सेयरधनीलाई ब्रोकरको आग्रहः लागत गणना गर्नुहुन्छ कि सय रुपैयाँ बनाइदिऊँ ?

A+ A A-

सेयर ब्रोकर एसोसिएसनले लगानीकर्तालाई आफ्नो सेयरको लागत गणना गरेर विवरण बुझाउन आग्रह गरेका छन् । सरकारले सेयरको औषत लागतका आधारमा पुँजीगत लाभ कर (सीजीटी) गणना गर्ने कानुन बनाएपछि एसोसिएसनले लगानीकर्तासँग यस्तो आग्रह गरेको हो ।

सरकारले १ साउनदेखिको सेयर कारोबारमा लगानीकर्ताको औषत लागतका आधारमा पुँजीगत लाभ कर लिने कानुनी व्यवस्था गरेको छ । सो व्यवस्था अनुसार सार्वजनिक निस्कासन (आइपीओ), थप निस्कासन (एफपीओ), हक प्रद, बोनस सेयर र लिलामीमा किनेको सेयर मूल्यलाई एकै ठाउँमा राखेर औषत निकाल्ने र सोही औसत लागतका आधारमा सेयर बेच्दा नाफा भए सो नाफाको ५ प्रतिशत पुँजीगत लाभकर लिने गरिन्छ ।

‘लगानीकर्ताले आफ्नो कारोबारको राफसाफ गर्ने राफसाफ सदस्यलाई भारित औषत गणना फाराम भरी सहिछाप गरी कारोबार भएको भोलिपल्ट कार्यालय समय (टीप्लसवान) भित्र उपलब्ध गराई दिनु हुन अनुरोध छ, अन्यथा राफसाफ प्रणालीले नै कारोबार भएको धितोपत्रको भारित औषत लागतको आधार मूल्य स्वतः अंकित मूल्यलाई कायम गरी कारोबारको राफसाफ हुने कानूनी व्यवस्था छ,’ एसोसिएसनले लगानीकर्ताको लागि जारी गरेको सार्वजनिक सुचनामा उल्लेख गरिएको छ ।

सिडिएस एण्ड क्लियरिङ्गले ३१ असारमा ब्रोकरलाई पत्राचार गर्दै भारित औषत लागतका आधारमा पुँजीगत लाभ कर गणना गर्नुपर्ने निर्देशन दिएको थियो ।

नेपाल सरकारको आर्थिक विधेयक २०७६ मार्फत् आयकर ऐन, २०५८ को दफा ९५ (क) को संसोधन मार्फत् “उपदफा (२) को खण्ड (२क) बमोजिम लाभ गणना गर्दा जुन निकायको हित निःसर्ग हुने हो त्यस्तो निकायमा सो मितिमा सो व्यक्तिको स्वामित्वमा रहेको हितको भारित औषत लागतको आधारमा गणना गर्नु पर्नेछ” भन्ने व्यवस्था छ ।