सरोकारवालाहरूलाई अर्थमन्त्रीले भने- मैले प्रस्तुति दिएको मात्रै हो, बजेट तपाईंहरूकै हो

सरोकारवालाहरूलाई अर्थमन्त्रीले भने- मैले प्रस्तुति दिएको मात्रै हो, बजेट तपाईंहरूकै हो

A+ A A-

आर्थिक वर्ष २०७९/०८० को लागि प्रस्तुत बजेट र बजेटले व्यवस्था गरेका विषयहरूका सम्बन्धमा नेपाल आर्थिक संघ, बैंक तथा वित्तीय संस्था परिसंघ नेपाल र अर्थ मन्त्रालयको सहकार्यमा अन्तरक्रिया भएको छ ।

कार्यक्रममा अर्थमन्त्री जनार्दन शर्माले सबैले अपनत्व गर्ने गरी बजेट ल्याइएको बताएका थिए । ‘बजेट निर्माणपूर्व हरेक सरोकारवाला पक्षहरूसँग छलफल तथा अन्तरक्रिया गरी सरोकारवालाहरूकै सुझाव, आवश्यकता, अपेक्षा र सिफारिसहरूका आधारमा बजेट निर्माण गरिएको हुँदा यो बजेट तपाईंहरूको हो,' शर्माले भने, 'प्रतिनिधिको रूपमा मैले प्रस्तुति मात्रै गरेको हुँ ।'

आफ्नो क्षमताले भ्याएसम्म सबैका विषयहरू बजेटमा सम्बोधन गरेको शर्माको भनाइ थियो । सबैले स्वामित्व ग्रहण गरी कार्यान्वयनमा प्रतिबद्ध भएर लाग्न उनले आग्रह गरे ।

अर्थसचिव मधुकुमार मरासिनीले अर्थतन्त्रमा केही चाप परेको अवस्था देखिएको भए पनि विगत ४–५ वर्षका बजेटहरूको श्रृखंला अध्ययन गर्दै तथ्याङ्कीय हिसाबबाट बजेट सीमाभित्रै रहने गरी ल्याइएको बताए ।

वरिष्ठ अर्थशास्त्री तथा नेपाल आर्थिक संघका अध्यक्ष प्रा.डा. विश्वम्भर प्याकुर्‍यालले ऋण बढेको बताए । ‘ऋण ३६ प्रतिशतबाट बढेर ४४.५ प्रतिशतसम्म पुगेको छ, तर विश्व बैंकको प्रतिवेदनहरू अध्ययन गर्दा यस्तो ऋण ७७ प्रतिशतसम्म हुँदासम्म डराउन नपर्ने पाएको छु,' उनले भने, 'योभन्दा बढी भएमा भने जोखिमको तह उच्च दरमा बढ्ने उल्लेख गरिएकोले विशेष ध्यान दिनुपर्दछ ।’

अर्थविद डा. पोषराज पाण्डेले तथ्याङ्क केलाउँदा बजेटले पोलिसी डिरेक्सन र आशा मात्रै जगाउने खालको देखिएको भए पनि सकारात्मक सोच र सफा नियतका साथ बजेट आएको बताए ।

वरिष्ठ अर्थविद् प्रा.डा. गोविन्द नेपालले बजेट समावेशी र रुपान्तरणकारी भएको बताए । कार्यक्रम तथा परियोजनाहरूको कार्यान्वयनका लागि गहिरो अध्ययन आवश्यक रहेको उनको भनाइ थियो । गृहिणीदेखि वैदेशिक रोजगारीमा गएका नेपालीहरूसम्मलाई समेत खुसी तुल्याउने गरी बजेट आएको उनले टिप्पणी गरे ।

सीबीफीनका अध्यक्ष पवनकुमार गोल्यानले कृषि, उत्पादन, रोजगारी, आयात प्रतिस्थापन र आत्मनिर्भर अर्थतन्त्र निर्माणमा केन्द्रित भइ सकारात्मक सोचका साथ बजेट आएको बताए । तर, तरलता अभावको समस्या समाधानका विषयमा भने ठोस योजना आउन नसकेको उनको भनाइ छ ।

अर्थ मन्त्रालयका वरिष्ठ सल्लाहकार डा. सुरेन्द्र उप्रेतीले आम जनता र सरोकारवाला सवै क्षेत्रको अपेक्षा र आवश्यकताहरू समेट्दै सबैलाई अपनत्व महसुस हुने गरी बजेट आएको बताए ।

प्रकाशित मिति: शुक्रबार, जेठ २०, २०७९ १४:४९