मेयरमा निर्वाचित भएपछि रेनु दाहालले भनिन्- सोचेभन्दा राम्रो मत पायौँ

A+ A A-

भरतपुर महानगरपालिकाकी नव निर्वाचित मेयर रेनु दाहालले अबको कार्यकालमा महानगरपालिकामा बेरोजगारी अन्त्य गर्ने घोषणा गरेकी छन् ।

उनले आफूले सोचेको भन्दा राम्रो मत पाएको पनि बताइन् । ‘हामीले सोचेको भन्दा राम्रो मत तथा नतिजा प्राप्त गरेका छौँ । म एउटा परीक्षण पार गरेर आएको छु । दोस्रो कार्यकालको लागि पनि विगतका अधुरा कामहरू र जनताले अपेक्षा गरेअनुरुप सकेको मैले कोसिस गर्नेछु,’ रेनुले भनिन्, '३ देखि ७ हजारसम्मको मत अन्तरबाट जित हुन्छ की भन्ने लागेको थियो ।'

भरतपुर महानगरपालिकाको मेयरमा जित निकालेसँगै रेनुले अबको पाँच वर्ष आफ्नो लागि अन्तिम कार्यकाल भएकोले अब शिक्षा, स्वास्थ्य र पूर्वाधारको क्षेत्रमा जोड दिने बताइन् । 'अबको पाँच वर्ष मेरो अन्तिम कार्यकाल हो । मैले यो अवसर पाएको छु । यो अवसरलाई एक सेकेण्ड पनि खेर नफाली क्षमताले भ्याएसम्म मैले भरतपुरका जनतालाई निरासा हुन दिनेछैन,' उनले भनिन्, 'थप मैले जिम्मेवारी बोधका साथ अगाडि बढ्नेछु ।'

अबको पाँच वर्षमा भरतपुर महानगरपालिकामा बेरोजगारी अन्त्य गर्नका लागि रोजगार बैंक स्थापना गर्ने, उद्योग ग्राम स्थापना गर्ने र उद्यमशिलताको विकास गरेर रोजगारी प्रवर्द्धन गर्ने कुरालाई विशेष प्राथमिकतामा राखेको बताइन् । महानगरपालिकाको ढल व्यवस्थापनको लागि गुरुयोजना तयार गरेर काम गर्ने, नारायणी नदीको पुलको पुनर्निर्माणलाई अघि बढाउने पनि उनले उद्घोष गरिन् ।

'अबको पाँच वर्ष कार्यकालमा भरतपुर महानगरपालिकामा बेरोजगार अन्त्य गर्ने रोजगार बैंक स्थापना गर्नेछौँ,' उनले भनिन्, 'उद्योग ग्राम स्थापना गरेर उद्यमशिलताको विकास गरेर रोजगारी प्रवर्द्धन गर्ने प्राथमिकताका साथ अगाडि बढाउनेछौँ ।’

भरतपुर महानगरपालिकालाई देशकै हेर्न र गर्व गर्नलायक नमुना स्मार्ट सिटिको संकल्प पूरा गर्ने, गौरवका आयोजनाहरू जस्तैः सिटी हल, प्रशासनिक भवन, ५ अर्ब बराबरको नारायणी तटबन्ध, अन्तर्राष्ट्रिय क्रिकेट रङ्गशाला, महानगरिय रिङ रोडको योजनालाई सम्पन्न गर्ने कुरा पहिलो प्राथमिकतामा राख्ने बताइन् ।

गत कार्यकालमा बाँकी रहेका कामहरूलाई यो कार्यकालमा पूरा गर्ने लक्ष्य राखेको पनि उनको भनाइ थियो । भरतपुरका बाँकी काम पूरा गरेर जनतालाई निराशा हुन नदिने उनले बताइन् ।

३० वैशाखमा भएको स्थानीय तह चुनावमा भरतपुर महानगरपालिकालाई विशेष चासो र महत्वका साथ हेरिएको थियो । गठबन्धनबाट नेकपा (माओवादी केन्द्र) की नेतृ रेनुले उम्मेदवारी दिएकी थिइन् भने नेकपा एमालेबाट विजय सुवेदीले उम्मेदवारी दिएका थिए । त्यस्तै नेपाली कांग्रेसका नेता जगन्नाथ पौडेलले स्वतन्त्र उम्मेदवारी दिएका थिए ।

मत परिणामअनुसार रेनुले ५२ हजार ३० मत पाएकी छन् भने उनका प्रतिष्पर्धी सुवेदीले ३९ हजार ५८१ मत पाएका छन् । दुई जना बीचको मतान्तर १२ हजार ४४९ रहेको छ ।

त्यस्तै स्वतन्त्र उम्मेदवार पौडेलले १४ हजार ७२८ मत पाए । उपमेयरमा गठबन्धनबाट नेपाली कांग्रेसका उम्मेदवार चित्रसेन अधिकारी ५२ हजार ८०३ मतसहित निर्वाचित भए ।

प्रकाशित मिति: मंगलबार, जेठ १०, २०७९ १५:५९