गम्भीर नैतिक प्रश्न उठेपछि के अर्थमन्त्रीले राजीनामा देलान् ?

A+ A A-

अर्थमन्त्री जनार्दन शर्माको विषयमा पटक-पटक गम्भीर नैतिक प्रश्‍न उठेपछि प्रधानमन्त्री र शर्मा रहेको दल माओवादी केन्द्रलाई पनि दबाब परेको छ ।

करका दरहरू असम्बन्धित व्यक्तिहरूबाट निश्चित व्यापारीलाई पोस्ने गरी चलाइएको विषयमा संसदमासमेत गम्भीर प्रश्न उठाइएको छ । निरन्तर गम्भीर नैतिक प्रश्‍न उठ्दा पनि मन्त्री शर्मा जवाफदेही देखिएका छैनन् ।

पूर्वका उद्योगीहरूले करका दरहरू फेरबदलका विषयमा पुनर्विचार नगरे सडक आन्दोलन नै गर्ने चेतावनी दिएर फर्किएलगत्तै बजेट निर्माणको अघिल्लो दिन पूर्वनासुलाई बोलाएर अर्थमन्त्रीले विज्ञको रूपमा प्रस्तुत गरेको र दरहरू मनपरी फेरबदल गरिएको विषयमा अन्नपूर्ण पोष्टले समाचार लेखेकाे थियाे ।

यस विषयमा प्रतिपक्ष दलले संसदमार्फत अर्थमन्त्री र प्रधानमन्त्रीको समेत ध्यानाकर्षण गराएका छन् । समाचारको विषयमा अर्थमन्त्रालयले सामान्य खण्डन गरेकाे छ ।

तर याे विषयमा सांसदहरूले गम्भीर प्रश्न उठाउँदा पनि अर्थमन्त्रीको उपस्थिति नहुनुलाई अर्थपूर्ण रूपमा हेरिएको छ । यसैबीच एमालेले भने अर्थमन्त्रीको राजीनामा माग गरेको छ ।

माओवादी केन्द्रका अध्यक्ष पुष्पकमल दाहाल प्रचण्डले बारम्बार अर्थमन्त्रीको विषयमा जवाफ दिन नसक्ने भन्दै राजीनामा गर्न संकेत गरेका थिए ।

यता अर्थमन्त्रीको विषयलाई लिएर प्रधानमन्त्री शेरबहादुर देउवाको समेत ध्यानाकर्षण गराइएको छ ।

यसअघि गर्भनर हटाउने विषयमा लिएको निर्णय र अदालतको आदेशपछि अर्थमन्त्रीलाई राजीनामा दिन सरोकारवालाले सुझाव दिएका थिए ।