कार्यपालिका चुनावअघि पोखराका जनप्रतिनिधि: एमालेका रिसोर्टमा, कांग्रेसका होटलमा

कार्यपालिका चुनावअघि पोखराका जनप्रतिनिधि: एमालेका रिसोर्टमा, कांग्रेसका होटलमा

कांग्रेस जनप्रतिनिधिलाई राखिएको होटल कान्तिपुर ।

A+ A A-

पोखरा महानगरपालिकाको ८ जना कार्यपालिका सदस्य चयन गर्न बुधबार मतदान हुँदैछ । ५ जना महिला सदस्य र ३ जना दलित वा अल्पसंख्यक सदस्य चयन गर्न मतदान हुन लागेको हो ।

मत सुरक्षित राख्न एमाले र कांग्रेस दुवैले निर्वाचित जनप्रतिनिधिलाई रिसोर्ट र होटलमा राखेका छन् ।

कांग्रेसबाट निर्वाचित जनप्रतिनिधिलाई सोमबारदेखि पोखरा- ६, लेकसाइडस्थित होटल कान्तिपुरमा राखिएको छ । आफूहरू बसेको होटलमा कार्यपालिका सदस्य चयन गर्न हुने मतदानको प्रक्रिया र नमुना मतदानबारे सिकाइएको कांग्रेसबाट निर्वाचित एक वडाध्यक्षले शिलापत्रलाई बताए ।

एमालेबाट निर्वाचित जनप्रतिनिधिलाई पोखराबाहिर लगिएको छ । उनीहरूलाई कास्कीको अन्नपूर्ण गाउँपालिका- १ नौडाँडास्थित हिमालयन देउराली रिसोर्टमा राखिएको स्रोतले बतायो । चुनावलक्षित प्रशिक्षण भनेर उनीहरूलाई सोमबार उक्त रिसोर्ट लगिएको हो ।

मंगलबार हुने कार्यपालिका सदस्य निर्वाचनका लागि महिला सदस्यतर्फ एमालेबाट धनकुमारी पोख्रेल, निर्मला पौडेल, भिमकुमारी पुन गर्बुजा, मन्दिरा परियार, हरिमाया विश्वकर्मा र कांग्रेसबाट डाल्डादेवी भुजेल, दुर्गादेवी केसी थापा, पवित्रा थापा, भावना श्रेष्ठ, रनसुबा गुरुङ उम्मेदवार छन् ।

महिला सदस्यमा गठबन्धन नभए पनि दलित तथा अल्पसंख्यकमा भने सत्तारुढ दलहरूले गठबन्धन गरेका छन् । एमालेबाट गोविन्द तुलाचन, दीपक घिमिरे, निर्मल दियाली उम्मेदवार छन् । गठबन्धनबाट माओवादीका भिमबहादुर सार्की, जसपाबाट पानबहादुर घर्ती र एकीकृत समाजवादीबाट लालबहादुर विक उम्मेदवार रहेको निर्वाचन अधिकृतको कार्यालयले जनाएको छ ।

कार्यपालिका सदस्य छनोट गर्न निर्वाचित जनप्रतिनिधि मतदाता हुन्छन् । गत ३० वैशाखमा भएको मतदानबाट पोखरा महानगरपालिकामा मेयर-उपमेयर, ३३ वडाध्यक्ष र १ सय ३२ सदस्य गरेर १ सय ६७ जना निर्वाचित भएका छन् । त्यसमा एमालेको बहुमत छ । एमालेबाट उपमेयरसहित ८६ जना र कांग्रेसबाट ७९ जना निर्वाचित भएका छन् । एकीकृत समाजवादीले मेयर जितेको छ भने पोखरा-२२ मा स्वतन्त्र उम्मेदवार विजयी भएका थिए । गठबन्धनका अन्य दलबाट भने एक जना पनि जनप्रतिनिधि हुन सकेनन् ।

नगरसभामा एमालेको बहुमत भए पनि कार्यपालिकामा उसको ३ मत क्रस भएमा गठबन्धनको बहुमत पुग्नेछ । कांग्रेस, एकीकृत समाजवादीबाट निर्वाचित मेयर र स्वतन्त्र उम्मेदवारको मत जोड्दा गठबन्धनको ८१ मत हुन्छ । स्वतन्त्र विजयी भएका पोखरा-२२ का हिमलाल बराल नेकपा माओवादी केन्द्र निकट हुन् ।

प्रकाशित मिति: मंगलबार, जेठ १७, २०७९ २०:१७