यस्तो छ ६८ लाख रुपैयाँको बाइक, नेपालमा पाइने महंगा बाइक यी हुन्

A+ A A-

नेपालमा बाइक प्रयोगकर्ताहरुको संख्या बढ्दो छ । आवश्यकताका कारण बाइक प्रयोग गर्ने मात्रै होइन, सोखकै लागि बाइक प्रयोग गर्नेहरुको संख्या पनि उल्लेख्य छ ।

नेपाली ग्राहकको आवश्यकता र इच्छालाई ध्यानमा राख्दै वितरक कम्पनीले बिभिन्न थरिका बाइक नेपाली बजारमा भित्र्याएका छन् । हाल नेपाली बजारमा बिभिन्न ब्राण्डका १ लाख ६० हजारदेखि ६८ लाख रुपैयाँसम्मको बाइक उपलब्ध छन् । जसमध्ये नेपालमा पाइने सबैभन्दा महंगा बाइकहरु यस्ता छन् ।

डुकाटी

नेपालमा पाइने सबैभन्दा महंगो बाइक डुकाटीको हो । डुकाटीका बाइकको मूल्य २० लाख रुपैयाँभन्दा माथि छ । यसको सबैभन्दा महंगो बाइक डुकाटी १२९९ पेनीगेलआर हो । जसको नेपाली बजार मूल्य ६८ लाख रुपैयाँ छ । १ हजार २ सय ८५ सीसीको यो बाइकको तौल १९० केजी हुन्छ भने ६ ओटा गियर छ ।

डुकाटी डिभेल टुटानियमको नेपाली बजार मूल्य ५८ लाख ५० हजार रुपैयाँ छ । १ हजार १ सय ९८ सीसीको यो बाइकमा पनि ६ नम्बरसम्म गियर छ ।

त्यस्तै डुकाटी मल्टिस्ट्राडाको ४५ लाख, डुकाटी डिभेल कार्बनको ४२ लाख ५० हजार, डुकाटी मन्स्टर्डको नेपाली बजार मूल्य ३६ लाख रुपैयाँ छ ।

सुजुकी

सुजुकी ब्राण्डको नेपालमा पाइने सबैभन्दा महंगो बाइक सुजुकी हायाबुसा हो । यसको नेपाली बजार मूल्य ३६ लाख रुपैयाँ छ । १ हजार ३ सय सीसीको यो मोटरसाइकलले प्रतिलिटर ११ किलोमिटर बराबरको माइलेज दिने कम्पनीको दाबी छ ।

सुजुकीको अर्को महंगो बाइक हो सुजुकी बि–किङ्ग । यसको नेपाली बजार मूल्य ३१ लाख रुपैयाँ छ । १ हजार ३ सय ४० सीसीको यो मोटरसाइकलमा ६ ओटा गियर छन् भने १७ किलोमिटर माइलेज दिन्छ ।

सुजुकी जिएसएक्स्आर सिक्सहन्डे«डको नेपालमा २१ लाख २० हजार रुपैयाँ पर्छ । ५९९ सीसीको यो बाइकले १५ देखि २० किलोमिटर माइलेज दिन्छ ।

यामाहा

यामाहा ब्राण्डको नेपालमा पाइने सबैभन्दा महंगो बाइक यामाहा वाइजेडएफ आर सिक्स् हो । जसको नेपाली बजार मूल्य २७ लाख रुपैयाँ छ । ५९९ सीसीको यो बाइकले १५ देखि २० किलोमिटर माइलेज दिन्छ ।

त्यस्तै, यामाहाकै एक्स्जे सिक्स् नेपालमा पाइने यामाहाको दोस्रो महंगो बाइक हो । यसको नेपाली बजार मूल्य १५ लाख १७ हजार रुपैयाँ छ । यो बाइक ६०० किलोमिटर प्रतिघण्टाका दरले कुद्न सक्छ ।

यामाहा एफजेडएफ आरथ्री यामाहाको नेपालमा पाइने महंगो बाइकमध्ये एक हो । जसको नेपालमा ९ लाख २४ हजार रुपैयाँ पर्छ । ३२१ सीसीको यो बाइकमा ६ ओटा गियर छन् । यसले २२ किलोमिटर माइलेज दिन्छ ।

होण्डा

नेपाली बजारमा उपलब्ध होण्डाको सबैभन्दा महंगो बाइक होण्डा सिआरएफ वन थाउजेण्ड अफ्रिका ट्विन हो । यसको नेपाली बजार मूल्य २६ लाख ५० हजार रुपैयाँ छ । ९ सय ९८ सीसीको यो बाइकमा ६ ओटा गियर छन् ।

होण्डाको सिबिआर सिक्सहण्डे«ड आरआरको नेपाली बजार मूल्य २४ लाख २५ हजार रुपैयाँ छ । ५९९ सीसीको यो बाइकमा पनि ६ ओटा गियर छन् ।

होण्डा सिबिआर सिक्स फिफ्टी एफको नेपालमा १९ लाख ९९ हजार रुपैयाँ पर्छ । ६ सय ५० सीसीको यो बाइकमा ६ ओटा गियर छन् भने २० किलोमिटर माइलेज दिन्छ ।

होण्डा ब्राण्डको अर्को महंगो बाइक हो होण्डा हर्नेट । जसको नेपाली बजार मूल्य १६ लाख ९९ हजार रुपैयाँ छ । यो बाइकमा पनि ६ ओटा गियर छ ।

यी बाहेक होण्डाको सिआरएफ २५०, सिबिआर २५० आर, होण्डा टोर्नाडो लगायतका बाइक पनि महंगा बाइकहरु हुन । जसको मूल्य १० लाख रुपैयाँ भन्दा बढी रहेको छ ।

बजाज

बजाज ब्राण्ड नेपालमा निकै रुचाइएको ब्राण्ड हो । यसका पल्सर, डिस्कभर, एभेन्जरलगायतका बाइकहरु नेपालमा लोकप्रिय छन् । बजाज ब्राण्डको नेपालमा पाइने सबैभन्दा महंगो बाइक कावासकी ६५० हो । जसको नेपालमा १८ लाख ९९ हजार रुपैयाँ पर्छ । ६४९ सीसीको यो बाइकमा ६ ओटा गियर छन् भने १५ देखि २० किलोमिटर माइलेज दिन्छ ।

सोही मोडलको कावासकी निन्जा ६५० मोडलको मुल्य १३ लाख ५० हजार पर्छ भने कावासकी निन्जा ३०० को ९ लाख ९९ हजार ९ सय ९९ रुपैयाँ पर्छ ।

बिएमडब्लू

नेपलमा बिएमडब्लू ब्राण्डका बाइकहरु पनि उपलब्ध छन् । उक्त ब्राण्डको बिएमडब्लू एफ ८५० जिएस् मोडलको बाइकको नेपालमा ३६ लाख रुपैयाँ पर्छ । ८५३ सीसीको यो बाइकले ४० किलोमिटर प्रतिलिटर माइलेज दिन्छ ।

त्यस्तै, ३१३ सीसी इन्जिन क्षमता र ३० किलोमिटर माइलेज भएको बिएमडब्लू ३१० जिएसको नेपाली बजार मूल्य १० लाख ९० हजार रुपैयाँ छ । त्यस्तै, बिएमडब्लू जी १० आरको ९ लाख ५० हजार रुपैयाँ पर्छ ।

बेनेली

नेपालमा पाइने महंगा बाइकमध्ये बेनेली ब्राण्डको बाइक पनि एक हो । जसको नेपालमा २ लाख ३० हजारदेखि २१ लाख रुपैयाँसम्म पर्ने गरेको छ ।

बेनेली टिएनटी ६०० आईको नेपालमा २१ लाख रुपैयाँ पर्छ । त्यस्तै बेनेली टिआरके ५०२ को १६ लाख पर्छ भने बेनेली टोर्नाडोको ७ लाख ५० हजार रुपैयाँ पर्छ ।

रोयल इनफिल्ड

रोयल इनफिल्डका बाइकहरु नेपाली युवा पुस्ताले निकै रुचाएका छन् । यसका धेरैजसो बाइकहरुको मूल्य ५ लाख रुपैयाँदेखि माथि नै पर्ने गरेको छ ।

रोयल इन्फिल्ड थन्डर वर्ड ५०० को नेपाली बजार मूल्य ८ लाख २१ हजार रुपैयाँ छ । त्यस्तै कन्टिनेन्टल जिटी ५३५ सीसी बाइकको मुल्य ७ लाख २१ हजार रुपैयाँ पर्छ भने क्लासिक क्रोमको मूल्य ६ लाख ८१ हजार रुपैयाँ पर्छ ।

प्रकाशित मिति: सोमबार, असार ३०, २०७६ २२:२४