नौ कारोबार दिनपछि बढ्यो नेप्से, टर्निङ प्वाइन्ट बन्ला आजको बजार ?

A+ A A-

पछिल्लो नौ कारोबारयता निरन्तर घट्दै आएको शेयरबजारले आज विश्राम लिएको छ । अर्थात् आज बुधबार एकैदिन नेप्से सूचक ६०.२२ ले बढेर १०८० मा बन्द भएको हो । ९० दिनअगाडि २९ सय ७२ सम्म पुगेर फर्किएको नेप्से त्यसयता ठूलो अंकले घट्ने र सानो अंकले मात्रै बढ्ने गर्दै आएको थियो । तर, पछिल्लो ७ कारोबार दिनमा भने बजार दोहोरो अंकले ओरालो झर्ने क्रममा रहँदा आजको बजारले त्यसलाई ब्रेक गर्न पुगेको छ ।

आज नेप्से बढेसँगै कारोबारमा आएका २ सय ३१ कम्पनीको ५० लाख कित्ता शेयर १ अर्ब ६४ करोड रुपैयाँमा खरिदबिक्री भएको छ भने सामुदायिक लघुवित्त र उपकार लघुवित्तको शेयरमूल्यमा सकारात्मक सर्किट लागेको छ । अन्य चार कम्पनीको शेयरमूल्य पनि सर्किट लेबलमै बढेका छन् ।

धेरै दिनपछि बुधबार बजार हरियो बनेको छ । कारोबारमा आएका दुईवटा कम्पनीबाहेकका सबै कम्पनीको शेयरमूल्य बढ्न पुगेको हो । घट्नेमा भने हिमालयन बैंक र माउन्टेन हाइड्रो छन् । यी दुवैको न्यून प्रतिशतले मात्रै शेयरमूल्य घटेको छ ।

काराबोर सुरु भएबाटै उकालो लाग्न सुरु गरेको नेप्सेले त्यसपछि भने निरन्तर अर्थ मन्त्रालय तथा धितोपत्र बोर्डबाटै सकारात्मक सूचनाहरू पाउँदा थप बढ्न सहयोग मिलेको थियो । धितोपत्र बोर्डको ३०औँ वार्षिक सभा सम्पन्न भइरहँदा अर्थमन्त्रीले आगामी मौद्रिक नीतिमा लगानीकर्ताको माग सम्बोधन गर्नुपर्ने, बोर्डका अध्यक्ष हमालले शेयरबजारसम्बन्धी पुरानो नीति पुनरावलोकनका साथै नयाँ नीतिगत व्यवस्थाहरू गर्नुपर्नेजस्ता धारणा राखेका थिए ।

योसँगै लगानीकर्ताले घट्दो बजारलाई लिएर प्रधानमन्त्रीदेखि अर्थमन्त्री र गभर्नरसम्मै गुनासा पोख्न थालेपछि सरकारको ध्यानकर्षण भएको थियो । जसअनुरुप अर्थ मन्त्रालयबाटै नेपाल राष्ट्र बैंक, धितोपत्र बोर्डका प्रतिनिधिसहितको अध्ययन समिति गठन भयो । यसले पनि लगानीकर्ताहरू बजारप्रति थप उत्साहित बन्न पुगे । जसले गर्दा आजको बजारले अधिकतम विन्दु २०९६ अंक छुन पुग्यो । यद्यपि अन्तिम समयमा भने २०८० को अंकमा बजार बन्द भयो ।

धेरै दिनपछि बजारमा उछाल आएपछि यतिबेला लगानीकर्ताहरू शेयरबजारको टर्निङ प्वाइन्टको रूपमा आजको बजार रहने बताउँछन् । ‘लगानीकर्ता सुरेश रोक्का सरकार शेयरबजारप्रति सकारात्मक हुनुले शेयरबजारमैत्री नीतिगत व्यवस्था हुन सक्ने आशा गरेका छौँ । यसले पनि बेचेर निस्कौँ भन्ने लगानीकर्ताले होल्ड गर्न र नयाँ लगानीकर्ताले किन्न उक्साएको देखिन्छ ।’

प्रकाशित मिति: बुधबार, जेठ २५, २०७९ १५:३२