यातायात कार्यालयहरूलाई 'तह लगाउन' बाध्यकारी बनाइएको इम्बोस्ड नम्बर प्लेट

A+ A A-

यातायात व्यवस्था विभागले शुक्रबार असारभित्रमा तोकिएका सबै सवारी साधनमा इम्बोस्ड प्लेटको जडान गराउन बाग्मती र गण्डकी प्रदेशका यातायात कार्यालयलाई निर्देशन दियो ।

गत कात्तिक २२ को नेपाल राजपत्रमा सूचना प्रकाशित सुचनाअनुसार राजधानीको एकान्तकुना र गुर्जुधार तथा कास्कीको पोखरास्थित यातायात कार्यालयमा आवश्यक पूर्वाधारसमेत तयार गरेकाले इम्बोस्ड नम्बर प्लेट बाध्यकारी बनाइएको विभागको भनाइ छ ।

यो निणर्य कार्यान्वयन नभए साउन १ गते पश्चात ट्राफिक प्रहरीले सडक अनुगमन गर्ने र यातायात व्यवस्था ऐन २०४९ अनुसार कारवाही गरिने विभागले चेतावनी दिएको छ ।

राजपत्रअनुसार १ मंसिर २०७८ बाट बागमती, गण्डकी, लुम्बिनी, कर्णाली र सुदूरपश्चिम प्रदेशमा नयाँ दर्ता हुने सवारीमा अनिवार्य इम्बोस्ड नम्बर प्लेट जडान हुनुपर्ने, फागुन १ देखि सवारीसाधन नामसारी गर्दा, १ जेठ २०७९ देखि ब्लुबुक नवीकरण गर्दा पनि इम्बोस्ड नम्बर प्लेट जोड्नुपर्ने व्यवस्था भएको थियो ।

त्यस्तै सेवाग्राहीले स्वेच्छिक रुपमा पनि इबोस्ड नम्बर प्लेट राख्न पाउने व्यवस्था छ । यातायात व्यवस्था कार्यालयहरू र अन्य सेवाग्रहीहरू हकमा भने उदाशिन देखिएकोले सूचना नै जारी गरेर बाध्यात्मक स्थिति सिर्जना गरिएको यातायात व्यवस्था विभागका एक उच्च अधिकारिले बताए ।

‘हामीले नम्बर प्लेट र कर्मचारी पठाइसकेका छौं । सिस्टम पनि अपडेट गरिदिएका छौं । उनीहरूले हामीले पठाएको कर्मचारीलाई अरु काममा लगाएर अन्य सेवाग्राहीलाई बोलाएकै छैनन्,’ उनले भने ।

यातायात कार्यालयहरूले क्षमता हुदाँहुदैँ पनि ५ महिनाको अवधीमा २० हजार सवारी साधनमा मात्र नम्बर प्लेट जडान गरेकाले तह लगाउन इम्बोस्ड नम्बर प्लेट बाध्यकारी बनाइएको ती अधिकारीले बताए । हाल नेपालमा ५० लाखको हाराहारीमा सवारी साधन दर्ता छन् ।

यातायात कार्यालयहरू प्रदेश अन्तरर्गत गएदेखि नै विभाग र कार्यालयबीच टक्राव चल्दै आइरहेको छ । विभागलाई चाहिने सूचनासमेत कार्यालयले उपलब्ध नगराएको विभागको आरोप छ भने अनावश्यक रुपमा विभागले प्रदेश कार्यालयहरूमाथि हस्तक्षेप गरेको कार्यालयहरूको गुनासो छ ।