पोखरामा खगराजको चेतावनी- लडाइँको मोर्चामा छौँ, एमालेबेगर चल्ने दुस्साहस नगरे हुन्छ

पोखरामा खगराजको चेतावनी- लडाइँको मोर्चामा छौँ, एमालेबेगर चल्ने दुस्साहस नगरे हुन्छ

A+ A A-

नेकपा एमालेका स्थायी कमिटी सदस्य तथा संगठन विभाग प्रमुख खगराज अधिकारीले पार्टीभित्रकै अन्तर्घातले चुनाव हारेको स्वीकारेका छन् ।

पोखरामा उपमेयरसहितका नवनिर्वाचित जनप्रतिनिधिको विजयी र्‍यालीलाई सम्बोधन गर्दै उनले भने, ‘सामाजिक सञ्जालमा हाम्रा साथीहरूको कमेन्ट हेरेको छु । तपाईंहरूसँग शिर निहुरार्‍याएर निवेदन गर्न चाहन्छु, हामीले जुन सफलता प्राप्त गर्न सकेनौँ त्यो हाम्रै कारण हो । कास्की जिल्लाको मतदाता, पार्टी स्थायी कमिटी सदस्यको हैसियतले मैले जे गर्नुपर्ने हो त्यो गरेँ । तर, नेतृत्व तहबाटै कमीकमजोरी बाँकी रहे । त्यसमा आत्मआलोचित हुँदै आगामी दिनमा ती कमजोरी नदोहोर्‍याउने बाचा गर्दछु ।’

पोखराको मेयर पराजित हुनुमा उनै अधिकारी र उपमहासचिव पृथ्वीसुब्बा गुरुङको गुटगत प्रतिस्पर्धालाई लिइन्छ । उनले निर्वाचित भएका जनप्रतिनिधिलाई पाँच वर्ष लालसिपाहीको रूपमा खडा हुन आग्रह गरे ।

‘जो निर्वाचित हुनुभयो, तपाईंहरूले एकजुट भएर ५ वर्ष एमालेको नीतिबाहिर गएर पोखरालाई तस्करको पञ्जामा नगरपालिका लान कसैले चाहन्छ भने हाम्रा ८६ जना सिपाही खडा हुनेछन् । जवाफ दिनेछन् एमालेको अभियान पोखरा बनाउने हो भनेर,’ उनले भने, ‘तपाईंहरू सबै जना पाँच वर्षको मोर्चामा खटिनुहुनेछ ।’

उनले वडा नम्बर १८ र ३१ मा जालसाजी गरेर आफ्ना उम्मेदवारलाई हराइएको आरोप लगाएका छन् । ‘जालसाजी गरेर वडा नम्बर ३१ र १८ मा मतपत्र लुकाएर हामीलाई हराइएको नाटक गरिएको छ । हामी युद्ध मैदानमा फेरि खडा हुनेछौँ । हाम्रा मतपत्र जानीजानी लुकाइएको छ,’ अधिकारीले भने, ‘कर्मचारी साथीहरूलाई भन्न चाहन्छौँ, तपाईं इमानदार बनेर कसैले १ सिट जित्दैमा त्यसको जित ठानेर एमालेलाई मिनिमाइज गर्नुभयो । यो हिसाबकिताब एमालेले राखिरहन्छ ।’

उनले गठबन्धनले लुटपाट र घुसपैठ गरेर चुनाव जितेको आरोप लगाए । ‘तथाकथित् लुटपाट गरेर, घुसपैठ गरेर, एमालेलाई कमजोर पार्ने कोसिसका साथ जितेका भए पनि अरू पदाधिकारीले एमालेबेगर चल्ने दुस्साहस नगरे हुन्छ । हामी लडाइँको मोर्चामा छौँ,’ अधिकारीले भने ।

प्रकाशित मिति: बुधबार, जेठ ११, २०७९ १८:१३