तीन गुणा बढ्यो तरकारीको भाउ

A+ A A-

यतिबेला काठमाडौँमा तरकारीका मूल्य अत्याधिक बृद्धि भएको छ । अघिल्लो बर्षको यही समयको तुलनामा झण्डै तीन गुणा मूल्य बृद्धि भएको छ ।

कालिमाटि फलफूल तरकारी बजार विकास समितिको आजको मूल्यअनुसार ठूलो गोलभेडाको थोक मूल्य अधिकतम १०० रुपैयाँ प्रतिकेजी छ । त्यस्तै प्याजको ३७ रुपैयाँ, आलु ३८ रुपैयाँ, काउली ७० रुपैयाँ, गाजर १०० रुपैयाँ, मुला ७० रुपैयाँ प्रतिकेजी मूल्य तोकिएको छ ।

अघिल्लो वर्षको यही समयको तुलनामा यो वर्ष २८८ प्रतिशतले मूल्य बृद्धि भएको छ । अघिल्लो वर्ष यसै समयमा सानो गोलभेडाको मूल्य १८ रुपैयाँ प्रतिकेजी थियो । तर, अहिले ७० रुपैयाँ पुगेको छ ।

त्यस्तै अघिल्लो वर्षको तुलनामा प्याज ५.८८ प्रतिशतले, काउली ५८.१४ प्रतिशतले, मुला १४२.८६ प्रतिशतले, बन्दा १०.५३ प्रतिशतले, बोडी ११८.७५ प्रतिशतले मूल्य बृद्धि भएको छ ।

देशका बिभिन्न ठाउँहरु आएको बाढी, पहिरो र डुवानका कारण तरकारीको मूल्य बृद्धि भएको कालिमाटी फलफूल तथा तरकारी बजार विकास समितिले जानकारी दिएको छ । बाढीले कतिपय क्षेत्रका तरकारी बगाएको र केही स्थानमा खेतमै डुवेकोले काठमाडौंसम्म ल्याउन नसक्दा औषतमा भन्दा केही मूल्य बृद्धि भएको समितिको तर्क छ ।

माथि उल्लेखित मूल्य कालिमाटी फलफूल तथा तरकारी बजारमा पाइने होलसेल मूल्य हो । तर, उपभोक्ताको भान्सासम्म पुग्दा यो मूल्य दोब्बर हुने गर्दछ । कालिमाटीमा गोलभेडाको मूल्य १०० रुपैयाँ तोकिए पनि खुद्रा पसलहरुमा १६० रुपैयाँसम्ममा बिक्री हुने गरेको छ ।

सरकारले तरकारीमा २० प्रतिशत नाफा खान मिल्ले व्यवस्था गरेको छ । तर, व्यापारीले ६० प्रतिशतसम्म नाफा खाने गरेका छन् ।

तरकारीको विषयमा सरकारले तोकेको नाफा रकमले मात्रै नपुग्ने तर्क कालिमाटी फलफूल तथा तरकारी बजार विकास समितिका उपनिर्देशक विनय श्रेष्ठ बताउँछन् ।

‘अन्य खाद्यान्नमा भन्दा तरकारीमा नोक्सानको जोखिम बढी हुन्छ । सरकारले तोकेको २० प्रतिशत तरकारीमा व्यवहारिक हुन सक्दैन । त्यसैले खुद्रा मूल्य केही बढी हुने गरेको छ,’ उपनिर्देशक श्रेष्ठले भने ।

विषादि परीक्षणले मूल्य बढ्यो भन्नु हल्ला मात्रै

ब्यापारीले पछिल्लो समय भारतबाट आउने तरकारीमा विषादी परीक्षणमा देखिएको विवादका कारण मूल्य बढेको बताउँदै आएका छन् । र, मनलाग्दी मूल्य बृद्धि गरी उपभोक्तालाई ठगिरहेका छन् ।

तर, वास्तविकता त्यस्तो नभएको कालिमाटी फलफूल तथा तरकारी बजार विकास समितिका उपनिर्देशक श्रेष्ठको भनाइ छ । कालिमाटीमा आलु, प्याजलगायतका तरकारी भारतबाट आउने गरेका छन् । तर, पहिले र अहिले ती तरकारीहरुको आयातमा खासै कमी आएको छैन । समितिका अनुसार फलफूल आयातमा केही कमी आएको भए तापनि तरकारी भने पहिलेकै बराबरीमा आईरहेको छ ।

प्रकाशित मिति: मंगलबार, असार ३१, २०७६ २३:५९