पूर्वराजा ज्ञानेन्द्रले तिरेनन् बिजुलीको महसुल, कोसँग असुल गर्ने, प्राधिकरण नै रनभुल्लमा

पूर्वराजा ज्ञानेन्द्रले तिरेनन् बिजुलीको महसुल, कोसँग असुल गर्ने, प्राधिकरण नै रनभुल्लमा

A+ A A-

पूर्वराजा ज्ञानेन्द्र शाहलाई सरकारले उपलब्ध गराएको नागार्जुन दरबारको झण्डै २ करोड विद्युत् महसुल नेपाल विद्युत् प्राधिकरणले उठाउन सकेको छैन ।

नागार्जुन दरबारमा रहेका नौवटा मिटरमध्ये आठवटाको जरिवानासहित १ करोड ९५ लाख २८ हजार ७ सय ६४ रुपैयाँ महसुल वक्यौता रहेको प्राधिकरणले जनाएको छ ।

दरबारक्षेत्रमा रहेको चरा पालेको घरको महसुल डेढ वर्षअघिदेखि नेपाली सेनाले तिरिरहेको छ भने ग्राहक नम्बर २१६.२६.२०३ लाई भने प्राधिकरणले कालो सूचीमै राखेको छ ।

वक्यौता उठाउन प्राधिकरणको बालाजु वितरण केन्द्रले विभिन्न निकायमा लिखित पत्र पठाए पनि सबै निकायले आफ्नो जिम्मा नभएको भन्दै पन्छिरहेको नेपाल विद्युत् प्राधिकरण, बालाजु वितरण केन्द्रका प्रमुख विधान पोखरेलले बताए ।

‘हामीले नागार्जुन दरबार, नेपाल ट्रस्ट, शिवपुरी राष्ट्रिय निकुञ्ज, सशस्त्र प्रहरी, नेपाली सेनालगायतका निकायमा पत्राचार गरिसकेका छौँ । मिटर आफ्नो नाममा नभएको भन्दै कुनै पनि निकायले जिम्मेवारी लिएको छैन,’ उनले शिलापत्रसँग भने ।

नागार्जुन दरबार कुन निकायअन्तर्गत पर्छ भन्ने त्यहाँका कर्मचारीहरूलाई नै थाहा नभएका कारण महसुललगायतका कुरा अलपत्र परेको नार्गाजुन दरबारका पूर्वनायब सुब्बा श्यामकुमार लामाले बताए ।

नार्गाजुन दरबारका तत्कालीन नायब सुब्बा श्यामकुमार लामाले विद्युत् महसुल भुक्तानीका लागि विभिन्न निकायलाई पठाएको पत्र ।

‘म त्यहाँ हुँदा महसुल बुझाउन पहल गरेको थिएँ । अरु निकायले जिम्मा लिएनन् । निर्मल निवासमा पत्राचार गर्दा नेपाल सरकारले पूर्वराजालाई प्रयोगका लागि दिएको क्वार्टर भएकाले सरकारले नै तिर्नुपर्ने जवाफ आयो,’ उनले भने ।

सरकारले भने सबै प्रकारका कर र महसुल पूर्वराजपरिवारबाटै असुल गर्नुपर्ने निर्णय गरिसकेको छ । तर, पूर्वराजा ज्ञानेन्द्र शाहका सहयाेगी फणिराज पाठकले भने साे महसुल नेपाल सरकारले नै तिर्नुपर्ने बताए । उनले शिलापत्रसँग भने, 'प्रधानमन्त्री बस्ने क्वाटरकाे बिल कसले तिर्छ ? नेपाल सरकारले हाेइन ? नागार्जुन दरबार पनि सरकारकै हाे । त्यसैले याे बिल पनि सरकारले नै तिर्नुपर्छ ।' उनले भूकम्पले जीर्ण दरबारमा बस्नै नसक्ने अवस्था रहेकाे भन्दै त्यहाँकाे िवद्युत महसुल पूर्वराज परिवारले नतिर्ने बताए ।

२१ पुस २०६६ मा बसेको मन्त्रिपरिषद् विधेयक समितिको बैठकले पूर्वराजा र उनका परिवारका सदस्यहरूले बुुझाउन बाँकी कर वा महसुल गणतन्त्र घोषणा भएको १५ जेठ २०६५ देखि असुलउपर गर्ने निर्णय गरेको थियो ।

हाल पूर्वराजपरिवार नार्गाजुन दरबारमा छैन । २०७२ सालको भूकम्पले दरबार जीर्ण बनाएपछि राजपरिवार त्यहाँबाट सरेको हो ।

बालाजु वितरण केन्द्रले गत दसैँपछि वक्यौता उठाउने काम तीव्र बनाए पनि दरबारबाट उठाउनुपर्ने ठूलो रकम भने उठाउन सकेको छैन । ३१ हजार ५ सय ७२ ग्राहक रहेको केन्द्रले महसुल उठाउन पछिल्लो ८ महिनाभित्रै १ हजार २ सय घरधुरीको लाइन काटिसकेको छ ।

‘हामीले लाइन काटेरै २ करोड ५५ लाख ८६ हजार वक्यौता रकम उठाइसक्यौँ । महसुल नतिरेका बन्द भएर बसेका केही उद्योगको त सञ्चालकको घर पत्ता लगाएर घरकै लाइन काटेर पनि वक्यौता उठायौँ,’ उनले भने ।

११ असार २०७५ सम्मको नागार्जुन दरबारको विद्युत्‌को महसुल । हाल महसुल र जरिवाना गरेर १ करोड ९५ लाखभन्दा बढी पुगेको देखिन्छ छ ।

विद्युत् वितरण विनियामलीअनुसार महसुल नतिरेको ६ महिनामा कालो सूचीमा राख्न मिल्ने र त्यसको ६० दिनमा जुनसुकै समयमा बिनासूचना लाइन काट्न मिल्ने भए पनि दरबारको एउटा मिटरलाई मात्र कालो सूचीमा राखिएको छ ।

‘यो एरिया कुलेश्वर वितरण केन्द्रअन्तर्गत हुँदा एउटा मिटरलाई कालो सूचीमा राखिएको रहेछ । किन एउटालाई मात्र कालो सूचीमा राखियो, हामीलाई थाहा छैन,’ पोखरेलले भने ।

प्रकाशित मिति: बुधबार, जेठ १८, २०७९ १९:५८