'व्यापारका कारण नेपाली गरिबीकाे रेखाबाट माथि उठे, धनी हुन कारोबार बढ्नुपर्छ'

'व्यापारका कारण नेपाली गरिबीकाे रेखाबाट माथि उठे, धनी हुन कारोबार बढ्नुपर्छ'

A+ A A-

विज्ञ तथा सरोकारवालाहरूले व्यापार बढेकै कारण नेपाली गरिबीको रेखाबाट माथि उठाउन सहयोग गरेको र थप धनी हुन कारोबार बढ्नुपर्ने बताएका छन् ।

राजधानीमा शुक्रबार आयाेजित डिजिटल इकोनोमिक कन्केलभ अन्तर्गत 'नेपाल सानो बजार कि असीमित सम्भावना' विषयक छलफलमा उनीहरूले संसारका जुनसुकै देश पनि व्यापार बढेकै कारण धनी भएको बताए ।

'संसार परिवर्तन गराएकै व्यापारले हो, कारोबार बढाउनेहरू धनी भए, व्यापारले नै धनी गराएको हुन्छ' विश्‍वबजारमा नेपाली उत्पादन पठाउने कम्पनी शेर्पा एडभेन्चर गियरका पूर्वकार्यकारी अधिकृत तथा सफल पार्टनर्सका संस्थापक आशुतोष तिवारीले भने ।

उनले अहिलेको दुनियामा सबै कुरा एकै ठाउँमा वा एकै दशले उत्पादन गरेर आत्मनिर्भर हुन्छु भन्ने सम्भव नभएको बताए । कुन बस्तुको उत्पादन विश्‍वबजारमा प्रतिस्पर्धी गराउन सकिन्छ भन्ने आधारमा उत्पादन वृद्धि गर्नुपर्ने तर्क उनको छ । उनले सरकारको ध्यान प्रतिव्यक्ति आम्दानी बढाउनेतर्फ हुनुपर्ने बताए ।

नेपाल पूर्वधार विकास बै‌ंकका प्रमुख कार्यकारी अधिकृत रामकृष्ण खतिवडाले नेपालका लागि डिजिटल इकोनोमी उपयुक्त हुने बताए । उनले पनि जहाँ बढी प्रतिस्पर्धी बन्न सकिन्छ त्यहाँ नै जोड दिनुपर्ने बताउँदै नेपाल जस्तै मुलुकहरूले डिजिटल इकोनोमीकै कारण फड्को मारेको भन्दै नेपालका लागि पनि उपयुक्त हुने बताए ।

'पाकिस्तानमा धेरै समस्या रहेर पनि त्यहाँको अर्थतन्त्रमा डिजिटल इकोनोमीको योगदान बढी भएको कारण खस्कन पाएको छैन, नेपालले पनि डिजिटल इकोनोमिक क्षेत्रमा धेरै काम गर्न सक्छ, त्यसका लागि आवश्‍यक पर्ने पूर्वधार विकासको लगानीमा निफ्रा सहयोगी बन्छ', खतिवडाले भने ।

अर्थविद् श्रीबाबा खनालले डिजिटल इकोनोमीका लागि पूर्वधार बन्दै गरेको तर्क गर्दै नेपालको अर्थतन्त्रको बढाउनुपर्ने बताइन् । 'म अमेरिका बसेर आएको मान्छे हुँ, डिजिटल भुक्तानी तथा कारोबार त्यहाँ जस्तै यहाँ पनि धेरै पूर्वधार विकास हुँदै गएको पाएँ तर, सबैभन्दा पहिले कारोबार बढ्नुपर्‍यो त्यसका लागि इकोनोमी नै बढ्न जरुरी छ', उनले भनिन् ।

किरण सुजकी कार्यकारी निर्देशक विदुषी राणाले रेमिट्यान्स र व्यापारको भरमा देशको अर्थतन्त्र चलेकै कारण अपेक्षित औद्योगिक विकास हुन नहसकेको बताइन् ।