‘प्यान दर्ता र बैंकबाट तलब भुक्तानी गर्न थप समय चाहिन्छ’

A+ A A-

नेपाल घरेलु तथा साना उद्योग महासंघले तत्काल प्यान दर्ता गरी बैंकमार्फत तलब भुक्तानी गर्ने व्यवस्था लागू गर्ने अवस्था नरहेको भन्दै थप समय उपलब्ध गराउन आग्रह गरेको छ ।

सरकारले आर्थिक वर्ष २०७६/७७ देखि निजी क्षेत्रमा काम गर्ने सबै कर्मचारी र मजदुरलाई समेत अनिवार्य प्यान दर्ता गराई बैंकमार्फत भुक्तानी गर्नुपर्ने नियम ल्याएपछि महासंघले लघु, घरेलु तथा साना उद्योगमा तत्काल यस्तो नियम लागू गर्ने अवस्था नरहेको जनाएको हो ।

सामाजिक सुरक्षा कोषको व्यवस्था पहिले ठूला र मझौला उद्योगमा लागू गरी त्यसको व्यावहारिक अनुभवबाट मात्र क्रमशः लघु, घरेलु तथा साना उद्योगमा लागू गर्न श्रम मन्त्रालय र निजी क्षेत्रबीच सहमति भएको स्मरण गराएको छ ।

महासंघका अध्यक्ष श्यामप्रसाद गिरीले लघु, घरेलु तथा साना उद्योगमा काम गर्ने कर्मचारी र मजदुरलाई प्यान दर्ता गर्ने प्रयोजनको तयारीका लागि ६ महिना समय उपलब्ध गराउन आग्रह गरे ।

आन्तरिक ढुवानीमा गरेको कामतर्फ आर्थिक वर्ष २०७६/७७ देखि लागू गर्न खोजिएको मालवस्तु तथा ढुवानी साधनको अनुगमन प्रणाली (भीसीटीएस) र ढुवानीमा मूल्य अभिवृद्धि कर लगाउने व्यवस्थाले लघु, घरेलु तथा साना उद्योगका कच्चा पदार्थ र उत्पादनको ढुवानी ओसार र पोसारमा प्रतिकूल प्रभाव पारी त्यसको उत्पादन प्रणाली लाइनै तहसनहस पार्ने हुँदा मुलुककै आपूर्ति व्यवस्था, वैदेशिक निर्यात व्यापार र रोजगारीमा समेत नकारात्मक प्रभाव पर्नेतर्फ महासंघले सरकारको ध्यानाकर्षण गराएको छ ।

भीसीटीएसका लागि मोबाइल एप र अनलाइन पोस्टिङ गर्ने जनशक्तिलाई सक्षम बनाउन र भरपर्दो इन्टरनेट सेवा उपलब्ध गराउन समय लाग्ने हुँदा ढुवानीमा मूल्य अभिवृद्धि कर कार्यान्वयनका तयारीका लागि कम्तीमा एक वर्षको समय उपलब्ध गराउन महासंघको आग्रह छ ।

मैदा, चिनीलगायतका खाद्य पदार्थमा लगाइएको मूल्य अभिवृद्धि करले स्वदेशी खाद्य वस्तुको मूल्य वृद्धि हुन गई साधारण जनताको जनजीवनमा प्रतिकूल प्रभाव पर्ने हुँदा बाढीपहिरो र प्राकृतिक विपत्तिको यस परिस्थितिमा यसलाई स्थगित गर्न पनि महासंघले आग्रह गरेको छ ।

प्रकाशित मिति: शुक्रबार, साउन ३, २०७६ ०२:०१