अमेरिकी स्वप्नद्रष्टामा नेपाली युवा अनुभव गिरी छनोट

A+ A A-

अमेरिका संसारका धेरै मुलुकका मानिसका लागि सपनाको देश हो । धेरै देशका युवाहरू उच्च अध्ययन गर्न अमेरिकाको सपना देख्छन् । सपना देख्ने सवैका सपना पूरा हुँदैनन् । यो कटु सत्य हो । थोरैले सपना पूरा गर्छन् । अमेरिकामा त्यस्तो सपना पूरा गर्ने आप्रवासीहरूको विषयमा भर्जिनिया ह्यूमानेटेरियनको सहयोगमा प्रियो बाङ्ग्लाको वार्षिक प्रकाशनले विशेष अङ्क प्रकाशन गरेको छ । जसमा नेपाली युवा अनुभव गिरी छनोटमा परेका छन् । सो प्रकाशनमा अनुभव गिरीलाई विशेष महत्वकासाथ पहिलो स्थानमा प्रस्तुत गरिएको छ।

भर्जिनिया ह्यूमानेटेरियनले आप्रवासीहरूको सफलताको कथाका लागि यो योजना स्वीकृत गरेको हो । यस्ता कथाले अन्य आप्रवासीहरूलाई समेत उत्प्रेरणा होस् भनेर कथा आह्वान र छनोट गरिएको थियो । यो कथा आफ्नो मूल भाषा र अङ्ग्रेजी भाषामा पुस्तकाकारमा रहने भएकोले आफू उत्साहित भएको अनुभव बताउँछन् । उनकै प्रयासमा अमेरिकाको १७४ वर्ष पुरानो बीमा कम्पनीले नेपाली भाषामा पुस्तिका समेत सन् २०२० मा प्रकाशित गरेको थियो ।

उनी आफ्नो भाषा र संस्कृतिका लागि कसरी योगदान हुन सक्छ भनेर लागिरहेको बताउँछन् । यो प्रकाशनको उद्देश्य अमेरिकी सपना प्राप्तिका लागि श्रोतको पहिचान, नभनिएका बहु साँस्कृतिक कथाहरू जसमा समुदायका अनुभव, सपनाहरू र अपेक्षाहरूलाई बाहिर ल्याउनु, अनुभव कथा बाँडेरे सामूहिक उद्देश्य प्राप्तिका लागि प्रेरित गर्नु, बिबिध समुदायका चुनौती प्रतिविम्बित गर्नु, नयाँ पुस्तालाई अमेरिकन ड्रिम हासिल गर्न आत्मविश्वास जगाउनु, उज्ज्वल भविष्यका लागि समुदायका बिबिध लेख रचना प्रकाशित गर्नु लगायत रहेका छन् । यी उद्देश्य प्राप्तिका लागि भर्जिनिया ह्यूमानेटेरियनले सहयोग र हातेमालो गर्दै आएको छ ।

अमेरिकन ड्रिम कथामा नेपालसहित बोलिभिया, फिलिपिन्स, पाकिस्तान, बंगलादेश, भारत लगायत विभिन्न मुलुकका अमेरिकी सपना पूरा गर्ने आप्रवासी व्यक्तिहरूको कथा, अन्तर्वार्ता यसमा समेटिएका छन् ।

अनुभव गिरीले अमेरिकी सपना पूरा गर्न के कस्तो सङ्घर्ष गर्नुपर्यो, केकस्ता काम गरेर सफलताको सिंढी चड्न सफल भए, त्यसलाई ईमान्दारीपूर्वक प्रस्तुत गरेका छन् । उनले विद्यार्थीको रुपमा सन् २००४ मा अमेरिका आएपछि सङ्घर्षका क्रममा गरेका रेष्टुँराको काम, पिज्जा ओसार्ने काम, हिउँमा भिझ्दै घण्टौं हिंडेर काममा पुगेका क्षण तथा भोकै सुत्नु परेका घटनालाई प्रस्तुत गर्दै सफलताको बाटोमा आइपुग्दाका कथा प्रेरणादायी रुपमा प्रस्तुत गरेका छन् । उनको कथाले धेरैलाई प्रेरित गर्न सक्ने भएर नै उनलाई प्राथमिकतासाथ पहिलो स्थानमा प्रस्तुत गरेको बताइएको छ ।

यस प्रकाशनमा भर्जिनिया राज्यका सिनेटर मार्क ए वार्नरले शुभकामना मन्तब्य दिँदै वयस्कोन्मुख युवाहरूले कतिपय कठिनाइसँग जुधेर चुनौतीहरूसँग सङ्घर्ष गर्दै तिनमाथि विजय प्राप्त गरेको कथा मात्र नभई यी कथाले आशाको किरणसमेत देखाएको उल्लेख गरेका छन् ।

अनुभव गिरी मोटिभेसनल स्पिकर, ट्रेनर र सफल नेतृत्वदायी भूमिकाका लागि परिचित छन् र उनले सकारात्मक सोच यूट्यूव च्यानलमार्फत सफलताका लागि धेरैलाई प्रेरित गर्दै आएका छन् ।

प्रकाशित मिति: बुधबार, जेठ १८, २०७९ २१:४८