जिसस चुनावमा एमालेलाई भाग्यको साथ, गोला तानेर जित्याे तीन प्रमुख

A+ A A-

सत्ता गठबन्धन र पार्टी विभाजनका कारण स्थानीय तह निर्वाचनमा खुम्चिएको एमालेलाई जिल्ला समन्वय समितिको निर्वाचनमा भने भाग्यले साथ दिएको छ ।

गठबन्धनसँग बराबर मत रहेका तीन जिल्लामा एमालेका उम्मेदवार गोलाबाट प्रमुखमा निर्वाचित भएका छन् । निर्वाचनमा मत बराबर भएपछि गोला तारेर एमालेले भक्तपुर, कपिलवस्तु र रसुवा जिल्ला समन्वय समितिको प्रमुख जितेको हो ।

भक्तपुरमा एमाले र कांग्रेस-माओवादी केन्द्र गठबन्धनको तीन-तीन मत थियो । दुई मत रहेको नेपाल मजदुर किसान पार्टीसँग तालमेल गर्न दुवैले कोसिस गरेका थिए । तर, सम्भव नभएपछि भएको मतदानमा एमाले र गठबन्धनको मत बराबर भएको थियो ।

गोलाबाट विजयी टुंग्याउँदा एमालेका ईश्वर थापा निर्वाचित भएका हुन् । उपप्रमुखमा भने गोलाबाटै कांग्रेसकी सुजाते बादे श्रेष्ठ विजयी भइन् । कांग्रेसले उपप्रमुखसहित एक सदस्य जित्दा एमाले प्रमुखसहित ५ सदस्य जितेर बहुमत हासिल गरेको छ । ती सबै पदमा गोला तानिएको थियो ।

रसुवा जिल्ला समन्वय समितिमा पनि एमालेलाई भाग्यले साथ दिँदै अशोककुमार घिमिरे प्रमुख निर्वाचित भए । उपप्रमुखमा एमालेकै विजय तामाङले विजयीको गोला तानेका थिए । जिसस नेतृत्वका लागि उम्मेदवारी दिएका एमाले र गठबन्धनले ५-५ मत प्राप्त गरेपछि गोला तानेर टुंग्याइएको थियो । प्रमुख उपप्रमुखसहित एमालेका पाँच सदस्यले विजयीको गोला तानेका थिए भने कांग्रेसका ४ सदस्य पनि गोला तानेरै निर्वाचित भएका छन् ।

लुम्बिनी प्रदेशको कपिलवस्तुमा पनि एमालेका उम्मेदवार गोला तानेरै विजयी भए । १० पालिका रहेको कपिलवस्तुमा जिसस निर्वाचनमा कांग्रेस, माओवादी र जसपाको गठबन्धनको ११ मत थियो । एमालेले लोसपा र राप्रपासँग तालमेल गर्दा पनि ९ मत मात्र थियो । तर, २७ जेठमा भएको निर्वाचनमा एमालेका बाबुराम आचार्य र कांग्रेसका ज्ञानबहादुर कार्कीले १०-१० मत प्राप्त गरे । गोलाप्रथाबाट टुंगो लगाउँदा एमालेका आचार्य विजयी भएका हुन् । एमाले गठबन्धनका तर्फबाट उपप्रमुख उठेका लोसपाका रमेश कुर्मी ११ मतसहित विजयी भए ।

बराबर मत आएका ७ सदस्य पदको टुंगो पनि गोला तानेर लगाइएको थियो । सदस्यमा पनि समान १० मत आएपछि गोला तानेर विजयी घोषणा गरिएको हो । त्यसमा एमाले, जसपा र कांग्रेसका दुई, माओवादी केन्द्रका एक सदस्य निर्वाचित भएका छन् ।

प्रकाशित मिति: आइतबार, जेठ २९, २०७९ १४:५०