आईजीपी नियुक्तिविरुद्धको मुद्दा हेर्न नमिल्नेमा

A+ A A-

प्रहरी महानिरीक्षक (आईजीपी) नियुक्तिविरुद्ध सर्वोच्च अदालतमा परेको मुद्दा हेर्न नमिल्नेमा परेको छ ।

मंगलबार आईजीपी नियुक्तिविरुद्धको मुद्दामाथिको सुनुवाइ न्यायाधीशद्वय विश्वम्भरप्रसाद श्रेष्ठ र डा. कुमार चुडालको बेञ्चमा परेको थियो । तर, एआईजी बढुवाविरुद्ध परेको रिटलाई पनि सँगै राखेर सुनुवाइ गर्नुपर्ने भएपछि आईजीपी नियुक्तिविरुद्ध एआईजी विश्वराज पोखरेलले दायरको रिटको सुनुवाइ हेर्न नमिल्नेमा राखिएको हो ।

अब दुवै मुद्दालाई एकैठाउँमा राखेर सुनुवाइ गरिनेछ । यसअघि न्यायाधीश सुष्मालता माथेमाको एकल इजलासले वैशाख २२ को मुद्दाको अन्तिम सुनुवाइ आजबाट हुने आदेश दिएको थियो । उक्त इजलासले सरकारका तर्फबाट अन्तिम सुनुवाइका लागि लिखित जवाफ माग गर्दै अन्तरिम आदेश दिन अस्वीकार गरेको थियो ।

आदेशमा तोकिएको दिनमा नै अन्तिम सुनुवाइ गरिने र सो मिति सार्न नपाइने उल्लेख थियो । सरकारले आईजीपीमा धीरजप्रताप सिंहलाई बढुवा गरेपछि एआईजी विश्वराज पोखरेलले बढुवाका लागि आफू योग्य भएको तर सरकारले तेस्रो वरियताका व्यक्तिलाई बढुवा गरेको उल्लेख गर्दै सर्वोच्च अदालतमा रिट दायर गरेका थिए ।

एआईजी पोखरेलले भने आफ्नो मुद्दा एकल भए पनि सुनुवाइ गर्नुपर्ने माग गरेका छन् । साउनमा आफू अनिवार्य अवकाशमा जाने भएकाले मुद्दाको किनारा छिटो लगाउन उनले माग गरेका हुन् ।

यस्तै आफूभन्दा जुनियरलाई एआईजीमा बढुवा गरिएको भन्दै डीआईजीत्रय ईश्वरबाबु कार्की, धनश्याम अर्याल र प्रकाशजंग कार्कीले सर्वोच्चमा रिट दिएका थिए । सरकारले धीरजप्रताप सिंह, बसन्त पन्त र रविन्द्र बहादुर धानुकलाई एआईजीमा बढुवा गरेपछि उनीहरू सर्वोच्च पुगेका थिए। डीआईजीत्रय कार्की, अर्याल र प्रकाशजंग मुद्दाको टुंगो नलाग्दै वैशाख १९ मै ३० वर्षे सेवा अवधिका कारण अवकाशमा गइसकेका छन् ।

प्रकाशित मिति: मंगलबार, जेठ १७, २०७९ ११:५९