शौचालयमा परिणत भएको प्लान्टबाट बिजुली निकाल्ने योजनामा बालेन (भिडियोसहित)

A+ A A-

काठमाडौं महानगरपालिकाका मेयर बालेन्द्र शाहले काठमाडौंको टेकुस्थित डम्पिङ साइडमा रहेको फोहोरबाट बिजुली उत्पादन गर्ने प्लान्ट मर्मत गर्न सकिने बताएका छन् ।

राजधानीमा आयोजित एक कार्यक्रममा बोल्दै उनले प्लान्ट मर्मतका लागि करोडौँ रुपैयाँ नभई दुई–तीन लाख रुपैयाँ गरे मर्मत हुन सक्ने दाबी गरे ।

सो वायो मिथानेसन प्लान्ट पहिलोपटक १३ असार २०७४ देखि सञ्चालनमा आएको थियो ।

तत्कालीन मेयर विद्यासुन्दर शाक्य र नेपालका लागि युरोपियन युनियनका तत्कालीन राजदूत रेन्सजे टिरिन्कले निकै तामझामका साथ उद्घाटन गरेको उक्त प्लान्ट केही महिना पनि चल्न सकेन ।

झण्डै एक वर्षको परीक्षणपछि सञ्चालनमा आएको उक्त फोहोरबाट बिजुली निकाल्ने मेसिन (वायो मिथानेसन प्लान्ट) अहिले शौचालय र कुकुरको आश्रयस्थलमा परिणत भएको छ ।

यो प्लान्ट स्थापनाका लागि युरोपियन युनियनको ८० र काठमाडौं महानगरको २० प्रतिशत गरी कुल १ करोड ८६ लाख रुपैयाँ खर्च भएको थियो ।

प्लान्टले दैनिक तीन टन फोहोर मिथानेसन गरेर निकाल्ने १४ किलोवाट बिजुली टोल र सडकका बत्तीमा जोड्ने भनिए पनि डम्पिङ साइटकै संरचनामा परीक्षणबाहेक सो प्लान्टबाट कुनै प्रगति हुन सकेन । महानगरको दाबीअनुसार यो प्लान्टले दैनिक ९६ केजी ग्यास, ३ सय केजी मल र १३ हजार ५ सय प्रशोधित पानी उत्पादन गर्न सक्ने क्षमता राख्छ ।

काठमाडौं महानगरपालिका, वातावरण व्यवस्थापन विभागको बेवास्ताका कारण प्लान्टको फोहोर छुट्याउने भाग, फोहोर धुलो बनाउने ग्रान्डर मेसिन, डाइजेस्टर, टर्बाइनलगायत विद्युतीय उपकरण अहिले काम नलाग्ने स्थितिमा पुगेका छन् ।

प्राविधिकहरूले २/४ लाख खर्च गरे यो प्लान्ट सञ्चालनमा ल्याउन सकिने बताएको काठमाडौं महानगरपालिका वातावरण व्यवस्थापन विभाग प्रमुख सरिता राईले बताइन् ।

‘मेयर आफैँ प्राविधिक हुनुहुन्छ । त्यहीमाथि महावीर पुनलगायतको टोलीले निरीक्षण गरेर धेरै खर्च लाग्दैन भन्नुभएको छ,’ राईले शिलापत्रसँग भनिन् ।

काठमाडौं महानगरपालिको तथ्याङ्कअनुसार दैनिक ५१६ मेट्रिकटन फोहोर उत्पादन हुन्छ र यसमध्ये झण्डै ६५ देखि ७० प्रतिशत कुहिने खालका हुन्छन् ।