मिरुनासँग माफी मागेका फुर्पाले बोली बदले: 'नगरेको गल्ती स्वीकारेँ' (भिडियो)

A+ A A-

‘कबड्डी-४’ फिल्मकी नायिका मिरुना मगरमाथि दुर्व्यवहार गरेको आरोप लागेका फुर्पा तामाङले आफूले गल्ती नगरेको दाबी गरेका छन् ।

एक भिडियो कुराकानीमा फुर्पाले आफूले नायिका मगरमाथि कुनै दुर्व्यवहार नगरेको दाबी गरेका हुन् । फिल्म हलमा आफूमाथि दुर्व्यवहार गरेको आरोप लगाउँदै मिरुनाले फुर्पालाई थप्पड हानेर माफी माग्न लगाएकी थिइन् । प्रहरीमा उजुरी दर्ता गरेपछि एक दिन हिरासतमा बसेर तीन हजार धरौटीमा छुटेका फुर्पासँग १७ जेठमा मिरुनाले मिलापत्र गरेकी थिइन् ।

तर, दुर्व्यवहारको आरोप लागेका फुर्पाले मिरुनालाई जोगाउन मिलापत्रमा आफूले गल्ती गरेको कुरा लेखिएको बताएका छन् । एक भिडियो कुराकानीमा उनले फिल्म हलमा आफूले मिरुनामाथि दुर्व्यवहार नगरेको दाबी गरेका छन् ।

फिल्म हेरेर निस्किने क्रममा ‘सेलिब्रेटी’ आएको भनेपछि आफू त्यतैतिर गएको र मिरुनासँग सेल्फी पनि खिचेको उनले दाबी गरेका छन् । भिडियो कुराकानीमा भनेका छन्, ‘एकदम भिड थियो । मलाई मनदेखि फोटो खिच्न मन लाग्यो । सेलिब्रेटीसँग फोटो खिच्न कहिलेकाहीँ मात्र पाउँछ भन्ने लाग्यो अनि जाँदा त्यो हिरोइन भेटेपछि फोटो पनि खिचेँ ।’

सेल्फी खिचेर फर्किने क्रममा भिडमा ठेलमठेल भएपछि धक्का लाग्ने बित्तिकै मिरुनाले आफूलाई थप्पड हानेको उनले दाबी गरेका छन् । उनले भनेका छन्, ‘सेल्फी खिचिसकेपछि म यस्तो फर्केको थिएँ, मान्छेको धक्का लागे जस्तो भएपछि उहाँले एक झापड हान्यो । सरी माग भन्यो अनि सरी मागेँ ।’

भिडसँग डराएर आफूले माफी मागेको उनले भिडियोमा दाबी गरेका छन् । भिडमा ठेलमठेल भएर नायिकासँग ठोक्किएका कारण आफूले माफी मागेको पनि उनले दाबी गरेका छन् । उनी भन्छन्, ‘मैले सरी किन मागेँ भने मान्छेलाई लागेको थियो । मलाई एकदम डर लाग्यो ।’

माफी मागेर लिफ्ट चढेर ओर्लिन लागेपछि एक जना मान्छे आएर आफूलाई फेरि नायिकाको अगाडि उभ्याएको उनले दाबी गरेका छन् । ‘साथीहरूले जाउँ-जाउँ भनेर जान लागेको थियो, लिफ्टबाट एउटा मान्छे कुदेर आयो, एकदम लाज लागेको थियो, त्यो मान्छेले समातेर माथि लिएर गयो अनि पुलिस बोलायो, पुलिसले आएर लिएर गयो,’ उनले भिडियोमा भनेका छन् ।

यसबाहेक उनले आफूलाई नेपाली पढ्न नआउने पनि दाबी गरेका छन् । १७ जेठमा भएको मिलापत्रमा नायिका मगरले आफूलाई जोगाइदिनु भनेर रोएपछि मात्र आफूले गल्ती स्वीकारेको दाबी गरेका छन् । उनले मिलापत्र कागजमा एक-अर्काको गलत बुझाइका कारण घटना भएको लेख्न खोजिए पनि नायिका मगरले आफ्नो करियर समाप्त हुन्छ भन्दै बिलौना गरेपछि आफूले गल्ती स्वीकारेको बताएका छन् ।

उनी भन्छन्, ‘एक-अर्कालाई मिस अण्डरस्ट्याण्ड भनेर लेख्न खोजेको थियो, उहाँले मानेन ।’ नायिका मगरले आफ्नो जीवन नै सिनेमा भएको बताउँदै आफूलाई जोगाइदिन रोएको फुर्पाले दाबी गरेका छन् । ‘जिन्दगी सिनेमा हो मलाई पनि मान्छेले मार्छ अनेक भन्छ, यो म आफैँलाई बचाउन लागि हो । अनि लास्टमा त रोएर कुरा गर्‍यो । आफैँलाई बचाउनका लागि हो भन्यो,’ फुर्पाले भिडियोमा दाबी गरेका छन् ।

आधा घण्टा जति मिलापत्रमा राखिने शब्दमा गलफत्ती भएको पनि उनले दाबी गरेका छन् । नायिका मगर रुन थालेपछि आफूलाई माया लागेर मिलापत्र कागजमा आफूले गल्ती नगरेको कुरामा हस्ताक्षर गरेको फुर्पाको दाबी छ । ‘उहाँलाई बचाउन आफैँ गल्ती भाको,’ भिडियोमा फुर्पा भन्छन्, ‘मान्छेले उहाँलाई धेरै नराम्रो भन्दैछ । उहाँलाई यस्तो नहोस्, हामीलाई पनि नराम्रो नहोस् । उहाँलाई पनि बच्नलाई यस्तो लेखेको हो भन्ने सोचेर कागज गरेँ ।’

भिडियोमा फुर्पाले के भनेका कुरा उनकै शब्दमा :

त्यहाँ हामी फिलिम हेर्न गको थियो । फिलिम हेरिसकेपछि त्यसमा सेलिब्रेटी आयो, हेर्न सबै हेर्न गयो, फिलिमका सेलिब्रेटी आयो भनेर हेर्न गाको थियो । एकदम भिड थियो, मलाई पनि मनदेखि फोटो खिच्न मन लाग्यो । सेलिब्रेटीको फोटो खिच्न कहिले कहिले पाइन्छ जस्तो लाग्यो । अनि म भिडमा गए, अगाडि अगाडि जाँदा त्यो केटी भेट्यो ।

हिरोइनी भेट्यो फोटो पनि खिचेँ । हिरोनी त्यो हो भन्ने थाहा थिएन, सबैले खिचे (फोटो) को देखेपछि खिचेँ । सेल्फी खिचिसकेपछि यस्तो फर्के थियो, मान्छेको भिड थियो, यता फर्किँदा अलिकता यस्तो फर्केथे, मान्छे धेरै थियो, अलि हातचैँ यस्तो भए थियो । मिसटेक्ली यस्तो भाथ्यो अनि उहाँले एक झापड हान्यो, सरी माग भन्यो, अनि मैले सरी, सरी, सरी भनेँ । सरी किन भनेको भने मान्छेहरू धेरै थियो । अनि डर लाग्यो, मान्छेहरू केही पनि देखेन, डर लागेर सरी माग्याथ्यो अनि जान लागेको थियो, साथीहरूले जाउँ भनेर जानु थाल्याथ्यो लिफ्ट माथिबाट एउटा मान्छे कुदेर आयो । समातेर माथि ल्यायो अनि पुलिस बोलायो र यसो उता लिएर गयो ।

हामीले लेख्न खोजेको एक अर्काले ‘मिस अन्डरस्ट्यान्ड’ भनेर लेख्न खोजेको थियो । यसैमा माफी माग्ने भनेको थियो । अनि उहाँले मानेन त्यस्तो, हिरोनीले मानेन । त्यस्तो भए त हुँदैन । मेरो जिन्दगी सिनेमा हो, मलाई मान्छेले मार्छ यो अक्षर चाहिँ म आफूलाई बचाउनका लागि हो भन्यो हामीलाई । रोई राथ्यो (नायिका) रोयो पनि त्यो बिचमा ।

पछि आधा घण्टा त्यही शब्दमा अड्केर बस्यो सबै । १५ मिनेट पछाडि हामी मिलेको कापी आएन भने फिलिम बन्द गर्ने कुरा आयो रे, साँच्ची हो कि होइन थाहा छैन । छिटौ गरौँ न त छिटो भनेपछि हामीले पनि अलिकति मायाजस्तो लाग्यो केही हुँदैन होला भनेर त्यसमा साइन गर्‍यो । उनीहरूले पनि फिलिम चलाउनुपर्ने । गल्ती भनेर हुन्छ नि त उहाँलाई बचाउनलाई आफैँ गल्ती भएको भनेँ । मान्छेहरूले धेरै नराम्रो भन्दैछ, उहाँलाई यस्तो नहोस्, हामीलाई पनि राम्रो होस्, उहाँलाई नराम्रोबाट बच्नलाई यस्तो लेखिदियो ।

यी पनि पढ्नुस् :

दुर्व्यवहार र मिलापत्र प्रकरणमा मिरुनाले दिइन् तीन बुँदे प्रष्टीकरण

मिरुनालाई बेलायतबाट आमाको सन्देश- तिमीले ज्यान बचायौ छोरी

नायिका मिरुनाकाे उजुरीपछि समातिएका फुर्वा रिहा

नायिका मिरुना मगरविरुद्ध काठमाडौंमा प्रदर्शन, कबड्डी–४ को पोस्टर जलाइयो

मिरुनालाई गाली नगर्न आग्रह गर्दै निर्देशक रामबाबुले भने- सत्य पत्ता लागिहाल्छ, धैर्य गराैँ

मिरुनाको फिल्मी करिअरः लन्डनमा कबड्डीकी होस्ट, फाइनल म्याचमा तालीदेखि गालीसम्म

मिरुनासँग माफी माग्दै उपेन्द्रले भने- यस्ताे हुनुमा मेराे पनि सानाे हात छ

मिरुनाबारे बाेल्दा विवादमा परेका उपेन्द्र सुब्बाकाे अर्काे प्रश्न- के हामी गाेटी हाैँ ?

प्रकाशित मिति: शुक्रबार, जेठ २०, २०७९ १४:२३