'फोन पे डिजिटल इकोनोमी कन्क्लेभ'को दोस्रो संस्करण २० जेठमा आयोजना हुँदै

A+ A A-

मुुलुकको अर्थतन्त्र तीव्र रूपमा डिजिटाइजेसनतर्फ गइरहेको कुरालाई मध्यनजर गर्दै फोन पे डिजिटल इकोनोमी कन्क्लेभको दोस्रो संस्करण आयोजना हुने भएको छ । ब्रान्ड वर्थ प्रालिको आयोजनामा यही २० जेठ शुक्रबारका दिन हुन लागेको हो ।

कोभिड १९ पछि नेपालीहरू डिजिटल प्रविधिका अनेकौँ आयाममा अभ्यस्त हुन थालेसँगै अर्थतन्त्र नै डिजिटलाइजेसनतर्फ फड्को मारिरहेकोे कुरालाई मध्यनजर गर्दै कन्क्लेभको आयोजना गरिएको हो ।कन्क्लेभमा डिजिटलाइजेसनका पछिल्ला सम्भावना, अवसर तथा चुनौतीहरूका बारेमा सबै सरोकारवालाहरूसँग बृहत् छलफल हुनेछ ।

यस वर्षको कन्क्लेभको मुख्य उद्देश्य कोभिड १९ को प्रभावबाट सामान्य हुँदै गएको आर्थिक गतिविधि र जनजीवनमा डिजिटलाइजेसनलाई कसरी आर्थिक वृद्धि र सामाजिक न्याय प्राप्तिका लागि प्रयोग गर्न सकिन्छ भन्ने रहेको छ ।

कन्क्लेभको दोस्रो संस्करणमा ‘बदलिँदो समय, बदलिँदो अर्थतन्त्र’, ‘सधैँका लागि प्रभाव (क्रिएटिङ इम्प्याक्ट्स द्याट लास्ट)’, ‘नेपाल : सानो बजार कि असीमित सम्भावना?’ तथा ‘हामीसँग नेपाली युनिकर्न पहिचान कहिले हुनेछ’ विषयमा विभिन्न चारवटा सत्रहरूमा बृहत् अन्तर्क्रिया र बहस हुनेछ ।

यी सत्रहरूमा नेपाली डिजिटल अर्थतन्त्रका प्रमुख सरोकारवालाहरू, नियमनकारी निकाय, तथा निजीक्षेत्रका प्रतिनिधिहरूको व्यापक सहभागिता रहनेछ ।

कन्क्लेभमा भिसाको दक्षिण एसिया र भारतका लागि ग्रुप कन्ट्री म्यानेजर सन्दीप घोष तथा नेपाल राष्ट्र बैंकका गर्भनर महाप्रसाद अधिकारीद्वारा कि–नोट स्पिच प्रस्तुत हुनेछ । साथै, नेपालको डिजिटल विकासका बारेमा अर्थमन्त्री जनार्दन शर्मा र सञ्चार तथा सूचना प्रविधिमन्त्री ज्ञानेन्द्रबहादुर कार्कीसँगको बेग्लै सत्रसमेत हुनेछ ।

यस कन्क्लेभमा देशका प्रमुख टेलिभिजन च्यानलका साथै अनलाइन मिडिया र अन्य डिजिटल प्ल्याटफर्ममार्फत प्रत्यक्ष प्रसारण हुने आयोजकले जनाएका छन् । फोनपे मुख्य प्रायोजक रहेको यस कन्क्लेभको कर्पोरेट प्रायोजकका रूपमा भिसा रहेको छ । डिजिटल इकोनोमीका बारेमा आयोजना गरिएको कन्क्लेभको दोस्रो सस्करणले आमनेपालीका लागि विशिष्ट महत्त्व राख्ने विश्वास गरिएको छ ।

प्रकाशित मिति: बिहीबार, जेठ १२, २०७९ १७:१५