पोखराको मेयर टिकट खोसिएका नेताको वडामा हार्‍यो एमाले

एमाले अध्क्ष केपी शर्मा ओली र टिकट खाेसिएका पाैडेल

A+ A A-

पोखरा महानगरपालिकाको टिकट खोसिएका एमाले नेता दीपक पौडेलको वडा पोखरा १९ मा नेपाली कांग्रेसले जितेको छ । एमालेका उम्मेदवार इमानराज पौडेललाई ५१ मतले हराउँदै कांग्रेसका पुष्पेन्द्र पाण्डे विजयी भएका छन् ।

कांग्रेसका पाण्डेले २५ सय ५४ मत पाउँदा एमालेका पौडेलले २५ सय ३ मत पाए । बाँकी ४ सदस्य भने एमालेले जितेको छ ।

पोखराका ३३ वडामध्ये यो वडा एमालेको गढ मानिन्थ्यो । २०७४ सालको निर्वाचनमा एमाले उम्मेदवार शोभामोहन पौडेल ५ सय २३ मतान्तरले विजयी भएका थिए । त्यतिबेला अहिले वडाध्यक्षमा विजयी भएका कांग्रेसका पाण्डे पराजित भएका थिए ।

पोखरा १९ पुरनचौरका नेता दीपक पौडेलले सुरुमा पोखराको मेयरको टिकट पाएका थिए । सुन चोरीको आरोप लागेर भिडियो सार्वजनिक भएपछि उनको टिकट खोसिएको थियो । पछि गण्डकी प्रदेशसभा सदस्य कृष्णबहादुर थापालाई मेयरको टिकट दिइयो । यसमा पोखरा १९ का स्थानीय रुष्ट बनेका थिए । त्यसको परिणाम चुनावी नतिजामा देखिएको छ ।

मेयरमा पनि पोखरा १९ बाट एमालेलाई गठबन्धनका उम्मेदवारभन्दा कम मत आएको छ । उपमेयरमा भने एमालेले बढी मत पाएको छ ।

मेयरमा नेकपा एकीकृत समाजवादीका धनराज आचार्यले २३ सय ५४ र एमालेका कृष्णबहादुर थापाले २२ सय ६८ मत पाएका छन् ।

उपमेयरमा एमालेकी मञ्जुदेवी गुरुङले २६ सय र कांग्रेसकी कोपिला रानाभाटले २ हजार ५ मत ल्याएकी छन् ।

एमालेले गत २०७४ सालको चुनावमा राम्रो पकड जमाएका वडा यसपटक गुमाएको छ । मेयर उम्मेदवार थापाको पोखरा १६, एमाले संगठन विभाग प्रमुख खगराज अधिकारीको पोखरा ३१, पोखरा ७, पोखरा २४, पोखरा १३ गुमाएको छ ।

पोखरामा हालसम्म १ लाख २५ हजार ५२० गणना भएको छ । त्यसमा गठबन्धनका आचार्य ४ हजार २९ मतले अगाडि छन् । आचार्यले ५० हजार ६१२ मत पाउँदा थापाले ४६ हजार ५८३ मत पाएको मुख्य निर्वाचन अधिकृतको कार्यालय पोखराले जनाएको छ । राप्रपाका शंकर खरालले ५ हजार ३३७ मत र स्वतन्त्र उम्मेद्वार अटेरी अभियानका खडकराज पौडेल (गनेस) ले २८ सय ६४ मत पाएका छन् ।

उपमेयरमा भने नेकपा एमाले उम्मेदवार मञ्जुदेवी गुरुङ ३५ सय ८७ मतले अगाडि छन् । उनले ५३ हजार १७३ मत पाउँदा नेपाली कांग्रेसकी कोपिला रानाभाटले ४९ हजार ५८६ मत पाएकी छन् । राप्रपाकी रञ्जना सेनले ५ हजार ३१८ मत पाएकी छन् ।

पोखरामा १ लाख ४३ हजार २२६ मत खसेको थियो ।

प्रकाशित मिति: सोमबार, जेठ ९, २०७९ १८:२८