यामाहाको नयाँ बाइक एफजेडएक्स १५० नेपाली बजारमा, यस्ता छन् विशेषता

A+ A A-

यामाहाको बहुप्रतीक्षित बाइक एफजेडएक्स १५० बिहीबारदेखि बिक्री सुरु गरिएको छ । सो बाइकलाई यामाहाको नेपालका लागि आधिकारिक बिक्रेता एमएडब्लू इन्टरप्राइजेजले नेपालमा भित्र्याएको हो ।

एमएडब्लू इन्टरप्राइजेजले भृकुटीमण्डमा गत वैशाख १५-२१ मा आयोजना भएको 'महा एक्सचेञ्ज मेला' को अवसर पारेर उक्त बाइक सार्वजनिक गरेको थियो ।

कम्पनीका अनुसार एफजेडएक्स १५० यामाहाको पहिलो ‘नियो रेट्रो’ बाइक हो, जसमा एलसिडी मिटर र ब्लुटुथ कनेक्टिभिटीजस्ता स्मार्ट सुविधाहरू र क्लासिक डिजाइनका साथ निर्माण गरिएको छ ।

‘राइड फ्रि’ अवधारणाका साथ तयार पारिएको यो मोटरसाइकल विशेष गरी स्वतन्त्र, सहज र आरामदायी यात्रा रुचाउने बाइकप्रेमीलाई लक्षित गरी तयार पारिएको कम्पनीले बताएको छ ।

यो बाइक 'महा एक्सचेञ्ज मेला' मा नेपाली सिनेकर्मी अनमोल केसीले समेत टेस्ट राइड गरिसकेको बाइक हो । यो अल न्यू एफजेडएक्स १५० बाइक फ्युल-इन्जेक्टेड (एफआई) र भारत स्ट्यान्डर्ड ०६, एयरकुल्ड, १५० सीसी ब्लु कोर इन्जिन र ५ स्पिड गियर बक्सका साथ तयार पारिएको छ । यसले ७२५० आरपीएममा १२.४ पीएस अधिकतम पावर तथा ५५०० आरपीएममा १३.३ एनएम टर्क जेनेरेट गर्छ ।

यामाहाका अन्य मोटरसाइकलहरूभन्दा अलि फरक प्रयोजनका निम्ति तयार पारिएको यस मोटरसाइकलको हरेक ‘डिटेल’ चालकलाई विशेष ध्यानमा राखी तयार पारिएको कम्पनीको दाबी छ ।

उत्कृष्ट कौशलकारिताका साथ तयार पारिएको ‘टु-लेभल सिट’, बलियो ‘ब्लक प्याट्रन टायर’, ‘फ्रन्ट फोर्क बुट’ का साथ स्थिर टेलिस्कोपिक सस्पेन्सन र ब्लुटुथ कनेक्टिभिटीजस्ता विशेषताले यो बाइकलाई बलियो, आकर्षक र स्मार्ट बनाएको यामाहा नेपालका सीईओ राजु क्षेत्रीले बताए । साथै, डीआरएलका साथ बाइ फङ्सनल एलईडी हेडलाइट र ओभल सेपको एलईडी रिङ टेललाइटले बाइकको भिजुअललाई थप आकर्षक बनाएको उनको भनाइ छ ।

आइतबारबाट नेपालभरका यामाहाका शोरुममा उपलब्ध हुने जनाइएको यो बाइकको मूल्य ४ लाख २६ हजार ९ सय रुपैयाँ तोकिएको कम्पनीले जनाएको छ ।

यससँगै कम्पनीले आफ्नो नयाँ स्किम 'रोड टु मोटो जिपी' पनि सञ्चालन भइसकेको कम्पनीले जनाएको छ । यो स्किमअन्तर्गत यामाहाका कुनै पनि बाइक खरिद गर्ने चार भाग्यशाली विजेताहरूले यामाहा प्याडकबाट च्याङ अन्तर्राष्ट्रिय सर्किट, थाइल्यान्डको प्रत्यक्ष मोटोजिपी प्रसारण हेर्ने सुवर्ण अवसर पाउनेछन् । यो स्किम आजबाट यामाहाका जुनसुकै बाइक र स्कुटरको खरिदमा लागू हुने कम्पनीले जनाएको छ ।

प्रकाशित मिति: बिहीबार, जेठ १२, २०७९ १७:१६