विद्युतीय सवारीसाधनहरूमा राजस्व वृद्धि गरेको सम्बन्धमा नाडाको आपत्ति

A+ A A-

सरकारले विद्युतीय सवारीसाधनहरूमा भन्सार तथा अन्तःशुल्क महसुल बढाएकोमा नाडा अटोमोबाइल एसोसिएसन अफ नेपाल (नाडा)ले आपत्ति जनाएको छ ।

विद्युतीय सवारीसाधनहरूको प्रयोगलाई प्रोत्साहनको सट्टा दुरुत्साहित गरिएको नाडाको आरोप छ ।

आगामी आर्थिक वर्षको बजेटले १ सय किलोवाटभन्दा बढी क्षमताको विद्युतीय सवारीसाधनको भन्सार तथा अन्तःशुल्क महसुलमा अत्यधिक वृद्धि गरेको नाडाका अध्यक्ष ध्रुव थापाले बताए ।

‘नेपालको भौगोलिक अवस्थाअनुसार २०० किलोवाट क्षमताका विद्युतीय सवारीसाधनहरूलाई समेत पुरानै व्यवस्थाअनुसार भन्सार तथा अन्तःशुल्क महसुल कायम गरिदिने व्यवस्थाका लागि सरकारसँग अनुरोध गर्दछौँ,’ उनले भने ।

बजेटले नेपालमा उत्पादित विद्युत्‌लाई पेट्रोलियम पदार्थको विकल्पको रूपमा प्रयोग गरी छिमेकी मुलुकसँगको व्यापारघाटालाई कम गर्ने, नेपालको आफ्नै उत्पादन जलविद्युत्‌लाई विद्युतीय सवारी साधनहरूलगायतका विभिन्न वस्तुहरूमा प्रयोग गरी विदेशी मुद्राको बचत गर्ने माध्यमको रूपमा लिएको स्पष्ट देखिए पनि अर्कोतर्फ सोही बजेटमा १ सय किलोवाटभन्दा बढी क्षमताका विद्युतीय सवारी साधनहरूमा भन्सार तथा अन्तःशुल्क महसुलमा बढाउनु न्यायोचित नभएको नाडाले जनाएको छ ।

त्यसैगरी, सो बजेटमा सरकारले २०० सीसीसम्मका मोटरसाइकललाई सर्वसाधरण जनताले प्रयोग गर्ने सवारीसाधनको रूपमा लिएको देखिए पनि २०० सीसीभन्दा माथिका मोटरसाइकलमा भने अन्तःशुल्क तथा भन्सार महसुलमा अत्यधिक वृद्धि गरेबाट त्यस किसिमका मोटरसाइकलको बिक्रीवितरण गर्दै आएका अटोमोबाइल व्यवसायीहरूले आफ्नो व्यवसाय नै बन्द गर्नुपर्ने अवस्था उत्पन्न भएकाले यसतर्फ समेत पुनर्विचार गर्नुपर्ने थापाले बताए ।

त्यस्तै, निजी प्रयोजनका सवारीसाधनहरूको आयातले विदेशी मुद्रा सञ्चिति र शोधनान्तर स्थितिमा खासै असर पार्ने नदेखिएकाले आयात प्रतिबन्ध सहज गरिदिनुपर्ने नाडाको अपिल छ ।

प्रकाशित मिति: मंगलबार, जेठ २४, २०७९ १८:४१