हलो बोकेर मल माग्न सडकमा ओर्लिए किसान

तस्वीर: सुशील श्रेष्ठ/शिलापत्र

A+ A A-

हलो बोकेर मल माग्न किसानहरू सडकमा ओर्लिएका छन् । मल नपाएको गुनासो बोकेर भक्तपुर, काठमाडौंको टोखालगायतका क्षेत्रबाट किसानहरू रत्नपार्क आएर विरोध प्रदर्शन गरेका हुन् । नेपाल मजदुर किसान पार्टीको नेतृत्वमा शुक्रबार किसानहरूले प्रदर्शन गरेका हुन् । विरोध प्रदर्शनमा उत्रिएका किसानहरू कसैको हातमा झण्डा थियो त कसैको हातमा प्लेकार्ड ।

टोखाका विष्णु श्रेष्ठ हलो नै बोकेर आन्दोलनमा आइपुगे । ‘हलो देखेर कसैले हामीलाई राप्रपा त भन्ने होइन ?’ विरोध जुलुसमा हलो जोडजाड पार्दै गरेका उनले ‘हाँसो’ गरे । ‘हामी किसान हौँ । हामी नेपाल मजदुर किसान पार्टीबाट मल माग्न आएका हौँ’, उनले भिडमा स्पष्टीकरण दिए ।

मल नभएकै कारण श्रेष्ठको सात रोपनी खेतमा राम्ररी उब्जनी हुन पाएको छैन । ‘बारीभरि मकै छन् तर मल नभएर पहेँलो भइसके । यसरी त मकैमा घोगा नै नलाग्ने भयो’, उनले भने ।

मल नभएर सबै मकै पहेँलो भएपछि श्रेष्ठ सहकारी पनि धाएका थिए । तर, अनुदानमा पाउनुपर्ने मल सहकारीले पनि नदिएपछि उनी आन्दोलन गर्न बाध्य भएको बताउँछन् ।

श्रेष्ठजस्तै भक्तपुरबाट ७१ वर्षीय तीर्थबहादुर राय पनि आन्दोलनमा झण्डा लिएर बसेका छन् । ‘किसानले मल कहिले पाउने ?’ आफूले लगाएको लुगामै उनले प्लेकार्ड टाँसेका छन् । असार आउन ११ दिनमात्रै बाँकी हुँदा बीउ र मल नपाएर खेती गर्न पाएको छैन । सडकबाट भन्यो भने सरकारले पनि सुन्छ कि ? उनले भने । ४ रोपनी खेतमा मौसमी खेती गर्दै आएका राय धानको बीउलाई मल हाल्न नपाएको गुनासो गर्छन् । ‘एक बोरा मल भए पुग्थ्यो,’ उनी भन्छन् ।

त्यसो त चाँगुनारायण–८ मा वडावासीले ६०० बोरा मलबराबरको रकम सहकारीमा जम्मा गरेका छन् । तर, तीन महिना भयो किसानले मल पाएका छैनन् । कृषिप्रधान देश नेपालमा किसानहरूलाई मलको अभाव हुनु लज्जास्पद भएको नेमकिपाका प्रेम सुवालले बताए । विरोध जुलुसमा ‘रासायनिक मलको व्यवस्था गर’, ‘किसानले मल कहिले पाउने?’, ‘मलमा कहिलसम्म झमेला ?’ लगायतका नारा लेखिएका प्लेकार्ड बोकेर किसानहरू विरोधमा उत्रिएका हुन् ।