सहजको डेमो डे : कृषिमा आधारित आठओटा आइडियाले प्रस्तुत गरे व्यावसायिक विचार र सामानहरू

सहजको डेमो डे : कृषिमा आधारित आठओटा आइडियाले प्रस्तुत गरे व्यावसायिक विचार र सामानहरू

A+ A A-

सहज भनेर चिनिने नेपाल कृषि बजार विकास कार्यक्रम (एनएमडीपी) दोस्रो चरणको कार्यक्रम ‘एग्री बिजनेस इन्क्युबेसन कार्यक्रम’ अन्तर्गत छनोट भएका कृषि व्यवसायमा आधारित आठओटा आइडियाले विराटनगरमा ९ जेठमा आयोजित 'डेमाे डे' मा आफ्ना व्यावसायिक विचार र आफूले बनाएका समानहरू प्रदर्शन गरे ।

एग्री बिजनेस इन्क्युबेसन कार्यक्रम एउटा यस्तो प्लेटफर्म हो जसले प्रदेश १ का कृषि उद्यमीहरूमा उद्यमशीलताका सीप र सोचाइहरूको विकास गर्ने लक्ष्य लिएको छ । उक्त कार्यक्रममार्फत छनोट भएका आठ आइडियाहरूले व्यवसाय विकास तथा विस्तारीकरणका लागि बिजनेस इन्क्युबेसन, मेन्टरसिप, प्रशिक्षण, नेटवर्किङ, बजारपहुँच, एग्री बिजनेससम्बन्धी विज्ञहरूको सेसन तथा इन्भेस्टमेन्ट प्लेटफर्महरूको अवसर पाएका छन् ।

उक्त 'डेमो डे' मा प्रदेश १ का कृषिमन्त्री झलकबहादुर मगर, प्रदेश सचिव मेगनाथ तिमल्सेना, स्वीस सरकार विकास सहयोग एसडीसीका आयुष राई, कृषि मन्त्रालयका प्रदेश योजना प्रमुख पशुपति पोखरेल, सहज-नेपाल कृषि बजार विकास कार्यक्रम दोस्रो चरणका टिमलिडर रिक भेन डर क्याम्प, मोरङ व्यापार संघका अध्यक्ष नवीन रिजाल, पूर्वाञ्चल विश्वविद्यालय व्यवस्थापन संकायका डीन प्राध्यापक डा. बिजुकुमार थपलिया, आइडिया स्टुडियो नेपालका कार्यकारी अध्यक्ष डा. छिरिङ लामालगायत विभिन्न प्राज्ञिक व्यक्तित्व, मिडियाकर्मी तथा उद्यमशीलताका क्षेत्रमा काम गरिरहेका व्यक्तित्वहरूको उपस्थिति थियो ।

'डेमो डे' का लागि छनोट भएका ८ कृषि व्यवसाय- शखाबुङ डेरी उद्योग, समृद्ध नेपाल कृषि सहकारी, नमुना कृषि, रीतिरिवाज आइसक्रिम, कुमारी फुड्स, ग्रीन प्लानेट मिसन, पाकशाला, किसानपिडियाहरूले आ–आफ्ना व्यावसायिक विचारहरू प्रस्तुत गर्नुका साथै आफूले बनाएका सामानहरू पनि प्रदर्शन गरे।

यसरी एग्री बिजनेस इन्क्युबेसन प्रोग्राममार्फत सहभागीहरूले आफ्नो व्यावसायिक आइडियाबाट एउटा मूर्त प्रोटोटाइप, व्यावसायिक रणनीति बनाएर मार्केट रेडी कमर्सियल प्रोडक्टको रूपमा आफूलाई विकास गर्ने लक्ष्यले अगाडि बढेका छन् ।

विकास तथा सहकार्यका लागि सहजद्वारा सुरु गरिएको परियोजना, आइडिया स्टुडियो नेपाल, कृषि मन्त्रालय प्रदेश १, पूर्वाञ्चल विश्वविद्यालय स्कुल अफ म्यानेजमेन्ट र मोरङ व्यापार संगठनको सहकार्यमा सुरु भएको यो आफैँमा एक पृथक् कार्यक्रम हो । यस कार्यक्रमले प्रदेश १ मा उद्यमशीलताको सीप र सोचाइको विकास गर्दै स्थानीय संघसंस्थाहरूको उद्यमशीलताको क्षमतालाई समेत बढाउने उद्देश्य लिएको छ ।

प्रकाशित मिति: बिहीबार, जेठ १२, २०७९ १७:१६