गोप्य रुपमा नेपाल आएको मदुरोको टोलीले के के गर्‍यो ?

A+ A A-

भेनेजुएलाका राष्ट्रपति निकोलस माडुरोका छोरा निकोलस माडुरो गुयरासहितको टोली चार दिने नेपाल भ्रमण सकेर चीन गएको छ । भेनेजएलाको युवा संगठनकी महासचिव रोडेबेक्स पोलिओ नेतृत्वको टोली चिनियाँ राजनीति र त्यहाँको जनजीवनबारे बुझ्न त्यसतर्फ गएको हो ।

भेनेजुएलाको १३ सदस्यीय टोलीलाई सत्तारुढ नेपाल कम्युनिस्ट पार्टी (नेकपा)को भ्रातृ संगठन युवा संघले नेपाल बोलाएको थियो ।

भेनेजुएलको युवा संगठन र नेपालको युवा संघ विश्व प्रजातान्त्रिक युवाहरुको अन्तर्राष्ट्रिय संगठनका सदस्य हुन् । यो संगठन विश्वका कम्युनिस्ट र समाजवादी पार्टीका भ्रातृ संगठनहरु आबद्ध अन्तर्राष्ट्रिय संगठन हो ।

यही संगठनमा जोडिएका यी दुई देशका युवाको संगठनले एक आपसमा भेटघाट गर्ने र दुई देशबीचको अनुभव आदानप्रदान गर्ने गरेका छन् । युवा संघ नेपालका विदेश विभाग प्रमुख सन्तोष रावल भन्छन्, ‘हामी विश्व प्रजातान्त्रिक युवा संघका सदस्य हौं । दुई देशबीचको अनुभव आदानप्रदान गर्न बोलाएका हौं ।’

अहिले नेपाल आएको भेनेजुएलाको टोलीमा राष्ट्रपति निकोलस माडुरोका छोरा निकोलस मडुरो गुयरा पनि छन् । निकोलस माडुरो गुयरा युवा संगठनको सचिव हुन् । उनी राष्ट्रपति कार्यालयको प्रशासन हेर्ने गर्छन् ।

उनी नेपाल कम्युनिस्ट पार्टी (नेकपा)को भ्रातृ संगठनको निम्तोमा २८ असारमा नेपाल आएका हुन् । यो टिमलाई नेपाल निम्त्याइए पनि सार्वजनिक नगर्ने कुरा नेतृत्वदेखि आयोजक युवा संगठनबीच सहमति भएको युवा संगठनका एक सदस्यले बताए ।

उनले भने, ‘अमेरिका र भेनेजुएलाबीच पछिल्लो समयमा आमनेसामनेकाे लडाइँ छ । त्यसकारण, नेकपाको नेतृत्व र युवाले सीमित व्यक्तिसँग भेटघाट गराए पनि मिडियामा नल्याउने भनेका थिए ।

तर, २९ गते दिउँसो याक एन्ड यति होटलमा सत्तारुढ नेकपाको विद्यार्थी संगठनले दिउँसोको खानापछि भेटघाट राखेको थियो । त्यही भेटघाट कार्यक्रमको विद्यार्थी नेता सुरेन्द्र बस्नेत र पञ्चासिंहले फेसबुक लाइभ गरे । लाइभ सकिएको केही समयपछि दुवैलाई त्यो भिडियो हटाउन नेतृत्वबाट निर्देशन आयो । त्यसलगत्तै सिंहले तत्काल हटाइन् भने बस्नेतले करिब ३ घण्टापछि हटाए ।

गत वैशाखकाे पहिलो साता नेपालबाट तीन सदस्यीय युवा र विद्यार्थीको टोली भेनेजुएला गएको थियो । भेनेजुएलामा विश्व प्रजातान्त्रिक युवा संघको बैठकमा भाग लिन ५० देशका युवा संगठनका प्रतिनिधि सहभागी थिए ।

उनले भने, ‘मलगायत अन्य दुई जना विद्यार्थी साथी भेनेजुएला गएका हौं । हामी त्यहाँ गएपछि उनीहरुलाई पनि हामीले नेपाल आउन निम्तो दिएका थियौं । त्यही निम्तो मान्न उनीहरु नेपाल आएका हुन् ।’

विश्व प्रजातान्त्रिक युवा संघको नेपाल सन् २००३ र २००७ मा उपाध्यक्ष थियो । सन् २००३ मा उदयराज पाण्डे र २००६ मा योगेन्द्र शाही उपाध्यक्ष भएका थिए ।

सन् २०१५ देखि नेपाल एसिया रिजनल कोर्डिनेटर छ । कोर्डिनेटमा सुन्दर भुसाल छन् । दक्षिण अमेरिकी देश भेनेजुएला अहिले विश्वमा अमेरिकासँगको द्वन्द्वका कारण चर्चामा छ । यो देशमा अहिले समाजवादी शासन छ ।

यो शासन पहिलोपटक ह्युगो चाभेजले स्थापना गरेका हुन् । चाभेजले चुनाव जितेर समाजवादी शासन सञ्चालन गर्दा पनि अमेरिकाले मन पराएको थिएन । चाभेज सत्तामा आउँदा भेनेजुएलाको तेलमा अमेरिकी दबदबा थियो ।

तेल उत्पादन गर्ने देशमा भेनेजुएला विश्वमा छैटाैं नम्बरमा पर्छ । त्यहाँको तेल कम्पनीमा अमेरिकाको एकलौटी दबदबा थियो । चाभेज सत्तामा आएपछि उनले एक दिनमा नै अमेरिकाका ६० तेल कम्पनीलाई देश निकाला गरेका थिए । र, ती ६० कम्पनीलाई राष्ट्रियकरण गरेका थिए । त्यही विषयबाट अमेरिका झनै चिढिएको हो ।

क्यान्सरका कारण चाभेजको निधन भएपछि निकोलस माडुरोले सत्ता सम्हालेका थिए । चाभेजले आफू बिरामी भएपछि माडुरोलाई उत्तराधिकारी बनाएका थिए ।

चाभेज सन् १९९९ देखि २०१३ सम्म सत्तामा रहेका थिए । उनको मृत्यु पछि भेनेजुएलाको बागडोर माडुरोले सम्हालेका थिए ।

अहिले पुनः अमेरिका र भेनेजुएलाबीच तनाव सिर्जना भएको छ । त्यही तनाव सिर्जना भएपछि नेपाल कम्युनिस्ट पार्टीका अध्यक्ष प्रचण्डले एक विज्ञप्ति जारी गरेका थिए । जसमा अमेरिकाको विरोध र भेनेजुएलाको पक्ष लिएको थियो । त्यो विज्ञप्तिपछि नेपालमा पनि राजनीतिक र कूटनीतिक रुपमा बहस सुरु भएको थियो ।

अहिले पुनः माडुरोको छोरालगायत भनेजुएलाका दुई मन्त्री नेपाल आएका छन् र यी दुवै देशको चर्चा भएको छ । अहिले भेनेजुएलाका युवा र मन्त्री नेपालमा छन् । उनीहरु युवा संघको निम्तो मान्न नेपाल आएका हुन् ।

माडुरोका छोरासँग युवा संगठनका महासचिव र दुई मन्त्री पनि आएका छन् । याे टाेलीमा १५ जना छन् ।

तर, यो १५ सदस्य टोली नेपाल आउनुपहिले भेनेजुएलाबाट दुई जना सुरक्षा अधिकारी नेपाल आएको आयोजक बताउँछन् । तीन दुई जना सुरक्षा अधिकारीले होटल समिटबाट भेनेजुएलाको सुरक्षा अधिकारीलाई फेसबुक लाइभ गरेकाे एक युवा संघ नेपालका सदस्यले बताए ।

दोस्रो दिन माडुरोका छोरालगायतका अन्य सदस्य नेपाल आएका थिए । उनीहरू कसैले पनि नेपालको भीआईपी कोठा प्रयोग गरेका थिएनन् । सामान्य मानिस आउने बाटो हुँदै होटल पुगेका थिए । उनीहरू नक्सालमा रहेको होटल मेरिडयनमा बसेका थिए ।

त्यही दिन अथवा २७ गते भारतमा रहेका भेनेजुएलाका राजदूत नेपाल आउनुपर्ने थियो । तर, नेपालको एयरपोर्टमा यति एरलाइन्सको जहाज धावनमार्गबाट चिप्लिँदा एयरपोर्टमा आवागमन अवरोध भएको थियो । त्यसकारण, राजदूत दोस्रो दिन नेपाल आए ।

माडुरो गुयरा नेपाल आएको दुई दिनसम्म कसैले पनि थाहा पाएका थिएनन् । सीमित मानिससँगको भेटघाटमा व्यस्त थियो, भेनेजुएली टिम । २९ गते नेकपाका युवा विद्यार्थीले भेटघाट गरे ।

यसको प्रमुख अतिथि थिए नेकपाका सचिवालय सदस्य तथा पूर्वप्रधानमन्त्री झलनाथ खनाल । त्यो दिन बिहान भएको कार्यक्रममा पनि बाहिरका मानिसले केही थाहा पाएका थिएनन् ।

दिउँसो नेपकाका विद्यार्थीसँगको कार्यक्रम थियो । त्यो कार्यक्रममा नेताहरु नहुँदा नेपाली विद्यार्थी नेताहरुले उनले बोलेको फेसबुक लाइभ गरे । त्यसबाट चर्चा भयो, माडुरो गुएराको नेपाल भ्रमण ।

जब कि, माडुरो गुएरा नेपाल आएको कुरा कसैलाई पनि नभन्ने र मिडियामा नल्याउने आयोजक र त्यसको माउपार्टीबीच कुरा भएको थियो । तर, विद्यार्थी नेताहरुले सस्तो लोकप्रियताका लागि उनको सुरक्षा संवेदशीलतालाई ध्यानमा नराखेको अहिले आयोजकहरुले नै बताउन थालेका छन् ।

आइतबार दिउँसो भेनेजुएलाको टिम नेकपाका नेता वामदेव गौतमलाई भेट्न गौतम निवास भैंसेपाटी पुगेको थियो । भैंसेपाटीमा गौतम र भेनेजुएली युवाको टिमबीच करिब करिब २ घण्टा गोप्य भेटवार्ता भएको थियो ।

त्यही साँझ युवा संघले भोजन गृहमा रातिको खाना खुवायो । सो कार्यक्रममा पुनः भिडियो खिचियो र सामाजिक सञ्जालमा हालियो । यसबाट नेताहरु झन् चिन्तित भएका थिए ।

माडुरोका छोरा अहिले अमेरिकाको निगरानीमा रहेका भएका व्यक्ति हुन् । तर, नेपाली विद्यार्थीले भने उनको सुरक्षा संवेदनालाई कति पनि ख्याल गरेनन् ।

३० असारमा यो टिमले नेकपाका अध्यक्ष प्रचण्डलाई उनको निवास खुमलटारमा भेटेका थिए । प्रचण्डले उनलाई अहिले पनि नेपाल भेनेजुएलाको पक्षमा रहेको बताएको एक सहभागीले बताए ।

प्रचण्डको भनाइ उदृत गर्दै ती सदस्यले भने, ‘हिजो पनि हामी भेनेजुएलाको पक्षमा थियौं, आज पनि अडिग छौं । भेनेजुएलाका राष्ट्रपतिलाई नेपाल भ्रमण गराउनु पर्‍यो र म पनि बोलाए आउँछु ।’

३० असारमै भेनेजुएलाका युवाको टिमले चन्द्रागिरी घुमेमा थिए । ३१ गते राजधानीका धार्मिक स्थानहरुको भ्रमण गरे र राति ९ बजे भेनेजुएलाको टोली चीन प्रस्थान गर्‍यो । उनीहरु चीन हुँदै उत्तरकोरिया जानेछन् । उत्तर कोरियाबाट पुनः चीन आएर भेनेजुएला फर्कनेछन् ।

अमेरिकासँग प्रत्यक्ष रुपमा लडिरहेको भेनेजुएलाका युवाहरु नेपाल आउँदा पनि भियतनाम हुँदै आएको थियो । अहिले भेनेजुएलाको युवा संगठनले विश्वभर भएका कम्युनिस्ट सरकार भएका देशमा भाइचारा निमार्ण गर्न र अनुभव आदानप्रदान गर्दै आएको छ ।

प्रकाशित मिति: बुधबार, साउन १, २०७६ २३:४३