पोखरामा मेट्रो रेल चल्छ, बजेट चार गुणा बढाएर छोड्छुः धनराज आचार्य (अन्तर्वार्ता)

पोखरामा मेट्रो रेल चल्छ, बजेट चार गुणा बढाएर छोड्छुः धनराज आचार्य (अन्तर्वार्ता)

A+ A A-

पोखरा महानगरपालिकाको मेयरमा सत्तारुढ गठबन्धनबाट नेकपा एकीकृत समाजवादीका धनराज आचार्य विजयी हुने पक्का भएको छ । अन्तिम परिणाम घोषणा नभए पनि आचार्यले ६ हजार हाराहारीको मतान्तरले जित्ने निश्चित भएको छ । एमालेका कृष्णबहादुर थापालाई पराजित गर्दै आचार्य पोखराको १५औँ मेयर बन्ने पक्कापक्की भएको हो । उपमेयरमा भने गठबन्धनबाट उम्मेदवार रहेकी नेपाली कांग्रेसकी कोपिला रानाभाट एमालेकी मञ्जुदेवी गुरुङसँग पराजित हुने निश्चित भएको छ ।

आचार्यले घोषणापत्रअनुसार नै पाँच वर्षभित्र पोखरामा मेट्रो रेल चल्ने दाबी गरेका छन् । सुशासन, पोखरा बसपार्क व्यवस्थापन, ल्यान्डफिल साइटको व्यवस्थापन उनका मुख्य योजना हुन् । प्रस्तुत छ, आचार्यसँग गरिएको कुराकानीः

चुनावको परिणाम अपेक्षित नै हो ?

मैले चुनाव हुनुभन्दा पहिल्यै १५ देखि १८ मतले गठबन्धनले जित्छ भनेको थिएँ । १४ देखि १६ हजार मत बदर भएको सुन्नमा आएको छ ।

उम्मेदवार नभएको दलको चिह्न पनि मतपत्रमा राख्ने भनेर अन्तिममा निर्णय भयो । पहिलो छाप कलममा, बाँकी सबै रुखमा भनेर गठबन्धन भएका १६ वटा वडामा प्रचार गरेका थियौँ । अन्तिममा हामीले पहिलो रुख छोड्नपर्छ भन्न जानै भ्याएनौँ । त्यो मत पनि जोड्ने हो भने हाम्रो मत २० देखि २५ हजारको बीचमा छ । बदर नै स्वीकार्दा पनि ६ हजार हाराहारीको मतान्तरले जितेका छौँ ।

उपमेयरमा केही मत नपुग्दा सँगै निर्वाचित हुन सकेनौँ । परिणामलाई स्वीकार्नेबाहेक अन्य विकल्प छैन । मेयर र उपमेयर सेट नै नआउँदा म दुःखी छु । चुनाव लड्दासम्म म, उपमेयर र वडा जनप्रतिनिधि दलका थियौँ । शपथग्रहण गरेपछि हामी सबै पोखराका नागरिकको साझा प्रतिनिधि हुनेछौँ । कुन पार्टीका थियौँ, कसले भोट दिएको थियो भन्दा पनि सबैले भोट दिनुभएको बुझेर अगाडि बढ्नेछौँ ।

कोपिला रानाभाट पनि निर्वाचित भएको भए हामीले जुन योजना बनाएका थियौँ, त्यो कार्यान्वयन गर्न सजिलो हुन्थ्यो । कोपिलाजीलाई म महानगरमा सल्लाहकारको रूपमा सँगै राखेर लैजान्छु । त्यस कारण हामी टिममा नै रहन्छौँ ।

पोखरामा एकीकृत समाजवादीबाट मेयरबाहेक अरु जनप्रतिनिधि हुनुहुन्न । गठबन्धन नै भए पनि नगरसभा अल्पमतमा पर्ने देखिन्छ । यसले असर गर्ला नि ?

यो गठबन्धन हामीले पाँच वर्षलाई गरेका हौँ । माथि जेसुकै भए पनि यो पाँच वर्ष कायम रहन्छ । पोखरा बनाउने कुरामा सबैको साझा निर्णय हुन्छ । घोषणापत्रमा एमाले र हाम्रा शब्द फरक होलान् । आशय एउटै छन् ।

नगरसभामा हामीले नचाहिने विषय लैजाँदैनौँ । सबैको कुरा पोखरा बनाउने नै हो । नगरसभा प्रत्यक्ष प्रसारण हुन्छ । नचाहिने कुरामा विरोध गरेर जनताका अगाडि नाङ्गिने काम कसैले गर्नुहुन्न । हाम्रो बोर्डका सबै निर्णय सर्वसम्मत गर्ने मेरो प्रयत्न हुनेछ । त्यहाँ कुनै स्वार्थ राखिने छैन । स्वार्थ नराखी काम गरिन्छ भने अल्पमत, बहुमत भन्नुपर्ने कुरा छैन ।

त्यस्तो हो भने काठमाडौं, धनगढी, जनकपुर, धरानको मेयर एक्लै हुनुहुन्छ । म पार्टीबाट आएको हो । एमालेबाट आएका साथी हिजो सँगै काम गरेकाहरू हुनुहुन्छ, त्यसैले उहाँहरूलाई सम्बोधन गर्न मलाई गाह्रो छैन । गठबन्धनमा त मसँगै आएको भएँ । उहाँहरूको अंशहंस साथमै छ । पाँच वर्ष काम गर्ने भनेर साझा घोषणापत्र बनाएका छौँ । त्यो घोषणापत्र लागु गर्न गठबन्धनभित्र अल्पमत राख्नुपर्ने कुरै भएन ।

घोषणापत्रमा मेट्रो रेलको परिकल्पना गर्नुभएको छ । सम्भव छ ?

दुईवटा ताल जोड्ने कुरा गरेका छौँ । पाँच वर्षभित्रमा त्यो देख्नुहुन्छ । उज्यालो हेर्न बिहानसम्म कुर्नुपर्छ । पहिला गर्छु भनेका काम नगरिएकाले यिनले गर्लान् र भन्ने आशंका छ । हामी जे भनेका छौँ, त्यो गर्छौं । त्यसमा सबै पोखरेली जनताको साथ रहनेछ ।

मतगणना हुँदाहुँदै काठमाडौँ गएर मन्त्रीहरू भेटेर आउनुभयो । के–के माग्नुभएको छ ?

म निर्वाचित हुन्छु भन्ने थाहा थियो । कहाँबाट कति भोट आएको छ, जितको सम्भावना कति छ भन्ने सबै उम्मेदवारले आकलन गर्छन् । हाम्रो टिमले पनि गरिरहेको थियो । हाम्रो भोट आकलन गर्न बनेको टिमले गरेको सर्वेक्षण अहिलेसम्म एकदमै सही छ ।

संघीय सरकारको बजेट १५ जेठमा आउँदै छ । महानगरका सबै संयन्त्रसँग बुझ्दा ल्यानडफिल साइट व्यवस्था नगरी भएको छैन । पोखरामा नयाँ विमानस्थल नचलाई भएको छैन । त्यसको वैकल्पिक कुरा छैन भनेपछि अहिले काम नभए एक वर्ष कुर्नुपर्ने हुन्छ ।

काठमाडौं गएर अर्थमन्त्रीज्यूलाई भेटेँ । शहरी विकास मन्त्रालयबाट त्यसलाई फलोअप गर्नुपर्ने रहेछ । मेयरको उम्मेदवार चुनावको मतगणना नै छोडेर आएपछि सदाशयता देखाउनुभयो । पोखराको ल्यान्डफिल साइटलाई सुरुमा केही रकम विनियोजन गर्ने र पछि आवश्यकताअनुसार गर्ने गरी प्रक्रियामा गएको छ । यो खुसीको कुरा हो ।

पोखरालाई पर्यटकीय राजधानी घोषणा गरियोस् भनेर नीति तथा कार्यक्रममा राखिदिन अनुरोध गरेँ । अर्थमन्त्री, पर्यटनमन्त्रीले त्यसलाई स्वीकार गर्नुभएको छ । मलाई आशा छ, त्यो काम भएर आउँछ ।

पहिलो बजेटका योजना प्राथमिकता के-के हुनेछन् ?

मेगा प्रोजेक्ट पहिलो बजेटमा आउँदैन । सुशानका लागि कार्यालयलाई सिस्टममा ल्याउन जोड दिन्छौँ । बजेट कति पाउँछौँ, प्रमुख कार्यकारी अधिकृत, महाशाखा प्रमुखको ब्रिफिङ लिनुपर्‍यो । अहिलेको बजेटले कस्तो काम गरेको छ, केके परिमार्जन गर्नुपर्छ, हामीले भनेका कार्यक्रमलाई कसरी लाऊू गर्न सकिन्छ, एक महिना महानगरपालिकालाई पढेर बजेट बनाउँछौँ ।

गौरवका आयोजना अध्ययन गर्नुपर्ने हुन्छ । हामीले हालको पोखरा बसपार्कलाई सिटी बसपार्क बनाउने भनेका छौँ । त्यसका लागि चाहिने के हो भन्ने पहिलो बैठककै एजेण्डा बनाउँछौँ । पोखरा छिर्नेबित्तिकै बनाउने भनेको बसपार्कलाई चाहिने पूर्वाधार, अध्ययनको काम यो बजेटमा सुरु गर्छौं । पोखरालाई दुई महिनाभित्र पार्किङ व्यवस्थित बनाउँछौँ । सशुल्क भएको ठाउँमा शुल्क तिर्नुपर्छ, सशुल्क नभनेको ठाउँमा पर्दैन ।

राजस्व उठाउने धेरै ठाउँ छन् । उठाउने ठाउँ खोज्नुपर्‍यो । त्यसको व्यवस्थापन गर्छौं । भित्री सडकमा एउटा साइड मात्रै पार्किङ हुँदा समस्या भयो भन्ने गुनासो छ । पार्किङबारे ट्राफिकले प्लान बनाएर ल्याउनुहुन्छ । त्यसलाई पनि पहिलो बैठकमा छलफलको विषय बनाउँनेछौँ ।

पोखरामा गठबन्धनबाट मेयरमा विजयी भएका धनराज र उपमेयरमा पराजित कांग्रेसकी कोपिला रानाभाट ।

अब तपाईंले बनाउने बजेट र तपाईंको अन्तिम बजेटमा कति फरक हुनेछ ?

कम्तीमा ४ गुणा बढ्छ (चालु आवको पोखराको बजेट ६ अर्ब २७ करोड रुपैयाँ छ) ।

पहिलो निर्णय के गर्नुहुन्छ ?

पोखरा महानगरपालिका अभिभावक होस् भन्ने अनुभूत सबैलाई होस् भनेर जन्मदेखि मृत्युसम्मका जति दर्ताका प्रक्रिया हुन्छन्, छ महिनाभित्र गरे पनि त्यसलाई नि:शुल्क गर्ने पहिलो निर्णय हुनेछ ।

प्रकाशित मिति: मंगलबार, जेठ १०, २०७९ २०:५५