यी थारू उम्मेदवार जसले उपमहानगरमा एमालेको साख जोगाए

A+ A A-

अघिल्लो चुनावमा एमालेले ११ मध्ये सात उपमहानगरपालिका जितेको थियो । तर, पाँचदलीय गठबन्धनका कारण यसपटक तीन उपमहानगरमा खुम्चिएको एमालेको साख थारू उम्मेदवारहरूले जोगाइदिएका छन् ।

एमालेबाट उपमहानगरमा उम्मेदवारी दिएका थारू उम्मेदवारमध्ये जितपुर–सिमरामा मेयर उठेकी सरस्वतीदेवी चौधरी मात्र पराजित भइन् । उनले १७ हजार ७ सय ७९ मत ल्याउँदा सत्ता गठबन्धनका तर्फबाट माओवादी केन्द्रका राजन पौडेल झण्डै एक हजार मतको अन्तरले विजयी भए । उनीबाहेक उपमहानगरमा मेयर/उपमेयर उठेका एमालेका सबै थारू उम्मेदवारले जितेका छन् ।

महासचिव शंकर पोखरेलको गृहजिल्ला दाङका दुई उपमहानगरमा सहज जित निकाल्न स्थानीय समुदायमा लोकप्रिय थारू उम्मेदवारहरू सफल भए । सत्तारुढ गठबन्धन र एमाले दुवैले प्रतिष्ठाको लडाइँ बनाएको घोराही र तुल्सीपुर उपमहानगरपालिका एमालेले प्रस्ट बहुमतसहित जितेको छ ।

गठबन्धनका उम्मेदवारलाई झण्डै ५ हजारको मतान्तरले पराजित गर्दै एमालेका नरुलाल चौधरी घोराही उपमहानगरको मेयरमा दोहारिएका छन् । २०७४ मा पनि उनी मेयर निर्वाचित भएका थिए । चौधरीले ३१ हजार ७ सय २८ मत ल्याउँदा गठबन्धनका तर्फबाट माओवादी केन्द्रका हेमराज शर्मा पोखरेलले २६ हजार ३ सय ६८ मत ल्याएका थिए ।

तुल्सीपुर उपमहानगरमा सत्तारुढ दलहरूको बलियो गठबन्धनविरुद्ध जित हासिल गर्न उपमेयरकी उम्मेदवार स्यानी चौधरीको खास भूमिका रहेको बताइन्छ । खासगरी थारू समुदायको लोकप्रिय मतको बलमा एमालेले तुल्सीपुरको चुनाव जितेको थियो । स्यानी स्थानीय समुदायमा लोकप्रिय नेतृ हुन् । उनले गठबन्धनका तर्फबाट उम्मेदवार रहेका नेकपा एकीकृत समाजवादीका जोगबहादुर रानामगरलाई करिब नौ हजारको मतान्तरले हराएकी छिन् । चौधरीले ३० हजार ५ सय ९७ मत ल्याउँदा निकटतम प्रतिद्वन्द्वी रानामगरले २१ हजार ६५ मत प्राप्त गरेका थिए ।

धनगढी उपमहानगरमा स्वतन्त्र उम्मेदवार गोपाल हमाल फराकिलो मतान्तरले विजयी हुँदा एमालेका रणबहादुर चन्द तेस्रो स्थानमा रहे । उपमेयरमा भने एमालेकी कन्दलाकुमारी राना करिब तीन हजारको मतान्तरले विजयी भइन् । रानाले १५ हजार ४ सय ७९ मत ल्याउँदा माओवादी केन्द्रकी शान्तिकुमारी अधिकारी क्षेत्रीले १२ हजार ६ सय ७० मत प्राप्त गरेकी थिइन् ।

इटहरी उपमहानगरको मेयरमा गठबन्धनका तर्फबाट कांग्रेस उम्मेदवार हेमकर्ण पौडेलले एमाले उम्मेदवार यामकुमार युङवाङ सुब्बालाई झण्डै ५ हजारको मतान्तरले पराजित भए । उपमेयरमा भने एमालेकी संगीताकुमारी चौधरीले राष्ट्रिय खेलकुद् परिषद्का सदस्य सचिव भइसकेका गठबन्धनका उम्मेदवार केशवकुमार विष्टलाई झण्डै १४ हजारको मतान्तरले हराएकी छिन् ।

चौधरी ३२ हजार ४ सय ३६ मतसहित विजयी भएकी हुन् । उनका निकटतम प्रतिद्वन्द्वी गठबन्धनका तर्फबाट नेकपा एसका विष्टले १८ हजार ३१ मत प्राप्त गरेका थिए । विष्ट इटहरीको मेयर उठ्न चाहन्थे । तर, गठबन्धनले भागबण्डा लगाउँदा इटहरी कांग्रेसको भागमा परेपछि उपमेयर उठेका थिए । ११ वटा उपमहानगरमध्ये एमालेले तीन, कांग्रेसले तीन, स्वतन्त्र तीन, नेकपा माओवादी केन्द्र र नेकपा एसले एक/एक जितेका छन् ।

प्रकाशित मिति: शुक्रबार, जेठ १३, २०७९ २२:४६