन् २००८ मा ११७५ अंक पुग्दा देखिएको थियो । तेस्रो भने ११७५ अंकबाट १८७५ अंकमा पुग्दा बजारकाे बुल देख्न र अनुभव गर्न पाएकाे बताउँछन् ।

विगतमा देखिएका बजारकाे बढ्दाे र घट्दाे साइकलअनुसार नै उनी चाैथाे बुल पनि सकिएकाे बताउँछन् । सन् २०२१ मा १८७५ अ‌ंकबाट ३२०० अ‌ंककाे नेप्सेकाे यात्रालाई उनले चौथाे बुल साइकलकाे रूपमा अर्थ्याएका छन् ।

तुलाधरका अनुसार यो २८ वर्षमा लगानीकर्ताले चारवटा बढ्दाे र घट्दाे बजार देखिसकेका छन् । यसरी कहिले लगानीकर्तालाई बुल बजारले स्थापित गर्‍याे त कहिले बियरिस बजारले उनै लगानीकर्तालाई पुँजीबजारबाटै विस्थापित गर्‍याे ।