वातावरण संरक्षणमा प्रतिबद्ध छौँ : खुकुरी रम

A+ A A-

दि नेपाल डिस्टिलरिज प्रालिले कम्पनी वातावरण संरक्षणमा प्रतिबद्ध रहेको बताएको छ । ‘विश्व वातावरण दिवस २०२२’ को अवसरमा आइतबार एक विज्ञप्ति जारी गर्दै खुकुरी रम उत्पादक कम्पनीले यस्तो बताएको हो ।

‘हाम्रा उत्पादन प्रक्रियाका क्रममा निस्किने फोहोर व्यवस्थापन गर्न हामी ९८ प्रतिशत सफल भइसकेका छौँ । तीन वर्षभित्र यो प्रयासलाई शतप्रतिशत पुर्‍याउने लक्ष्य लिएका छौँ,’ महाप्रबन्धक सुभास लामिछानेद्वारा जारी विज्ञप्तिमा उल्लेख छ, ‘सन् २०३२ सम्ममा शतप्रतिशत दिगो प्याकेजिङलाई कार्यान्वयनमा ल्याइसक्नेछौँ । अहिले पनि सकेसम्म वातावरणमा हुन सक्ने नकारात्मक प्रभावलाई कम गर्न निरन्तर हाम्रा सप्लायर्स र विज्ञहरूसँग काम गरिरहेका छौँ ।’

कम्पनीले रमका बोतलहरू पुनः प्रयोग गर्ने प्रतिबद्धता जनाउँदै भनेको छ, ‘हाल हाम्रा उत्पादनमा प्रयोग हुने बोतलहरू संकलन गर्ने इकोसिस्टमको विकास गरिरहेका छौँ । अत्याधुनिक प्रविधिको सहयोगले बोतलहरू सफा गरी पुनः प्रयोग गर्ने थिति बसाल्ने काममा समेत हामी अग्रसर छौँ । हाल नेपालमा यो अभ्यास धेरैजसो बियर उद्योगहरूले गरिरहेका छन् ।’

कम्पनीले ग्रीन इनर्जीमा पनि काम गरिरहेको जनाएको छ । तीन वर्षभित्रमा ग्रीन इनर्जीको अवधारणालाई कार्यान्वयनको तहमा पुर्‍याउने कम्पनीको दाबी छ ।

‘एनडीपीएलले विगत दुई वर्षदेखि नेपाली सेनासँगको सहकार्यमा हिमाल सरसफाइमा काम गरिरहेको छ । आगामी दिनमा समेत यो सहकार्य जारी राख्ने प्रतिबद्धता गर्दछौँ,’ विज्ञप्तिमा भनिएको छ ।