बालेनले भने- विजय जुलुस निकाल्न काठमाडाैं नआउनू

A+ A A-

काठमाडाैं महानगरपालिकाकाे मेयरमा विजय सुनिश्चित भएका बालेन साहले आफू विजय जुलुस निकाल्ने पक्षमा नरहेकाे बताएका छन् । मतगणना अन्तिम चरणमा रहेकाे र विजय सुनिश्चित रहेकाे अवस्थामा सामाजिक सञ्जालमार्फत बालेनले घाेषणापत्रमा लेखिएका कुराहरू लागू गर्न सकेका दिन सबै मिलेर विजय उत्सव मनाउने तर अहिले विजय जुलुस भनेर अरुलाई पराजित भन्ने संकेतसम्म पनि नगर्न समर्थकलाई आग्रह गरेका छन् ।

बालेनले काठमाडाैं महानगरको जिम्मेवारी बोक्न योग्य रहेकाे भनेर महानगरका मतदाताहरूले विश्वास गरेकाले विश्वासमा जित वा हार नहुने पनि बताएका छन् । 'जित-हारलाई मतगणना सकिएसँगै सकिदिऊँ । घोषणापत्रमा भएका कुराहरू लागू गर्न सकेका दिन सबै मिलेर विजय उत्सव मनाऊँला । तर, अहिले विजय जुलुस भनेर अरुलाई पराजित भन्ने संकेतसम्म पनि नगरौँ', उनले भनेका छन् ।

सामाजिक सञ्जालमा एक अपिल जारी गर्दै बालेनले विभिन्न ठाउँबाट विजय जुलुस निकाल्न मानिसहरू काठमाडाैं आइरहेकाे सूचना पाइएकाले त्यसाे नगर्न पनि आह्वान गरेका छन् । बरु अभियानलाई सफल पार्ने मनसाय हाे भने आ–आफ्नै क्षेत्रमा धन्यवाद र्‍याली निकाल्न उनले भनेका छन् ।

'ठाउँठाउँबाट र्‍यालीका लागि काठमाडाैं आउने कुराहरू एकदमै धेरै सुनिरहेका छौँ । हाम्रो अनुरोध के हुन्छ भने तपाईंहरू कोही पनि र्‍यालीका लागि काठमाडाैं आउने दु:ख गर्नुपर्दैन । यो अभियान सबैको हो । यसको स्वामित्व हरेक नेपालीले जहाँबाट जसरी लिइदिए पनि हामी खुसी हुनेछौँ । अभियानको अहिलेसम्मको सफलताका लागि खुसीयाली प्रकट गर्ने नै हो भने पनि तपाईं रहेकै क्षेत्रमा 'धन्यवाद र्‍याली' गर्नुहोला । त्यसले सो स्थानमा बढी प्रभाव छोड्छ', बालेनले भनेका छन् ।

बालेनले अबकाे बाटाे सहज नभएकाे पनि बताएका छन् । 'अबको बाटो सहज छैन । हाम्रो अभियानको वास्तविक परीक्षा अब सुरु हुनेछ । हामीले हिँड्ने सही बाटो, चाल्ने उपयुक्त कदम र गर्ने अधिकतम सत्प्रयासहरूले हाम्रो अभियान र महानगरको उन्नतिलाई प्रभाव पार्नेछ', उनले भनेका छन्, 'हामीलाई साथ र सुझाव जति महत्त्वपूर्ण छ, उति नै खाँचो पर्नेछ खबरदारीको । हामीले बाटो बिराउन लाग्यौँ भने खबरदारी गर्नुहोला ।'

उनले याे अभियानलाई देशव्यापी बनाउने प्रयास गर्न पनि अपिल गरेका छन् । 'हरेक टोलटोल र गाउँगाउँमा 'बालेन'हरू भेटिऊन् । जसले केवल जनमतका आधारमा परिवर्तनको जिम्मेवारी बोक्न सकून्, अवसर पाउन सकून् । अबको हाम्रो पहिलो यात्रा काठमाडौंको मुहार फेर्नलाई हुनेछ । मिलेर अगाडि बढौँ', बालेनले भनेका छन् ।

प्रकाशित मिति: बुधबार, जेठ ११, २०७९ ११:२२