भरतपुरको मेयरका यी उम्मेदवार, जसले ५ भोट पनि पाएनन्

A+ A A-

स्थानीय तह चुनावमा चितवनको भरतपुर ‘हट केक’ बन्यो । सत्ता गठबन्धनले मेयरमा नेकपा माओवादी केन्द्रकी रेनु दाहाललाई मेयरको उम्मेदवार बनायो । उनी माओवादी केन्द्रका अध्यक्ष पुष्पकमल दहाल ‘प्रचण्ड’की छोरी हुन् ।

पार्टीले रेनुलाई सहयोग गरी मेयरमा उम्मेदवारी नदिने निर्णय गरेसँगै कांग्रेस नेता जगन्नाथ पौडेलले स्वतन्त्र उम्मेदवारी दिए । एमालेले पनि बागमतीका प्रदेश सांसद विजय सुवेदीलाई भरतपुरको मेयरमा उठायो । जसका कारण कतिपयका शब्दमा भरतपुर एमाले र माओवादी केन्द्रका लागि 'प्रतिष्ठाको विषय' बन्यो ।

मत परिणाम भने गठबन्धनको पक्षमा आयो । रेनु दाहाल मेयरमा निर्वाचित भइन् । रेनुले ५२ हजार २८ मत ल्याई निर्वाचित हुँदा एमालेका विजय सुवेदीले ३९ हजार ५८२ मत ल्याए । त्यसैगरी जगन्नाथ पौडेलले १४ हजार ७२८ मत पाए ।

यी उम्मेदवारको भोटको गन्ती हजारमा भए पनि भरतपुरकै यस्ता उम्मेदवार छन् जसले ५ भोट पनि कटाउन सकेनन् । मुख्य निर्वाचन अधिकृतको कार्यालयका अनुसार मेयरमा उठेका २७ जना मध्य ४ जनाले ५ भोट पनि कटाउन सकेनन् ।

यी सबै स्वतन्त्र उम्मेदवार हुन् । थोरै भोट ल्याउनेमा खरायो चुनाव चिह्न पाएका कुलराज कँडेलले ३, जेब्रा चुनाव चिह्न पाएका हरिचन्द्र घिमिरेले ३, कैची चुनाव चिह्न पाएका रमेश भण्डारीले २ र हाँस चुनाव चिह्न पाएका मिलन अधिकारीले २ मत मात्र प्राप्त गरेका हुन् ।