विदेशबाट फर्किएका कामदारलाई पुनः एकीकरणका लागि स्वीट्जरल्यान्डको ८६ करोड १३ लाख सहयोग

विदेशबाट फर्किएका कामदारलाई पुनः एकीकरणका लागि स्वीट्जरल्यान्डको ८६ करोड १३ लाख सहयोग

A+ A A-

वैदेशिक रोजगारीबाट फर्किएका नेपालीहरूको पुनः एकीकरण परियोजनाका लागि स्वीट्जरल्यान्ड सरकारले नेपाललाई ८६ करोड १३ लाख रुपैयाँ आर्थिक सहयोग गरेको छ ।

वैदेशिक रोजगारीबाट फर्किएका श्रमिकलाई समाजमा आर्थिक, सामाजिक र राजनीतिक रूपमा पुनः एकीकरण गराउन सहयोग गर्ने उद्देश्य रहेको रिइन्ट्रिग्रेसन अफ रिटर्नी माइग्रेन्ट वर्कर रेमी परियोजनाका लागि बुधबार अर्थ मन्त्रालय र स्वीट्जरल्यान्ड सरकारबीच सम्झौतापत्रमा हस्ताक्षर भएको छ ।

सम्झौतापत्रमा नेपालको तर्फबाट अर्थ मन्त्रालयका सहसचिव तथा अन्तर्राष्ट्रिय आर्थिक समन्वय महाशाखाका प्रमुख ईश्वरीप्रसाद अर्याल र स्वीट्जरल्यान्ड सरकारको तर्फबाट काठमाडौंमा रहेको स्वीस दूतावासका चार्ज डी अफेयर्स सिल्भाना होगले हस्ताक्षर गरेका हुन् ।

रेमी परियोजना प्रदेश एक र मधेस प्रदेशका २० वटा पालिकामा लागू हुनेछ । चार वर्ष सञ्चालन हुने परियोजना आउँदो जुलाई अर्थात् १७ असारदेखि लागू हुनेछ । स्वीस सरकारमार्फत आएको रकम सरकारको खर्च प्रणालीबाट कार्यान्वयन हुने बताइएको छ ।

वैदेशिक रोजगारीबाट फर्किएका श्रमिकहरूको पुनः एकीकरणका लागि उनीहरूले विदेशमा सिकेको ज्ञान, सीप, पुँजी र अनुभवको उपयोग गर्न, श्रमिकको क्षमता अभिवृद्धि गर्न यो परियोजनाको उद्देश्य रहेको छ ।

हस्ताक्षर कार्यक्रममा बोल्दै अर्थ मन्त्रालयका सहसचिव अर्यालले विदेशबाट फर्किएका श्रमिकहरूको समाजमा पुनः स्थापना गर्न परियोजनाको कार्यान्वयन महत्त्वपूर्ण रहेको भन्दै यसले श्रमिकले विदेशमा रहँदा सिकेको ज्ञान, सीप, अनुभव र पुँजीलाई नेपालको सामाजिक तथा आर्थिक विकासमा उपयोग गर्न सहयोग पुग्ने बताए ।

यस्तै, स्वीस दूतावासका होगले आप्रवासी श्रमिकहरूलाई फाइदा पुर्‍याउने नीति र योजनाहरू कार्यान्वयन गर्न स्वीट्जरल्यान्ड नेपाललाई सहयोग गर्न प्रतिबद्ध रहेको बताए । रेमी परियोजनाले विभिन्न क्षेत्रका सरकारी, निजीक्षेत्र, सञ्जाल र आप्रवासी कामदारहरूसँग मिलेर विदेशबाट फर्केका श्रमिकहरूको पुनः एकीकरणको कामका लागि सहयोग हुनेछ ।

प्रकाशित मिति: बुधबार, जेठ २५, २०७९ १९:२८