सरकारले दिएको राजस्व छुटबाट तपाईंलाई कति लाभ पुग्यो ? (हेर्नुस् सूची)

A+ A A-

सरकारले आन्तरिक उत्पादनलाई सहयोग पुग्ने र सामाजिक सुरक्षा तथा दैनिक जीवनमा अत्यावश्‍यक कतिपय बस्तुको आयातमा गर्दा लाग्‍ने राजस्व तथा महशुलमा छुटको व्यवस्था गरेको छ ।

कतिपय क्षेत्रमा त्यस्तो करको दरमा शतप्रतिशत छुट दिइएको छ भने कतिपयमा कम कर तिरे पुग्ने व्यवस्था गरिएको छ ।

कहाँ कस्तो छुट ?

५० प्रतिशत छुट : वैदेशिक रोजगारीमा गएका नेपाली नागरिकहरूले औपचारिक माध्यमबाट विप्रेषण पठाएमा निजहरूको राहदानी नवीकरण, कन्सुलर सेवा तथा श्रम स्वीकृति नवीकरण बापत लाग्ने शुल्क वा दस्तुरमा ।
पूर्णरूपमा भन्सार महशुल छुट : अपाङ्गता भएका व्यक्तिले प्रयोग गर्ने सामग्रीको उत्पादन गर्ने उद्योगहरूलाई आवश्यक पर्ने कच्चा पदार्थ र उनीहरूले प्रयोग गर्ने युरिन ब्यागको आयातमा ।
भन्सार महशुलमा ७५ प्रतिशत छुट : सामुदायिक तथा सार्वजनिक विद्यालयले खरिद गर्ने बढीमा दुईवटा स्कुल बसको आयातमा ।
भन्सार महशुलमा ९० प्रतिशत छुट : स्यानेटरी प्याडको आयातमा ।
१ प्रतिशत मात्र भन्सार महशुल लाग्ने : नेपालमा नै स्यानेटरी प्याड उत्पादन गर्ने उद्योगका लागि आवश्यक पर्ने कच्चा पदार्थको आयातमा ।
भन्सार महशुल पूर्णरूपमा छुट : स्थानीय तहले खरिद गर्ने एउटा कृषि एम्बुलेन्स वा ढुवानी साधन खरिदमा उक्त साधनको पैठारीमा ।
भन्सार महशुलमा ५० प्रतिशत छुट : कृषि सहकारीले कृषिजन्य उत्पादन ढुवानी गर्न आवश्यक ढुवानी साधनको आयातमा ।

उद्योग विभागको सिफारिशमाः

५० प्रतिशत अन्तःशुल्क, २५ प्रतिशत भन्सार महशुल र ५ वर्षसम्म जम्मा लाग्ने आयकरमा ४० प्रतिशत छुट: चारपाङ्ग्रे विद्युतीय सवारीसाधन उत्पादन वा एसेम्बल गर्ने नयाँ उद्योग स्थापना गर्दा सवारी साधन उत्पादनका लागि आवस्यक पाटपुर्जा वा अन्य कच्चा पदार्थको आयातमा ।
आयकरमा ४० प्रतिशत छुट: चारपाङ्ग्रे विद्युतीय सवारी साधन उत्पादन वा एसेम्बल गर्ने नयाँ उद्योग स्थापना गर्दा कारोबार सुरुगरेको मितिदेखि पाँच वर्षसम्म ।

यो आर्थिक विधेयकमा गरिएको व्यवस्था हो । आर्थिक विधेयक पास नभइसकेको अवस्थामा सरकारले जारी गरेको आर्थिक आदेश अनुसार यी शुल्क तथा दरहरू कार्यन्वयनमा आउनेछन् ।