सरकारले बर्सेनि गर्छ हुम्लामा सडक पुर्‍याउने वाचा, कहिले पूरा हुने टुंगाे छैन

सरकारले बर्सेनि गर्छ हुम्लामा सडक पुर्‍याउने वाचा, कहिले पूरा हुने टुंगाे छैन

A+ A A-

सरकारले अगामी आर्थिक वर्षको नीति तथा कार्यक्रममा हुम्लालाई सडक सञ्जालसँग जोड्ने घोषणा पुनः एक पटक दाेहाेर्‍याउँदा अदाङचुला गाउँपालिका निवर्तमान उपाध्यक्ष कर्ण रोकाया चामल किन्न घण्टौँ हिँड्नु नपर्ने दिनको प्रतीक्षा लामाे भइसकेकाे बताउँछन् ।

‘हामी त चामल किन्नलाई अहिले पनि ४८ घण्टा हिँडेरै सदरमुकाम पुग्छौँ,' उनले भने, 'सिकिस्त बिरामी परियो भने त बाँच्ने आशा नगरे पनि हुन्छ । गाडी भए पो छिटो पुगौँ भन्नु ।’

हुम्ला राष्ट्रिय सडक सञ्जालमा जाेडिएकाे छैन । सडक नहुँदा हुम्लाले कहिले भोकमरी त कहिले महामारी खेप्दै आएको छ । राेकाय हरेक वर्ष सरकारको योजनामा सडक बनाउने योजना प्राथमिकतामा परे पनि सडक सञ्जाल कहिले जाेडिने हाे, कुनै टुंगाे नभएकाे गुनासो गर्छन् । उनले भने, ‘अघिल्ला वर्षहरूमा पनि हुम्लामा सडक बनाउने भनेर सरकारले भनेको थियो । यस्तो विकट ठाउँमा सरकार आउन खोजे पनि सडक भने आउन सकेन ।’

हुम्लाको ८० प्रतिशत भूभागमा सडक पुगेको छैन भने अधिकांश स्थानमा गोरेटो बाटोबाटै जोखिमपूर्ण यात्रा गर्नुपर्ने अवस्था छ । सडक नपुगेकै कारण हरेक वर्ष भोकमरी खेप्दै आएका हुम्लाका बासिन्दा सडक बन्न नसक्दा आफूहरू पछि परेको गुनासो गर्छन् ।

सरकारले सडक सञ्जाल पुर्‍याउने भनेर १० वर्षअगाडि नै हुम्लालाई राष्ट्रिय सडक सञ्जालसँग जोड्ने गरी कर्णाली कोरिडोरको योजना अघि सारेको थियो । घोषणा गरेको दश वर्ष बित्यो तर सडक पुग्न सकेन ।

राेकाय हरेक वर्ष सरकारले हुम्लालाई सडक सञ्जालसँग जोड्ने योजना भने पनि भूविकटताकै कारण योजना सफल हुन नसकेको गुनासो गर्छन् । भन्छन्, ‘सदरमुकामछेउछाउमा सवारीसाधन चल्छन् । हामी भने तिनै सवारीसाधन देख्न पनि ४८ घण्टा हिँड्नुपर्छ । सरकारले बनाउँछु भनेको धेरै वर्ष भयो । अझै कति वर्ष लाग्ने हाे ?’

राष्ट्रिय गौरवको आयोजनाअन्तर्गत २०६५/६६ मा कर्णाली कोरिडोरको योजना अघि सारिएको हो । १२ वर्षसम्म पनि सरकारले हुम्ला जिल्लालाई भने सडक सञ्जालसँग जोड्न सकेको छैन । कालीकोटको खुलालुदेखि हुम्ला सदरमुकाम सिमकोट जोड्ने १३७ किलोमिटर सडकको निर्माण भए पनि सिमीकोट जोड्ने ८ किलोमिटर सडक भने नबन्दा हुम्ला सडकसञ्जालबाट वञ्चित रहँदै आएको छ । नेपाली सेनाले निर्माण गरिरहेको उक्त सडक हुम्ला जोड्न ९ किलोमिटरमा भने भौगोलिक कठिनाइ देखाउँदै निर्माण कार्य अगाडि बढ्न सकेको छैन ।

सिमीकोटभित्रै सहायक सडकहरू निर्माण भएर हिल्सा, चंखेली, बेउलीलगायतका क्षेत्रमा सडक पुर्‍याइएको छ । त्यसबाहेकका क्षेत्रमा सडक पुगेको छैन । गोरेटो बाटोबाटै स्थानीयले गुजारा चलाउँदै आएका छन् ।

अग्ला चट्टाने भिर भएकै कारण बाटो निर्माण हुन नसकेको बताउने रोकाया बर्सेनि ३० जनासम्म सडककै कारण भिरबाट खसेर मृत्यु हुने गरेको बताउँछन् । उनी भन्छ्न, ‘चट्टानको उकालैउकालो हिँड्नुपर्छ । कति त लडेर मर्छन् ।’

गाउँमा सडक पुर्‍याउन यतिबेला स्थानीय निकायहरू पनि अग्रसर भइरहेका छन् । कर्णाली प्रदेशमा पर्ने हुम्ला जिल्लामा छवटा गाउँपालिका छन् । जसमा दुई गाउँपालिकामा सडक पुगे पनि बाँकी चारवटा गाउँपालिकामा गोरेटो सडक मात्रै छ । स्थानीय तहले सरकारलाई सडक बनाउन ताकेता गरिरहे पनि भौगोलिक कठिनाइ देखाउँदै निर्माण कार्यलाई तीव्रता दिन सकेको छैन ।

हुम्लाका संघीय सांसद छक्कबहादुर लामा सरकारको योजना एक वर्षमा पूरा नहुने धारणा राख्छन् । नीति तथा कार्यक्रममार्फत सरकारले चालु आर्थिक वर्षमै सडक सञ्जाल पुर्‍याउने योजना अघि सारे पनि सांसद लामा अझै दुई वर्ष लाग्ने अनुमान गर्छन् । भन्छन्, ‘सडक सञ्जालमा सेनाले काम गरिरहेको छ । सिमीकोट जोड्ने ८ किलोमिटर सडकमा ठूलो चट्टान भएर काम अल्झिएको हो ।’

राेकाय पनि चट्टान फुटाउनका लागि अत्याधुनिक मेसिन नआउँदा बाटो निर्माणको काम छिटो हुन नसकेको बताउँछन् । उनले भने, ‘सरकारले सधैँ योजना समेट्ने मात्रै काम नगरोस् । अत्याधुनिक मेसिनहरू ल्याएर सडक बनाउने काम पनि चाँडै गरोस् ।’

प्रकाशित मिति: मंगलबार, जेठ १०, २०७९ २०:३३