अलमलिएको नयाँ शहरी योजना : ८ वर्षमा ९ अर्ब बजेट विनियोजन, काम भने शून्य

A+ A A-

आगामी आर्थिक वर्षको बजेटमा पनि महत्वाकांक्षी योजनाको रूपमा स्मार्ट सिटीलाई प्राथमिकता दिइएको छ । सरकारले अगामी आर्थिक वर्षको बजेटमा स्मार्ट सिटी अर्थात् नयाँ शहर निर्माणका लागि ३ अर्ब १० करोड रुपैयाँ बजेट विनियोजन गरेको हो ।

आर्थिक वर्ष २०६७/६८ बाट देशका १२ स्थानमा स्मार्ट सिटीको योजना अघि सारेको सरकारले यस वर्ष भने पुष्पलाल राजमार्गमा पर्ने १० शहरका निर्माणका लागि मात्रै बजेट विनियोजन गरेको हो । योबाहेक हिमाली क्षेत्र ओलाङचुङगोला, किमाथाङ्का, उपल्लो मनाङ, डाल्पोबुद्ध, लोमान्थाङ र लिमीक्षेत्रमा पनि नयाँ शहर र पहाडी र तराई क्षेत्रका सिन्धुली, बारा, तनहुँ र पाल्पालगायतका क्षेत्रमा नयाँ शहरको योजना अगाडि बढाइने जनाएको हो ।

सुरुमा १२ वटा क्षेत्रमा नयाँ तथा व्यवस्थित शहर बनाउने सरकारको योजनाअनुरुप योजना अगाडि सारे पनि ८ वर्षमा योजना छरिँदै ५० भन्दा बढी नयाँ शहर निर्माण योजना अगाडि बढेको छ । यद्यपि ८ वर्ष बितिसक्दा पनि कुनै नयाँ शहर निर्माण भने भइसकेको छैन । यो अवधिमा नयाँ शहरका नाममा ९ अर्बभन्दा बजेट विनियोजन भइसकेको छ । हरेक वर्ष अर्बका दरले बजेट विनियोजन भए पनि सरकारले अघि सारेको स्मार्ट सिटी योजनाअन्तर्गतका शहरहरूमध्ये कुनै एक शहर पनि निर्माण हुन नसकेको छैन ।

सरकारले आव २०६७/६८ मा नयाँ शहर र स्मार्ट सिटी विकास गर्ने घोषणा गरे पनि आव २०७०/७१ बाट मात्रै बजेट विनियोजन गर्न थालेको हो । आव २०७०/७१ मा उक्त नयाँ शहर आयोजनाका लागि २० करोड ९२ लाख, आव २०७१/७२ मा ३० करोड ५३ लाख, आव २०७२/७३ मा ४९ करोड ९८ लाख, आव २०७३/७४ मा १ अर्ब ११ करोड ४१ लाख विनियोजन गरेको थियो ।

यस्तै, आव २०७४/७५ मा २ अर्ब ११ करोड ५७ लाख, आव २०७५/७६ मा १ अर्ब ९९ करोड १७ लाख, आव २०७६/७७ मा १ अर्ब ८२ करोड ९७ लाख र आव २०७७/७८ मा २ अर्ब ११ लाख बजेट विनियोजन गरेको थियो ।

सरकारले सुरुमा १२ वटा स्मार्ट सिटीका योजना अघि सारेको थियो । त्यसपश्चात् हरेक वर्षको बजेटमा योजना र बजेट थपिँदै गए पनि कार्यान्वयन भने हुन सकेको छैन ।

सरकारले १२ वटा स्मार्ट सिटीमा झापाको, रौतहटको, काभ्रे, भक्तपुर, स्याङ्जा, रूपन्देही, धनकुटा, तुलसीपुर, दैलेखको, कञ्चनपुर र डडेलधुरालगायतका स्थानहरू समेटेको थियो भने नयाँ तथा व्यवस्थित शहरी योजनाअनुरुप मध्यपहाडी लोकमार्ग, हुलाकी लोकमार्ग र हिमाली क्षेत्रहरू समेटेको थियो ।

प्रकाशित मिति: आइतबार, जेठ १५, २०७९ १९:३७