धमाधम किताब छाप्दै जनक शिक्षा, कहिले पुग्छ विद्यार्थीको हातहातमा किताब ? (भिडियो)

धमाधम किताब छाप्दै जनक शिक्षा, कहिले पुग्छ विद्यार्थीको हातहातमा किताब ? (भिडियो)

A+ A A-

बुधबार दिउँसो जनक शिक्षा सामग्री केन्द्र भक्तपुर पुग्दा किताब छपाइको काम धमाधम भइरहेको थियो । प्रदेश प्रदेशमा लैजान ट्रकमा किताब लोड हुँदै थियो । कति ट्रक केन्द्रको गेटबाट बाहिरिरहेका थिए । केन्द्रलाई किताब छपाइको चटारो देखिन्थ्यो । बिहान र दिउँसो गरी दुई सत्रमा कर्मचारीहरू किताब छाप्न खटिइरहेका छन् ।

तर, केन्द्रले समयमा पाठ्यपुस्तक उपलब्ध गराउन नसक्दा आलोचित बनेको छ । चुनावको मतपत्र समयमा छाप्न सक्ने तर किताब छाप्न नसकेको आरोप केन्द्रमाथि लागेको छ । यसको जवाफमा केन्द्रका प्रवक्ता चित्र आचार्य भन्छन्, ‘मतपत्र छपाइ राष्ट्रको काम हो । सबै कच्चा पदार्थ निर्वाचन आयोगले दिएको हो । यसमा सार्वजनिक खरिद ऐन लाग्दैन । छिट्टै टेन्डर गरेर गर्न मिल्छ ।’

किताब छपाइको काम राष्ट्रको होइन त ? उनी भन्छन्, ‘सरकारले मतपत्रलाई प्राथमिकता दिएर छाप्न निर्देशन दियो ।’ स्थानीय तहको मतपत्र छपाइको कारण र कागजको अभावले किताब छपाइमा ढिलाइ भएको केन्द्रको भनाइ छ । ‘२५ वैशाखमा मत्रपत्र छपाइको काम सकियो त्यसपछि किताब छापिरहेका छौँ । समयमा कागजको आपूर्ति पनि हुन नसकेकाले किताब छपाइमा ढिलाइ भएको हो,’ उनी भन्छन्, ‘रुस-युक्रेन द्वन्द्वले कच्चा पदार्थ आउन ढिला भएको हो ।’

उनका अनुसार सात प्रदेशमै अहिले किताब ढुवानी भइरहेको छ । हिमाली र पहाडी जिल्लालाई पहिलो प्राथमिकता दिएर किताब ढुवानी गरेको उनी बताउँछन् । ‘मनाङ, मुस्ताङ र कर्णालीका तीन जिल्लामा पहिले नै ढुवानी भइरहेको छ । सातवटै प्रदेश कार्यालयमा किताब पठाइरहेका छौँ,’ उनी भन्छन् ।

कर्णाली प्रदेशमा पुस्तक पुगेको उनले दाबी गरे पनि कर्णालीका अधिकांश पालिकाहरूमा किताब पुगेको छैन । यसबारे शिलापत्रसँग सम्बन्धित पालिकाका शिक्षा शाखा प्रमुख र प्रधानाध्यापकहरूले किताब नआएको बताएका थिए ।

सम्बन्धित समाचार

झोला र कापी छ, पढ्न किताब छैन

‘यहाँबाट ढुवानी भएर किताब गइसकेको छ । किन पुगेको रहेनछ नेपालगञ्ज र सुर्खेत कार्यालयमा बुझ्छौँ,’ उनी भन्छन्, ‘कर्णालीलगायत हिमाली र पहाडी जिल्लालाई प्राथमिकता दिएर पठाएका छौँ ।’

उनका अनुसार अझै ३३ लाख थान पाठ्यपुस्तक छाप्न बाँकी छ । यो शैक्षिकसत्रका लागि १ करोड ९८ लाख थान पुस्तक छाप्नुपर्ने हुन्छ । केन्द्रले अहिलेसम्म १ करोड ६५ लाख थान मात्रै पाठ्य पुस्तकको छपाइ सकिएको जनाएको छ ।

यो वर्ष निजी विद्यालयले पनि सरकारी पाठ्यपुस्तकको माग गरेकाले थप १० लाख थान बढी छाप्नु पर्ने भएको उनले बताए । ‘निजीले पाठ्यपुस्तक लिने कुरा आएको छ । यसले गर्दा १० लाख थान किताब बढी छाप्नु पर्ने हुन्छ,’ उनी भन्छन् । अबको एक महिनाभित्र सबै विद्यार्थीको हातहातमा पाठ्यपुस्तक पुर्‍याउने उनको दाबी छ । ‘बाँकी किताब छाप्न असारसम्म लाग्छ । केही ढिला भएको हो । किताब पुर्‍याउने दायित्व पनि हाम्रै हो । असार मसान्तसम्म सबै ठाउँमा किताब पुर्‍याउँछौँ,’ उनी भन्छन् ।

विद्यालय तहका ४ देखि १० कक्षासम्मको पाठ्यपुस्तक छपाइ एवं वितरणको जिम्मा जनक शिक्षा सामग्री केन्द्रले पाएको छ । कक्षा १ देखि ३ सम्मको पाठ्यपुस्तक छाप्ने जिम्मा भने सरकारले निजी क्षेत्रलाई दिएको छ ।