बिजुली आयातभन्दा निर्यात तेब्बर, दिनकै साढे ७ करोडको बेच्छ नेपाल

A+ A A-

नेपाली उत्पादनमध्ये निर्यातको प्रचुर सम्भावना रहेको जलविद्युत्‌को आयातको तुलनामा निर्यात दोब्बर भएको छ । अहिले नेपालले प्रतिदिन २ हजार ८६ मेगावाट घण्टा आयात गर्दा नेपालबाट ६ हजार ८ सय मेगावाट घण्टा निर्यात भएको छ ।

बुधबार रातिदेखि नेपाल विद्युत् प्राधिकरणले इन्डियन इनर्जी एक्सचेन्ज (आईआईएक्स)मा नेपालका पाँच आयोजनाको कुल ३१२ मेगावाट विद्युत् निर्यात सुरु गरेको निर्देशक सुरेशबहादुर भट्टराईले बताए ।

बुधबार रातिदेखि बिहीबार मध्यरातसम्म ६ हजार ८ सय मेगावाट घण्टा निर्यात हुने भएको छ । ११ रुपैयाँ ८८ पैसामा निर्यात गर्दा ७ करोड ४८ लाख रुपैयाँको निर्यात हुन्छ ।

एक्सचेन्ज बजारमा मूल्यमा भने उतारचढाव भइनै रहन्छ । यो मूल्य अधिक मूल्यअन्तर्गत पर्दछ । नेपालले यही समयमा भारतबाट करिब साढे २ करोड रुपैयाँबराबरको बिजुली आयात गरेको छ ।

भारतीय बजारमा गत शनिबार राति १२ बजेदेखि कालीगण्डकी जलविद्युत् आयोजनाको १४० मेगावाट, त्रिशुली र देवीघाटको ३७.७ मेगावाट आईआईएक्समा प्रतियुनिट औसत सात रुपैयाँ चार पैसा भारुमा निर्यात हुन थालेको हो ।

त्रिशुली र देवीघाट जलविद्युत् आयोजनाको बिजुली गत साता (१८ जेठ रातिदेखि) औसत ११ रुपैयाँ ६८ पैसामा पठाइएको थियो । मंगलबारबाट भने मर्स्याङ्दीको ६७ मेगावाट र बुधबार रातिदेखि मध्य मर्स्याङ्दीको ६८ मेगावाट बिजुली पनि निर्यात गर्न थालिएको भट्टराईले बताए । वर्षायाममा भारतबाट आयातभन्दा धेरै निर्यात हुने प्राधिकरणले जनाएको छ । यो वर्ष करिब १२ अर्ब रुपैयाँबराबरको बिजुली निर्यात गर्ने प्राधिकरणको लक्ष्य छ ।

प्रकाशित मिति: बिहीबार, जेठ २६, २०७९ १२:३३