मेयर बन्छु भन्दै आएका बालेनलाई गुरु नरसिंहले सोधे–काठमाडौंको इतिहास थाहा छ ?

मेयर बन्छु भन्दै आएका बालेनलाई गुरु नरसिंहले सोधे–काठमाडौंको इतिहास थाहा छ ?

A+ A A-

पाँच वर्षअघिको कुरा हो । हालै काठमाडौं महानगरको मेयरमा निर्वाचित बालेन शाहले स्थानीय तहको चुनावमा भोट नहाल्ने निर्णय गरे । सामाजिक सञ्जालमा पोस्ट गर्दै बालेनले लेखे, ‘म यसपटक भोट हाल्दिनँ । अर्कोपटक मात्रै हाल्छु, अरुलाई हाल्दिनँ, आफैँलाई हाल्छु ।’

हाल आफू स्ट्रक्चरल इञ्जिनियरिङमा स्नातक गरिरहेको र पाँच वर्षभित्र आफ्नो योग्यता पुग्नेसमेत उनले सामाजिक सञ्जालमा पोस्ट गरेका थिए । त्यसपछि नै हो, बालेनको राजनीतिक तयारी सुरु भएको ।

दलहरूको दबादबा भएकै कारण व्यक्तिगत स्वार्थमै रुमल्लिएको नेपालको राजनीतिमा स्वतन्त्र उम्मेदवार हुनुपर्छ भन्ने बालेनको तर्क सुरुदेखि नै थियो ।

त्यसैले पनि बालेनले ललितपुर महानगर- १० का तत्कालीन वडाध्यक्ष नरसिंह व्यञ्जनकारलाई आफ्नो गुरु मान्न पुगे, जो १०औँ पटकसम्म स्वतन्त्रबाट वडाध्यक्ष जित्दै आएका थिए ।

तिनै बालेन एक दिन ललितपुर महानगर– १० का तत्कालीन वडाध्यक्ष व्यञ्जनकारलाई भेट्न वडा कार्यालय पुगे । र, गुरु मानेका नरसिंहलाई आफू काठमाडौंको मेयर बन्न लागेको सुनाए ।

२७ वर्षीय र्‍यापर । कलिलो ठिटो ।

काठमाडौंको मेयर बन्छु भन्दै आएका बालेनलाई के भन्ने ? नरसिंह अक्क न बक्क परे ।

‘मेयर बन्छु त भन्नुभयो, तपाईंलाई काठमाडौंको इतिहास थाहा छ त ?’ मेयर बन्छु भनेका बालेनलाई नरसिंहको पहिलो प्रश्नले नै झस्कायो ।

‘अहँ,’ एक शब्दमै बालेनले नरसिंहको प्रश्नको उत्तर दिए ।

त्यसपछि नरसिंहले भने, ‘काठमाडौंको मेयर बन्ने हो भने यहाँको इतिहास, जात्रामात्रा, संस्कृति, कुमारी, देवालय, तीर्थबारे पहिले बुझेर आउनू... अनि मात्रै कुरा गरम्ला ।’

यति भन्दै नरसिंहले बालेनलाई बिदा दिए ।

०००

नभन्दै यसको केही महिनापछि बालेनले काठमाडौंको इतिहासबारे पढेर/बुझेर नरसिंहलाई भेट्न गए । बालेनको तयारी र अध्ययनबाट प्रभावित भएका नरसिंहले काठमाडौंबारे थप पढ्नुपर्ने र बुझ्नुपर्ने केही किताब समेत थमाइदिए ।

यसरी गरेका थिए बालेनले तयारी

काठमाडौंको इतिहास बुझेका बालेनले त्यसयता काठमाडौंको समस्या र समाधानबारे थप अध्ययन गर्न थाले ।

काठमाडौंका पानी, फोहोर, ढल, सडक, स्वास्थ्य, ट्राफिक, अर्थतन्त्र, कानुनबारे बुझ्न बालेनले विभिन्न विज्ञ र विशेषज्ञको परामर्श लिँदै राजनीतिक तयारीलाई तीव्रता दिए ।

‘इट्स माई सो विथ सुरजसिंह ठकुरी’ कार्यक्रममा बालेनले यसको जिकिर गरेका छन् । विज्ञानबारे महावीर पुन, कानुनबारे युवराज संग्रौला, स्वास्थ्यबारे सन्दुक रुइत, हिटी र पानीका स्रोतबारे सन्ध्या पराजुली खनाल, अर्थतन्त्रबारे सुरेन्द्र केसी, पूर्वसचिव भीम उपाध्याय, राजनीतिक अर्थशास्त्री दीपक ज्ञवाली, विनोद आचार्य, निर्देशक मनोज पण्डित, कलाकार मदनकृष्ण श्रेष्ठ, खेलसम्बन्धी पारस खड्कालगायतसँग उनले परामर्श गरी आफ्नो राजनीतिक एजेन्डा तयार पारेका थिए ।

तिनै विशेषज्ञहरूको परामर्शकै आधारमा काठमाडौं महानगरको समस्या हल गर्ने बालेनले बताउँदै आएका छन् ।

फरक पार्टीका नेतालाई आरोप-प्रत्यारोप गर्नुका साथै शब्दवमन गरेर मात्रै राजनीति गर्न सकिन्छ भन्ने पुरातन राजनीतिक शैलीलाई चिर्दै बालेनले विशेषज्ञसँग परामर्श लिएर राजनीतिक एजेन्डा तयार पार्दै आफ्ना विकासवादी मोडलको व्याख्या विश्लेषण गर्दै हिँडेका थिए । भिजन बाँड्दै हिँडेका थिए । जसका आधारमा नै उनले घोषणापत्र पनि तयार पारेका थिए ।

भ्रष्टाचारविरुद्धको विशेष फोर्स तयार गरी ब्युरो नै सञ्चालन गर्नेसमेत बालेनले उद्घोष गरेका छन् । डिजिटल सरकारदेखि आइडिया बैंकसम्मको योजना बुनेका बालेनको घोषणापत्र कत्तिको कार्यान्वयन हुन्छ, त्यो भने हेर्न बाँकी नै छ ।

घरैघरको कंक्रिट बनेर कुरुप भएको काठमाडौंलाई जीवन्त बनाउँछु भन्ने बालेनको महत्त्वाकांक्षा के सफल होला ? मेयरमा निर्वाचित भएसँगै बालेनको परीक्षा अब सुरु भएको छ ।

प्रकाशित मिति: बिहीबार, जेठ १२, २०७९ २०:२३