बजेटका कार्यक्रम सुनेर उत्साही निजीक्षेत्र करको दर हेरेपछि तर्सियो, पुनर्विचार गर्न महासंघको माग

बजेटका कार्यक्रम सुनेर उत्साही निजीक्षेत्र करको दर हेरेपछि तर्सियो, पुनर्विचार गर्न महासंघको माग

A+ A A-

बजेटका कार्यक्रम र प्राथमिकता स्वागतयोग्य रहेको भन्दै सुरुआति प्रतिक्रिया दिएका उद्योगी व्यावसायी करका दरहरू हेरेपछि भने एकपछि अर्को गर्दै विरोध जनाउन थालेका छन् ।

निजी क्षेत्रको छाता संगठन नेपाल उद्योग वाणिज्य महासंघले आर्थिक वर्ष २०७९-८० को बजेटमा भन्सार महशुल, अन्तःशुल्कलगायतका राजस्वका दरहरूमा गरिएको प्रावधानबाट स्वदेशी उद्योग व्यवसाय प्रभावित भएको भन्दै सरकारको ध्याकर्षण गराएको छ ।

महासंघले बिनापरामर्श र उद्योगी व्यवसायीको राय सुझावविपरीत एकतर्फीरूपमा बजेट र आर्थिक ऐनमा समावेश गरिएका प्रावधानले उद्योगलाई पर्न गएको समस्या तत्काल सम्बोधन गर्न माग गरेको छ । स्टिल रोलिङ मिल तथा एमएस वायर उद्योग, वनस्पति घ्यू, तेल उद्योग, स्यानेटरी प्याड उत्पादन गर्ने उद्योगहरूलगायतका उद्यम व्यवसाय बजेटमा गरिएका व्यवस्थाका कारण बन्द हुने अवस्थामा पुगेको महासंघको दाबी छ ।

'बजेट वक्तव्यमा एमएसवायर उद्योगले प्रयोग गर्ने कच्चा पदार्थ आयातमा भन्सार महसुल ५ बाट १० प्रतिशत र अन्तःशुल्क प्रतिटनमा २ हजार ५ सयबाट ४ हजार ५ सय पुर्‍याइँदा वायर स्टिल उत्पादन गर्ने उद्योगले आयातित वस्तुहरूसँग प्रतिस्पर्धा गर्न नसक्ने अवस्थामा पुगेका छन्,' महासंघले जारी गरेको विज्ञप्तिमा भनिएको छ, 'प्रशोधित पाम र पामोलिन तेल आयातमा ५ प्रतिशत भन्सार महशुल कायम गरी उक्त आयल प्रयोग गर्ने उद्योगहरूलाई सिधै आयात गर्न दिने नीतिले सञ्चालनमा रहेका वनस्पति घिउतेल उद्योगहरू गम्भिर संकटमा जाने देखिन्छ । यो, स्वदेशी उद्योगको संरक्षणका लागि कच्चा पदार्थ र तयारी वस्तुमा कम्तीमा १ तहको फरक भन्सार दर कायम गर्ने सरकारको नीतिको विपरीत पनि छ ।'

महासंघले स्यानेटरी प्याड उत्पादन गर्ने उद्योगहरूले तिर्दै आएको भन्सार महसुल, अन्तःशुल्क तथा कच्चा पदार्थ आयातमा लाग्दै आएको भन्सार महशुल यथावत राखी तयारी प्याड आयातमा लाग्ने भन्सार शुल्कमा ९० प्रतिशतसम्म छुट दिँदा स्वदेशी उद्योगको प्रतिस्पर्धात्मक क्षमतामा ह्रास आई उद्योग नै बन्द हुने भन्दै पुनर्विचार गर्न माग गरेको छ ।